Best Blogger Tips

2011年1月21日星期五

中美惡搞(下)

(刊於2011年1月21日am730)


奧巴馬有鋪癒四圍鞠躬的

上回講到,國家主席胡錦濤訪美,全球焦點,不過近年中美高層交流拗手瓜,嚟嚟去去嗰幾飛,雷聲大雨點少,地球一樣係咁轉。

除咗例牌放底幾百億生意做買路錢,民幣匯率又例牌升多少,中美之間所有敏感議題,其實冇乜計好傾,真係有嘢郁緊,只有知識產權。

06年胡總訪美,微軟老闆蓋茨,神通廣大到請到胡總去佢屋企食晚飯,人人以為微軟有運行,不過可能胡總被布殊仔激得太嬲,中國仍然周街盜版軟件,今次胡總訪問美國之前,國務院下令政府機關唔可以再用老翻軟件,雷厲風行展開六個月正版運動,燒盜版書坑老翻碟,仲由副總理王歧山帶頭成立專責小組,推廣保護知識產權工作。

美國佬軟件公司,成日嘈嘈閉話中國盜版活動,令佢哋每年損失百億美元計,舊年中十二間軟件公司巨頭,齊齊操上白宮施壓,中國對外國人不嬲好有信用,今次承諾進行全面審計,確保各級政府機關使用正版軟件,仲放埋入中美聯合聲明,可能已經令唔少美國公司好開心,奧巴馬最少有樣嘢叫做交到功課。

打擊盜版,尊動知識產權,唔單止係要取悅美國佬,好老套講句,亦關係中國科技產業健康發展。最老套方法,好多時亦係最大路,最正路方法,知識產權係咁,人權都係咁。就算喺紐約時代廣場,買廣告放四千個成功中國人硬照上去,喺大多數美國佬眼中,都大唔過一個劉曉波,先後兩屆諾貝爾和平獎得主,一個同胡總乾杯,一個喺錦州踎監,點都講唔過去,喺冇官方記錄又唔公開談話內容嘅私人夜宴(所有大鑊嘢應該當晚講晒),奧巴馬在道義上,應該會在胡總臉前幫劉曉波講幾句說話?

好多人話二十世紀屬於美國,廿一世紀係中國天下,胡總今次美國次行,最大意義,其實得一樣,就係可以大大聲同十三億人民講,你睇,共黨治下,中國終於可以同超級大國平起平坐,不過國內外,亦有少眾聲音認為,中國近年大支嘢咗,高估咗自己同美國拗手瓜實力。

中國所謂超級大國地位,唔係話當下已經有實力同美國拗手瓜,而係講緊一個超快上升軌跡。美國夠自由民主,不過用武力輸出民主,用冇乜人明嘅金融工具控制金融市場,大損國家形象,中國要國人犧牲部分人權自由,但經濟成績有目共睹,外交世界贏到唔少新朋友。中美真正拗手瓜,與其話係經濟實力,不如話係兩個唔同發展模式,邊個更有持久力。

民族情緒上,當然希望中國贏,不過順叔自由慣,意識形態持久戰,其實希望中國輸。

伸延閱讀:
(1) Francis Fukuyama: U.S. Democracy has little to teach China
(2) 歷史的終結之後(上)(下)
#

2011年1月20日星期四

中美惡搞(上)

(刊於2011年1月20日am730)


大外宣

今期徹底乾溏,冇嘢好講,趁國家主席胡錦濤訪美,講吓啲想噴好耐嘅廢話。

外交呢家嘢,順叔絕對唔在行,次次中美最高領導交手,全世界極度關注,人人大鑼大鼓分析呢樣分析嗰樣,不過一場大龍鳳之後,鑊鑊都好係冇乜大改變,地球都係咁轉。

好似早幾年保爾森做咗美國財長,去到北京同多個領導人攬頭攬頸,整咗個乜嘢「戰略經濟高峯對話」,聲稱中美各個經貿對口單位,有晒直線溝通,後保爾森時代,變咗「戰略與經濟高峯對話」,咪又係咁,好多嘢如果郁到,就唔駛去到外交層面解決。

近幾年中國高層互動,應該係人類歷史以嚟最頻密,奧巴馬上任兩年幾,唔計今次國事(後漢書話係國「是」喎)訪問,已經同胡錦濤見面交手七次,咪又係咁,你砌吓我匯率,我砌吓你台灣,嚟嚟去去又係講緊嗰幾飛。

胡總06年訪美,當時總統布殊仔,唔知係唔俾面,定係唔鐘意外交場合繁文縟節,唔肯認係國事訪問,冇白宮夜宴,又冇請胡總去德州牧場私竇,廿一飛禮炮得十九響,叫錯「中華人民共和國」做「中國民國」,仲有法輪功弟子贈興,可能中國外交界全體覺得冇面,所以呢幾年中美關係浮浮沉沉。今次奧巴馬俾足面,有人話代表中美兩國,第一次平起平坐講數,又唔係好覺,同樣規格,奧巴馬已經接待過印度同墨西哥國家領導人,做足門面功夫,唔代表美國人好睇得起中國。

唔知邊個度條屎橋,胡總今次訪美,北京搵人買起紐約時代廣場露天銀幕廣告位,狂播中國國家形象片(開始相信早兩年小道消息,話北京撥出450億人民幣「外宣費」,幫國控傳媒喺外國打江山),為胡總造勢,大佬,要咁更銷,正正露晒底,話人知自己軟實力唔夠班,呢條片最大反作用,可能係好快會有創意網民,整個惡搞版,放落YouTube,分分鐘可以被網民推上國際新聞。

下回再續。
伸延閱讀:
1. 揭開神秘的「大外宣」面紗
#