Best Blogger Tips

2011年5月13日星期五

中港新股(下)

(刊於2011年5月13日am730)

香港新股,要睇吓隻米蘭站(1150),好耐未見過,一間純香港企業喺香港上市,一個投資一百萬兼投資十年,由破產邊緣到風光發達的香港故事。

2001年,科網熱退潮兼撞正「9.11」,香港經濟再陷衰退,當年睇過一個米蘭站老闆姚康達專訪,講到 97年買樓變負資產,本來搞樓上舖賣二手衫,兩位女拍檔唔肯轉戰地舖拆夥,30歲出頭,會考證書冇張,住緊間屋銀主盤賣出,供樓變「供空氣」,熱血一股盡地一煲,租用尖沙咀一個2百幾呎地舖,即係米蘭站老店,唔使兩年還清欠債兼搬入何文田,當年京士柏山最年輕住客,一個係古天樂,另一個就係姚康達。

十年人事,米蘭站上市,以招股價上限1.67元計,市值33.4億,2010年純利愈5千萬。

米蘭站創業初期定位清晰,二手名牌手袋,貨物出門保證7折回收,同另一個香港故事稻香(573)的「一蚊雞」,都係逆境中最精采宣傳策略之一。成事在天,米蘭站成功,亦有賴其後國策國情轉變,先有自由行,再有近年高檔消費熱,國際名牌排隊香港上市,食住條水,米蘭站擇機上市,意料中事,計埋超額配股權,每股盈利8.05港仙,用招股上限計,市盈率20.7倍,拍得住近年最火爆的香港消費股。

米蘭站本業,香港二手名牌銷售,其實已經飽和,收入近年冇增長,舊年公司「提升業務策略」,銷售限量版名牌手袋,一手新貨銷售,由08年佔總收入兩成,舊年升到半壁江山,增長幾乎全部來自新業務。

限量版名牌手袋,多數畀名店VIP掃晒,米蘭站今日宣傳「女人最想的,我做得到」,幫非名店常客撲袋食差價,未必為各名店所喜,因為名媛喺米蘭站見到一模一樣限量版手袋,可能即時唔做名店VIP。米蘭站公司招牌A貨太重,唔上得大枱,轉戰一手名牌,掛羊頭賣魚子醬,難脫強烈錯配感覺。

米蘭站有13間分店,兩間喺北京,北上近3年,收入佔整體6%左右,上市集資所得,主要在國內開多11間分店。內地一手銷費品增值稅17%(未來極有可能大幅調低),二手稅率2%,米蘭站未來食粥食飯,在於可唔可以在國內,成功複製當年賴以起家的「講品味都要講經濟效益」策略,大家應該見過唔少「唔講品味亦唔計較經濟效益」的內地豪客,抽新股小炒當怡情,真係投資,記得先叫老婆或女友,去內地米蘭站打個白鴿轉,同埋喺國內消費網站打探吓行情。

米蘭站招股,姚康達賣舊股可套現近1 億元,男人四十,奮鬥十年套現多少,情有可原唔代表大股東無心戀戰,新業務未有往績支持,客觀分析,有一定保留,但為香港人香港企業打氣,主觀意願,希望米蘭站繼續成功。

伸延閱讀:
#

2011年5月12日星期四

中港新股(上)

(刊於2011年5月12日am730)

今期睇睇中港兩地新股市場。

比亞迪(1211)A股上市,磋跎咗兩年幾三年,今個星期中國證監會通過上市申請,預料半年內可以掛牌。

比亞迪差唔多十年前香港上市,當時民企股當炒,比亞迪選擇監管較嚴H股形式上市,所謂「先H後A」,可能審批手續極麻煩,除咗大型國企,先例絕無僅有,連北京國資委樓下間金隅(2009),都寧靜供殼上市,比亞迪一路堅持唔走後門,繼續管理層正正經經古古板板作風。

比亞迪今次得到A股融資工具同時,大股東原本非流通股亦可以套現,不過王傳福同表哥呂向陽,承諾3年內唔賣,同時公司第一次表示,話已經製定咗一糸列3年計劃,睇怕呢隻嘢要最少坐兩三年。

香港新股初步招股文件,俗稱「紅衫魚」,內容同最後版本基本上一樣,但由於未定價,集資用途涉及金額會留白,內地新股,「紅衫魚」會公開周街派,一樣未定價,但好奇怪咁,集資用途又多數有埋數字。

比亞迪A股「紅衫魚」,估計集資總額近22億(人民幣,下同),發行7900萬股,於是條街用呢個數字,計吓最後定價,大約係人仔27.75元,人仔升到呯呯聲,當然比H股有唔少溢價,市盈率亦接近30倍。

國內新股市場,近年有所謂「三高現象」,即係高市盈率、高發行價及高超募資金(前兩者其實係同一回事),新股閒閒地講緊4、50倍,如果比亞迪30倍左右水平定價,已經算好厚道。

今個星期,人民日報有條評論文章,質疑股市制度唔合理,股民冇合理回報,當中特別提到,新股「三高」上市,轉頭插水跌穿招股價,令捧場客損手爛腳。其實除咗股民唔夠成熟,炒新股顛過香港散戶,問題亦涉及定價機制,以前A股新股定價,證監會有個專組話晒事,呢班人有幾好搵,唔使多講,近年引入所謂「詢價機制」,等如做市場調查,睇睇條街覺得隻新股值幾多再行定價。新股上市,大可以定價高到幾千倍市盈率,問題係有冇人幫襯,所謂詢價機制認真多餘,間接反映內地股市,由監管機構到芬佬到散戶到財經分析,都相當幼妜。

股市好大程度係零和遊戲,有人平賣即係有人平買,有人高追即係有人放得好靚,講白啲,就係講對手係邊個,香港股市幾十年歷史,高度國際化,搵食係真正唔容易,A股仍在起步階段,錯價現象,滄海遺珠,機會可能更多。

香港資金進入大陸,只係時間問題,早起的鳥兒有蟲吃,今日就算唔開老鼠倉炒A股,亦應該開始留意吓A股公司,最低限度,摸熟吓上海深圳交易所網頁,掌握資料披露窿路,將來可能大派用場。


伸延閱讀:
#

2011年5月9日星期一

奧巴馬的巴菲特週

股神巴郡股東會,在2009年5月開始,中央電視台年年都派人去,做到第3年,已經見慣見熟,睇得出已經開始悶,冇乜睇頭...








Presented by...