Best Blogger Tips

2011年6月17日星期五

兩制未濟(下)

(刊於2011年6月17日am730)

上回講到,一國兩制,中港融合,既濟未濟,畫唔出一條清晰楚河漢界,四四六六攤開嚟講,可能仲實際。

王光亞高調「親民」,甚至公開評論香港樓市政策,有「過界」之嫌,但如果代表港澳辦調整策略,更直接探取香港人心聲,加強溝通,唔係靠小寶打小報告,其實係好事。

諗極唔明,香港政府成日話有幾多個機制,同中央政府溝通互動,港交所(388)特登搵個李小加做行政總裁,貪佢熟悉國情,同聲同氣打個招呼都方便啲,但係到有問題出現想搵個人解釋吓,竟然又冇人做嘢。

國航(753)上個星期發出通告,話中國稅務法律近期出現改動,喺中國境內企業取得利息收入,唔可能冇得豁免個人入息稅,暫時扣起20%股息,「抓緊與主管稅務機關步一步溝通」查證。

國航係第一間咁做嘅香港上市內地企業,暫時聽唔到有其他公司會咁做,可能國航班律師特別出色,又或者特別小心,國稅總局未必嚟真,不過光大銀行初步招股文件,「風險因素」一欄,多咗個「閣下可能需要繳納中國稅款」,除咗股息,仲講到買賣股票資本收入,都可能要抽20%個人入息稅,之前上市內地企業,例如上禮拜先掛牌嘅華能新能源(958),招股書內都冇提到呢項風險,即係新形勢啱啱先出現。

人大常委今個星期,審緊個人入息稅法修正案,有關稅務轉變,可能由始而嚟,以目前內地國情,大搞收入分配改革,劫富濟貧,向股市投資者抽股息稅甚至資本增值稅,唔係冇可能,係咪應用喺境外投資者,個倉喺自己櫃統及喺金融機構有咩分別,冇人答到,光大銀行文件提到,有關法例轉變,「解釋和應用存在較大不確定性」,但條街已經唔少人唱緊,近來股市唔掂,其中一個原因就係驚買H股賺錢要抽稅,面對呢個咁結構性轉變、咁大不明朗因素,香港政府及港交所,碌木咁楝喺度,下次邊位記者大佬,見到人大常委范太,唔該唔好掛住咩嘢鐵三角,幫手問吓呢個稅務風險仲實際。

一國兩制,唔掣都要掣,一年前中國話要修訂個人入息稅法例,冇人會估到對香港股市交易成本結構有影響,中國互動融通,係無可避免大趨勢,拉大嚟睇,著數始終多啲,近排個市好似越嚟越弱,但國際板、小QFII等等涉及香港股市金融改革,越吹越大聲,斷估唔會放埋一邊永遠得個講字,旺市或者唔咁火上加油,淡市搞金融改革可能仲有睇頭,中細價股唔少洗晒倉,大隻國企藍籌跌到個位市盈率,下半年唔應該睇得太淡。
伸延閱讀:
#

2011年6月16日星期四

兩制未濟(上)

(刊於2011年6月16日am730)

一個兩制,既濟未濟,港澳辦主任王光亞,工作考察香港澳門,四日訪問馬不停蹄,成效如何,未知,但肯定食滯。

人地肥彭初嚟報道,食完蛋撻都歎杯涼茶解解胃,王光亞好似客串為食九條街,又蛋撻又燒肉又奶茶又糯米雞,去到邊食到邊,港交所又去賭場都去,爭在未去浴室桑拿,夠晒出位。

邊食邊講難度已經唔低,王光亞仲要應付傳媒一個又一個問題,香港記者都咪話唔陰濕,係咁搵個咩嘢「鐵三角」擢佢,好似當年上到北京,問江澤民支唔支持董建華連任,兜口兜面仲要兜咪,唔通公開話有保留咩,話支持囉喎,你班友又唱佢欽點,破壞港人治港高度自治,唔怪得老江發晒火鬧人。

由中央到地方高官,無論喺自己地頭定去到外國,近年都好興搞吓政治公關騷,軟化鐵板形象,不過王光亞今次咁高調「親民」,好似頂爺出巡,甚至直接評論香港樓市政策方向,其實已經過晒界,如果發生喺主權回歸頭幾年,已經被傳媒片到狗血淋頭,批評佢井水犯河水,今次王光亞訪港一行,譽多於毁,反映香港人都已經幾接受政治現實,法都釋咗幾劑,咁又點,對一國兩制之間楚河漢界,已經由高度敏感變得相當麻木。

特首曾蔭權民望跌至記錄新低,王光亞暗批房策不當,更可能引起唔少香港人共鳴,港澳事務頂爺開到口,無論「現屆以至下屆」特區政府,都需要解決高樓價引起民生經濟政治問題,即係講明要曾蔭權唔好側側膊以為阿爺唔多覺,快啲做嘢,上星期政府突然出招壓樓市,都唔知係咪收到風,知道頂爺唔妥曾蔭權等榮休心態,如果香港房策短期內出現突變,例如復建居屋,咁就可以宣佈一國兩際港人治港正式死亡。

老實講句,五年都嫌長,仲話五十年半世紀不變,所謂一國兩制港人治港,只係一個動聽口號,聽落順耳兼有安全感,實際上根本無法執行,條廣深港高鐵,起到香港門口,唔通香港段唔上馬咩,早十年京官嚴守中港兩制鴻溝,你估又無人直達天聽告御狀咩,大家將啲嘢攤開啲講,反而仲實際。

下回再續,睇睇中港股市之間,幾個兩制未濟問題。
伸延閱讀:
#