Best Blogger Tips

2012年6月1日星期五

富豪吉利(下)


上回講到,吉利汽車(0175)母公司吉利集團在2010年3月,18億美元收購富豪汽車(Volvo),按歐美上市車企過去兩年股價的反彈幅度,富豪汽車的投資升值以倍計,但係吉利汽車一直冇乜著數。

跨國企業併購,大部分以失敗告終,中國企業走出去仆回來的例子亦唔少,中國車企的第一宗海外收購合併,暫時叫做成功,不過只係做好咗「收購」的第一步,第二步「合併」的高難度動作,啱啱先開始。

在2010年9月,即係收購富豪汽車後的半年,吉利汽車行政總裁桂生悅接受香港傳媒訪問時表示,「今年內將與富豪汽車達成技術轉移協議」,預計有助吉利汽車產銷量,「5年內銷量可攀升4倍至200萬輛」。

桂生悅以上預測,在中國車市火紅火綠,吉利汽車如日中天的時候作出,2015年吉利汽車銷量如果可以達到200萬架,而家睇嚟過份樂觀,就算簡單到技術轉讓協議,仲係十劃得一撇,仲要唔關吉利汽車事。

吉利汽車在3月9日發出一份冇乜人留意的自願性公告,表示母公司吉利集團,同富豪汽車簽咗份技術轉讓的備忘錄,記住,只係備忘錄,吉利集團有可能「全面使用富豪汽車授權的先進技術」,打造旗下「高端品牌」;雙方將進一步實現「協同效應」,聯合開發綠色引擎及新能源汽車。

通告同時透露,吉利汽車正同阿媽講數,點樣參與富豪汽車的技術轉讓,包括資金安排,即係話吉利汽車同富豪汽車雖然已經係姊妹公司,不過講到使用呢位鬼妹細妹的技術及科研成果,絕對唔係免費,要慢慢講數;阿媽同細妹合作,會避免同吉利汽車爭飯食,如果出現競爭,承諾向吉利汽車出售有關業務及資產,亦都要講數,相關技術及資產的轉移,有冇親情價,將決定吉利汽車長遠有冇運行。

收購富豪汽車之前,吉利集團有9成以上資產,已經放咗入吉利汽車的香港上市平台,冇話有乜競爭,今時今日又唔同講法,吉利系有兩件事可以做,第一件幫富豪汽車做大中國市場,包括在內地設立生產線,盡量爭取富豪汽車享有中國企業的各種稅務及政策優惠;第二件保持吉利在內地的競爭力,最理想係開拓海外市場。

總理溫家寶早排訪問瑞典,特登探訪富豪車廠,睇睇人哋點做撞擊測試,公開表揚吉利集團同富豪汽車的合併,是中外企業合併的「佳話」,唔使問阿桂,在吉利汽車主席李書福等管理層眼中,在中國做大富豪,比保持吉利品牌可能更容易,亦更賺錢。

人的精力有限,富豪及吉利在市場定位各走極端,兩個截然不同的戰場,可以想像,過去兩年李書福的精力及時間,大部份放在吉利集團,吉利汽車就算未變孤兒仔,亦有輕重先後之分。

李書福在收購富豪汽車之後,對富豪呢個貞節牌坊保護得無微不至,面對住富豪的外國人管理層及外國市場的目光,唔敢擺出財大氣粗的老闆氣勢,甚至有過份步步為營的咁覺,如果有估錯,吉利管理層目前最關注的,唔係富豪對吉利的競爭,而係吉利對富豪的威脅,包括如果將富豪技術同吉利分享,可能會刮花富豪呢個招牌,例如幾十萬先買到的富豪汽車的安全系統,冇理由在幾皮嘢的吉利熊貓亦會出現。

吉利系的管理層,目前應該處於一個左右為難的局面,阿媽在姐妹之間的發展,唔可以表現得太過大細超,又要忍住偏心的誘惑,舉個例,如果李書福今日將在富豪汽車重新上市,估值可能遠超當日的18億美元,選擇獨立上市,既可以保持富豪品牌的獨立性,相對透過吉利汽車呢個上市平台,更加方便快捷乾手淨腳。

聽講富豪汽車的工會領袖,當日兜口兜面問李書福,點解要接受吉利的收購建議,李書福講咗一句「我愛你」,土裡土氣的打動咗富豪,今日兩難之中點選擇,取決於李書福等管理層,有幾愛吉利呢個舊招牌。

關連文章:
1. 富豪吉利(上)(下)

2012年5月31日星期四

富豪吉利(上)

今期開吉利汽車(0175)

2008年全球信貸危機之後,中國掟出號稱4萬個億的刺激經濟大禮包,仲有狂減存款準備金,揼錢大起高鐵,汽車喪搭家電建材齊齊下鄉之外,仲有掟錢津貼中產買車,誓要救國救地球。

近排打開大陸報紙,見到唔少類似的政策又再出現,雖則官方口徑講明類似08年的4萬億銀大補藥唔會歷史重現,但係中央財金官員明顯已經進入類似的「非常時期」狀態。

有冇留意,國家統計局近年季季月月公布唔少經濟數據,全人類分析得樂此不疲,「失業率」呢個最簡單亦最重要的數字,涉及維穩機密,從來唔會見光,可能財金高層見量地人口越嚟越多,焗住加碼刺激增長,官方原本將今年經濟增長目標訂做7.5%,不過為咗十八大勝利召開,近排聽講已經變成老八都要「保八」。

半個百分點的經濟增長,在玩慣數字遊戲的內地官場,小兒科矣,最緊要阿公要谷唔要縮,經濟增長目標可以微調至「保八」,好多嘢都可以微調,包括房地產調控,又包括交通政策,而家個勢睇嚟,好快又唔記得咗,前總理朱鎔期講話實錄裡面臨時加插的最後一章,有關反對補貼私人汽車市場的國情。

09年初有個叫做《汽車產業調整振興計劃》的大藍本,掟出街後,推出一系列的買車換車政府津貼,包括汽車下鄉、舊換新、減排扣稅等,放落中國的消費市場,結果引爆車市爆炸性增長,唔使兩年,中國已經過美國成為全球最大的汽車市場,車企股價升得快過直升機。

當日車企的增長,應該好多人都跌晒眼鏡,包括吉利汽車的執行董事洪少倫,呢位差唔多十年前毅然轉行幫大陸民企打工的前賓架,08年底手上大約有5千幾萬股吉利認股權,行使價低過一蚊,去到09年中,減持大約一半,亦即係賺少差唔多半個億,連一個做過投行中國研究部主管又做埋上市車企高層的案內人,都食唔足大半個升浪,可見當日車股有幾火爆。

舊年吉利純利冇乜增長,但係市盈率亦已經回落到10倍左右,高峰期的一半唔到,今日阿公又掟汽車下鄉、舊換新等刺激措施出嚟,雖然主要城市的新牌發行限制仍然存在,相關政策細節,例如咩型號乎合資格,補貼幾多都未有定案,但對吉利呢類大眾化車款,點都有一定幫助,當然拉,冇咗08年的災後低基數效應,當年的爆炸力冇可能重現。

國產車股近年增長放緩,其中一個原因,就係唔夠外國品牌揪,唔少車股同來佬車廠有合作,甚至本身係合資企業,不過吉利地位最獨特,因為在2010年的高峰期,吉利母公司吉利集團,18億美金買咗架富豪汽車(Volvo)翻嚟,成為第一間亦係第一收購外國老牌車廠的內地車企。

吉利集團做呢世紀大刁的時候,中國車市正處黃金時期,撞啱通用及福特等美國老牌巨人,瀕臨破產邊緣,福特在95年65億美金收購富豪,15年後,18億美金賣斷俾如日方中的吉利集團,兩年來,福特股價都反彈差唔多兩倍,照計吉利集團今日賣富豪出街,最少賺幾十億美金。

當日呢單刁充萬中美車市改朝換代的味道,吸引全球目光,今日又唔係咁多人留意,對吉利汽車有乜特別影響。吉利集團同時控制中外兩個車企品牌,理論上既有中國製造的成本優勢,又有百年老店的技術優勢,香港上市的吉利汽車,點都會有著數,不過差唔多兩年,吉利同埋富豪好似繼續各行各路各有各做,甚至可以話,富豪搶咗吉利唔少市場,仲有管層的精神時候,母公司賺到笑,但係上市公司未見任何協同效益。

下回再續。

關連文章:
1. 富豪吉利(上)(下)

2012年5月30日星期三

分家共產(下)

上回講到,香港幾個家族控制的上市系統,幾個豪門大宅,都出現企業傳承的分身家問題,有啲爭到去中央政府門口,有啲嘈到去廉記飲咖啡,為香港庶民增添唔少茶餘飯後的話題娛樂。

管理層夠唔夠專注,往往直接反映在公司股價,公司老闆自己打晒交,股價好打極有限,正面教材有捲入貪污醜聞之前的新地(0016),郭氏三兄弟著埋同一條底褲,估值永遠秤高過幾他地產股成條街;反面教材有爭「燊」家仲未大結局的澳博(0880),雖然幾房人都有增持的誘因,但股價長期跑輸其他濠賭股。

家衰口不停,管理層不和影響股價,不過吓吓要楝個八十幾歲伯爺出嚟,亦唔係辦法,因為一間公司管理層有冇活力衝勁,亦直接影響市場對公司增長潛力的感覺,強如長實(0001)主席李嘉誠,集團近年唔係冇增長,不過就俾唔到投資者十幾年前的「超人」感覺。

半年之前,新地市值仲接近三千個億港銀,當時新世界發展(0017)市值唔夠400億,恒地(0012)都係700億多啲,眯埋眼,將三大藍籌公司所控制的資產秤一秤,都知道恒地新世界加埋,冇理由連半間新地都冇,呢啲就叫做管理層折讓。

恒地及新世界,以前被視為香港四大地產商之一,近年市值已經被恒隆(0101)九倉(0004)爬晒頭,一來可能彤叔四叔的私房投資太多太搵錢,唔志在上市公司的幾百億銀,二來亦反映管理層的衝勁,恒隆陳啟宗及九倉吳光正,都只係六張幾嘢,後生廿年,多啲時間跑大陸見人搵生意,兩間公司在大陸的磚頭亦最大嚿,大陸地產風險唔細得個香港,但係最少叫做有個發展策略,同埋行出嚟講得明咁囉。

所謂投資 者關係,包括管理層擁有同市場溝通的能力,亦包括管理層重視同市場溝通的重要,唔係講笑,幾百億市值的差別,可能只係因為唔識唔肯做少少門面功夫, 講緊新世界舊年底開始搵幾件三十出頭的第三代出嚟扮發奮圖強,市值都升幅百幾億銀啦,所以家族企業改朝換代,未必唔係好事,新地家吓最正路的做法,可能係加加接班工作,搵幾件夠醒目的第三代出嚟見人。

美國超級富豪當中,有個八張幾嘢的巴菲特,有個六十未到的蓋茨,仲有一堆好似朱克伯格呢類三十未出頭的互聯網才俊,年齡分嘢好大,超級富豪在某一個年齡組別高度集中的情況,在香港非常明顯,亦解釋咗點解好似爭身家爭開有條路,爆完一單又一單。

咁情況又可能只會在香港呢個時空先會出現,香港經濟由早期的英資壟斷,過渡至幾大華資財團,可以話時勢做英雄,呢班八十幾歲的伯爺當然有其過人之處,不過在香港過去幾十年的政經時空,冇誠哥四叔彤叔,都必定有幾件啱時啱候的華資大孖沙出現,冇走雞者。

今時今日幾大家族交棒,好有一個時代的結束的味道,講緊97年前的後過渡期,紅籌國企炒到飛砂走石,但係主權移交後,一句「河水不犯井水」的最高指令,中資活動在香港轉趨低調,會嚟香港上市集資,但只會搬錢返大陸發展,過去十年中國搵食易過香港,中資財團在香港亦冇乜特別動作,最近見到農行(1288)50個億買件中環甲級寫字樓做總部,建行(0939)仲跨張,買間酒店做員工宿舍,擺明車馬要在香港大搞特搞。

當年幾個華資大孖沙,香港乜嘢行業都玩晒,唯獨冇人沾手銀行,斷估唔係冇興趣,而係同銀行關係好好,同銀行拍住上做大刁;今日香港豪門大戶分身家,拆唔掂數的話,怕且中資的時代會提早來臨。

關連文章:
1. 分家共產(上)(中)(下)

2012年5月29日星期二

分家共產(中)

上回講到,長實(0001)主席李嘉誠,忽然爆響口分身家大計,大仔李澤鉅分到長和系上市王國,再用私己錢資助次子李澤楷發展自己事業,收購自己鐘意的公司,以資產值計將會等如李澤楷目前財產的數倍,呢位電盈(0008)主席有望再喺金融市場搞風搞雨,重施財技,買幾件嘢搓圓撳扁。

香港首富呢個分產計劃,可以話係近幾年香港豪門當中,分得最徹底的一個方法,將守業重責交俾穩健的大仔,再真金白銀資助坐唔定的二仔開拓新空間,完全乎合佢老人家「穩健不忘發展」的營商之道。

超人爸爸認真用心良苦,兩兄弟各行各路,可能係確保「一定有兄弟做」的唯一方法, 因為其他豪門大宅太多前科,一個家族幾房人利益綑綁埋一齊,自觀意願全家富貴,不過人類天生唔係鐘意分享權力的動物,好似希慎(0014)咁疊埋心水收租唔搞咁多嘢,物業組合仲可以幾多單傳,其他複雜少少的上市公司,遇上唔同重大決策,人多口雜,肯定多拗熠。

最經典例子,澳博(0880)賭王何鴻燊幾房人,打到頭崩額裂,家事炒到要中央政府出手做和事佬,暫時大家俾面,明爭變暗鬥,金枝慾孳續集遲早再上演;大家唔好晤記得銀河娛樂(0027)主席呂志和,都係屬於八張幾嘢的大孖沙伯爺,兩位囝囝耀東耀華,分管賭場地產,曝光率唔算高,甚少一齊現,手足唔知幾情深,睇樣兩人都唔似係善男信女,唔可以排除,銀娛同埋嘉華國際(0173)出現同類豪門恩怨的可能。

早十幾年,全香港有銀界都話新地(0016)伯爺夠高招,一個綑綁式的遺囑安排,要郭氏三兄弟著埋同一條底褲,新地亦的確做得有聲有色,今時今日搞成咁,都無謂講咁多。

恒地(0012)主席李兆基,日前接受傳媒訪問時透露,不時同新地郭老太通電話,「仔女唔識性」,叫佢睇開啲,四叔仲話,發現香港富豪中,有三個仔以上的「多數唔掂」,兩個就夠晒數,啱啱好咁話。

講到尾,有冇兄弟做,唔關事個伯爺有幾叻,最重要都係第二代的性格,長實誠哥明顯知道兩位公子冇可能分享權力,共同管理一個上市集團,四叔扮懵心精,「兩個啱晒數」的結論,唔知應用在恒地身上有冇問題。

當然啦,講到幾千億銀的身家,自己放得低,身邊位太座亦未必放過你,第二代就算「兩個啱晒數」,再開枝散葉落去,就唔係咁易拆掂數,一代親二代表,三代咀藐藐四代唔識叫,好似四叔大仔整個串燒三兄弟佢老人家湊,千億新抱就要急起直追,順德人聽講好重男輕女,唔知會唔會追到第三代男丁打成三比三平生先肯收手。

恒地接有全港最巨型農地土儲,相信亦係打樓釘收舊樓強拍最多的一間,四叔話恒地值100蚊,打個7折都應該有70蚊,不過藍籌地產公司當中,恒地屬於最唔鐘意做投資者關係的一間,大仔太木納,二仔太招搖,家臣林高演又唔鐘意搶老細風頭,恒地其實最需要請個「財經演員」,專門見芬佬分析員。

一間家族管理的大公司,越係家大業大,管理層越難同心同德,好似新世界發展(0017)咁,好似長房話晒事,但係亦插咗唔少皇親國戚,近年第三代開始在管理層開始蒲頭,而家判新世界第三代管理質素唔掂的話,可能有啲唔公道,不過幾個月,老臣子前高層梁志堅,跳糟去九倉(0004),破咗香港地產界高層最高齡過底的記錄,可以想像,新世界新人事新作風,唔係唔易頂得順。

新世界管理層質素係一個問題,更大問題係業務太雜,現任主席鄭家純,當年新官上任時太過有大志,買到公司周身債,新任管理層如果要表現管理能力,最應該做其實係為公司減肥,咁多業務橫掂管理得唔好,將部分資產出售套現,好過吓吓要股東供股集資囉。
下回再續。

關連文章:
1. 分家共產(上)(中)(下)

2012年5月28日星期一

分家共產(上)

今期諸事八卦,開分身家,睇睇香港幾大豪門控制權的傳承變動。

近排市場水靜鵝飛,冇乜大刁,好在仲有長和系主席李嘉誠,失驚無神爆響口,主動透露咗香港最巨型家族上市資產的分身家大計,救咗乾晒塘的財經茄哩啡一命。

長和系業績春秋二祭,加埋股東會之後見人,誠哥同埋大仔李澤鉅,一年例牌開記者會三次,長和系業務在香港已經唔大,大家見慣見熟,家事國事天下事,乜都講餐胞,似維園城市論壇多過藍籌企業記者會,第二時誠哥退咗休,好似英國球壇冇咗費格遜,唔知點自,認吓想像,長和系股東會只有李澤鉅,好穩健但很悶廿幾年,唔慣囉。

大富大貴之家,閂埋門爭家產,外人無謂多咀說三道四,不過香港幾大豪門,控制資產以萬億銀計,涉及多間香港藍籌上市公司,家事變諸事,好似誠哥咁講,橫掂遲早唔係秘密,大股東股權變動,會在上市公司年報出現,與其引起市場無謂臆測股價波動,不如主動公開講清楚。

據誠哥所講,大仔李澤鉅,分到長實(0001)和黃(0013)的逾40%股權,仲有35%加拿大赫斯基能源股份,唔重複計算上市體系資產,市值大大話話二三千億港元;細仔李澤鉅,就會「俾錢佢囉」,用自己私人財產,「全力支持」呢位電盈(0008)主席發展其他個人事業,收購一啲佢「有興趣做」的公司,金額會係會係李澤楷「現時資產的幾倍以上」,斷做分身家唔會過份大細超,單位都係以千億銀計,即係話誠哥收收埋埋咁多年長和系股息,加上自己投資,私人口袋裡面的現金﹐唔會細得過上市王國市值多少。

李澤鉅由細到大跟住老豆學做生意兼打工,「爸爸的安排永達都OK」,好似誠哥咁講,長和系唔俾佢打骰都唔公道。李澤鉅好似當年雍正咁,廿幾三十年勞心勞力搏表現,又唔可以放手太出位,記憶中冇接受過一次專訪,長和系由呢位大子繼承大統,同專業管理分別唔大,除非壓抑自我太耐,一上位大過博命,否則股東同埋機構投資者,安全感肯定大過一分鐘有七個唔同諗頭的二阿哥。

講緊長和系發展到今日,已經成為一個防守性甚強的綜合企業,近兩年兩單近千億大刁,都係在歐洲買啲唔死得人的公用事業,唔會大賺特賺,亦唔會忽然蝕到甩褲,今時今日就算誠哥退休,對長和系股價唔會有太大衝擊。

誠哥八十幾歲人,香港大孖沙伯爺界當中,應該係最精靈嗰個,忽然將個分身家大計爆響口,可能因為李澤楷嗰邊的收購就快埋牙。俾你做賓架,知道誠哥準備掟千幾二千銀幫囝囝買幾件玩具,你都會即時四圍搵賣家做中間人,賺一兩個佣已經成世唔使做,而家成個歐洲莫財,歐元又跌到啪啪聲,長和系同埋李澤鉅呢個時候掃貨,終極人間意義就係,所謂「歐債危機」,對於超長線投資者嚟講,只係過眼雲煙,始終都會過去。

小朋友讀書成績好,老豆出錢做獎勵,叫佢去玩具反斗城任揀一件,都唔知揀邊件好,李澤楷鐘意啲乜,可能真係考起全人類,不過好肯定呢位公子唔係咁鐘意電盈喇,十幾年前蛇呑象食咗香港電訊,之後就算老豆幫到出面,但係都甩唔到身,慘過坐監,之前講過幾次,李澤楷斷斷接受唔到,當年羸盡無數香港股民底褲的一場金融大戲,就係人生的Legacy,就係事業的高峰,今次老豆出錢俾佢掃貨,買幾件嘢返嚟,又可以做金融界焦點人物,又有嘢俾佢搓圓撳扁,財經大戲即將再度上演,李澤楷同埋班幕後軍師玩財技咁叻,有成千億銀彈藥,好應該在過程出益返吓電盈股東,無謂俾人指住唱衰一世。

下回再續。

關連文章:
1. 分家共產(上)(中)(下)