(刊於2011年1月14日am730)
 |
| 知唔知呢嚿係乜嘢？ |
講多錢，邊度多得過中國，事實上，大陸資金，已經開始喺香港傳媒及電訊市場搶灘。
新華社舊年，透過有線電視喺香港落地，聽講鳳凰衛視(2008)，又攪緊個廣東話台，仲有個最新出爐嘅香港衛視，牌面老闆高洪星，背景神秘，不過成日同大陸駐港高層出出入入，又係喺前海最先落戶企業名單中，唯一一間傳媒公司。唔好理呢班紅色資本家有乜政治目的，肯擲錢投資，掘角請人，攪旺個場先再講。
中國要提升軟實力，未來五年主要動作之一，要改革國有新聞出版企業，阿公已經講明會提供政策及財政支持，鼓勵上市集資，甚至開拓海外市場。據英文中國日報上個星期報道，人民日報下面個人民網，今年初會喺上海上市，發行四千萬股，每股最多賣20蚊人仔，即係集資最多8億，假設賣25巴仙股份出街，市值32億，據中信證券估計，人民幣舊年賺七千萬，即係市盈率45倍，仲貴過騰訊(700)，但三大電訊公司等幾間中字號巨型國企，已經排好隊做策略投資者云云。
國企傳媒，唔似得國企電訊，冇壟斷地位，上市得到融資平台，結合埋國企巨無霸財政力量，要收購民企或國外傳媒電聯網公司，增加國家隊影響力，絕對配合三網融合大劇本。香港主流免費電視，亞視已經徹頭徹尾和諧咗，電視廣播(511)如果賣盤成功，可以唔問價出得起錢者，多數係國內財團，如果成個香港要融入十二五規劃，重要電訊傳媒企業染紅，其實已經冇話咩嘢敏唔敏感，唔好話無記，就算電盈(008)賣盤，絕對唔係天方夜譚。
而家一街都係iPhone，月費閒閒地比以前高一倍，香港電訊股，舊年股價開始反而大翻身，11月底，瑞信睇和電香港(215)，目標價2.26元，叫人「減持」，今個星期，數碼通(315)盈喜，瑞信拿拿聲轉軚叫「增持」，目標變咗2.75元，兩個月唔夠，評級可以連升兩格，呢啲咪叫大行報告，囉。
中港人口流動近年自由好多，中移動(941)早年收購萬眾，大雞啄細米，今日證明絕對明智，其他兩個競爭對手，絕對有可能有樣學樣，喺香港買個電訊牌照，資訊高速公路，每逢旺市，總有好多併購消息，香港電訊傳媒股，甚至中移動，往續派息都仲接近四厘，唔算失禮，到股價推到息率冇肉好食，到真係有大刁出現，大行分析員，個個同你講前景有幾秀麗，唔提派息幾多幾多，多數就係離場訊號。
伸延閱讀:
(1) 人民網大胃口上市 (轉載《China Daily》報道)
(2) 股海ONE-PIECE： 向瑞信挑機
#
