Best Blogger Tips

2012年6月9日星期六

眼看他起高樓


大陸有間建築公司,叫做「遠大」,以光速起樓出名,呢條「瘋狂的大樓」,就係探討起得快,會唔會有古怪。

早兩日有消息,話呢間公司會在湖南長沙,起楝全球第一高樓,838米,220層,高過迪拜塔少少,叫做「天空城市」,項目代號「J220」,遠大好似話要在7個月內完成咁話。

是否安全,唔知,大家可以睇吓片,不過,大家可以用「XYZ」及「全球最高」兩個關鍵字GOOGLE一吓,「XYZ」等如廣州、海南等任何一個大陸省市名稱,睇完之後,可能會有少少擔心,寫字樓等商業物業,會唔會供應氾濫。

有人話一個地方建築物的高度(或者最高摩天大廈記錄被擦新的速度),同經濟爆煲風險成正比,唔係冇關係的。


伸延閱讀:
1. 新華網: 長沙擬建世界第一高樓
2. Barclays Capital: Skyscraper Index/Bubble Building

2012年6月8日星期五

車天車地


與山、與海、與生俱來;車天、車地、車錯隔離...

「氵盈王月」?乜尻嘢嚟?家吓樓盤名,越嚟越難讀,圖則設計,越嚟越冇人性。

都費尻事再講乜嘢銷售資料誤導,就算係舊公屋,最底層多數都唔會用嚟做住宅,或者同馬路保持一定距離,點解「天宇海」、「天賦海灣」所謂豪宅,個則可以劃到咁核突,完全冇照顧用家的「人性需要」,最底層幾個單位,唔劃做住宅,賣少幾個單位,賺少幾百萬,唔會死人啩?

關連文章:
1. 樓花天與地
2. 僭建演義(中)

焗局侷跼


唔好問點解,大家跟住讀一次,平仄上去:焗局侷跼。開心星期五,無無聊聊,睇睇香港因乜嘢事咁多乜局物局,焗緊乜。

先望吓金融管理局。香港上一朝的財金高層,逐個臨尾香,行政長官曾蔭權同埋前政務司司長許仕仁一身蟻,98年入市打大鱷的串燒三兄弟,仲有金管局前總裁任志剛,啱啱亦俾立法會捉返出嚟打屎忽。

經過3年又8個月的閉門困獸鬥,立法會雷曼迷債小組委員會,星期三終於焗咗份3百幾頁的報告出嚟,退而不休的任志剛,成為唯一被點名「讉責」的官員,被指須為事件負上最終責任。

「公道自在人心」,連美國前聯儲局局長格林斯潘,2008年全球信貸危機後,都被捉上美國國會狂炳,人哋格老都承認監管疏忽公開認錯,美國銀行當日冇將毒債賣俾散戶,點解香港「攞你命3000」周街都係,銀行又可以賣得咁開心?金管局作為香港銀行的最高監管機構,財經茄哩啡只係想借用美國政客當日問格老的問題,問吓任總: My question is simple. Were you wrong?

金管局當年一掟幾十個億,掃落國金二期頂樓十幾層寫字樓,今日應該升值最少一倍,一個人坐在金融雲端咁耐,更難認錯,一句「Sorry」更難出口,任志剛做足金管局總裁16年,年薪過千萬值,冇任期限制,又可以獨斷獨行自資自置總部,咁多年嚟,對住立法會班大帝,都當人哋係傻仔,今日有位俾人入,難免又被人大力啲招呼。

任志剛強調自己「問心無愧」,又話個人力量難以同「政治機器」抗衡,佢老人家口中的「政治機器」,唔知係咪講緊立法會咁簡單,不過呢,從今之後的金管局,肯定冇佢在任時咁惡,例如現任總裁陳德霖,當日有份捧當奴上位,但係任期都有時限,呢個筍位兩年後唔知有冇需要執吓位,不過金管局職能,未來幾年可能會有大轉變。

人人講緊候任特首梁振英上場後,會搞個「港版淡馬鍚」,如果屬實,金管局對香港外匯及財政儲備的投資的話事權,就會被大幅削弱。香港政圈,而家個個都在關心所謂「五司十四局」的政府架構重組,銀行賓架,可能最關心一隻新怪獸,叫做「金融發展局」。

「金融發展局」呢個概念,寫在梁振英的競選政綱裡面,近日接受香港左派報章訪問時,梁振英特別提到,短期內會成為一個工作小組,研究成立呢個最新組織,好似旅發局、貿發局咁,等金融業界可以同政府一齊探索金融業的發展。

「金融發展局」最後焗咗嚿乜嘢出嚟,唔知,不過呢個構思舊年底出街之後,當時幫緊唐英年助選的任志剛,已經第一個跳出嚟反對,質疑建議「缺乏專業知識」,近月所見,好多當日「梁營」的中資機構高層,例如中銀(2388)謝湧海、光大(0165)的陳爽,都在力谷呢嚿「金融發展局」,其中講得最多一個職能,就係同中國財金監管機構的溝通,做整體協調,同埋研究長遠戰略決策咁。

香港從來都冇「地產發展局」,地產業又唔係成行成市,前朝董建華年代,乜乜物物發展局一大堆,唔講唔知,航運發展局之外,又有個港口發展局,仲有個物流發展局,問你死未,呢堆嘢在董伯伯腳痛之後,唔知仲有冇運作,不過近日梁振英每逢接受訪問,幾乎都重提航運、船舶金融中心之類的構想,乜局物局,怕且又會翻生。

銀行公會同金管局一班人,例牌年底訪京,舊年去完北京,個個爭先恐後跳出嚟支持唐英年參選特首,可能成個香港金融世界被人跣咗一鑊,不過唔難猜測,對於梁振英嚟講,香港金融界係一個最插唔入的山頭,在金管局頭上焗個金融發展局,目的都好明顯囉。


2012年6月7日星期四

煤氣今天(下)


上回講到,中華煤氣(0003)唔聲唔聲,中國大陸嚿嘢越做越大,公司招牌開始名乎其實,今年內地業務盈利貢獻,將會超越香港。

唔少老牌香港企業,在內地都搞到好大,好似東亞(0023)恒隆(0101),資產計差唔多中港半壁江山,但賺錢大本營仍在自己地頭;周大福珠寶(1929)在大陸搭個千店雞棚,8成盈利仍然來自香港幾十家分店;煤氣在香港150年基業,仲要係一個壟斷近8成市場的獨市公用業事,北上搵食最多十幾廿年,絕不簡單,亦可以反證內地燃氣市場,相對其他港企可以涉足的行業,更易搵錢。

中國燃氣市場七國咁亂,市場充斥唔少錯誤的印象,例如好多老外傳媒,周不時仲形容新奧能源(2688)為網絡「中國最大」的管道燃氣供應商,又形容北控(0392)為銷量「 中國最大」,實情就係,無論以市值還是銷售量排行,甚至係網絡覆蓋地盤大細,煤氣都可能係「中國最大」,呢個地位及潛力,財經茄哩啡兩年前幾寫《群鴻氣海》時,都睇漏眼,因為注意力太過集中在港華燃氣(1083),忽略咗煤氣本身都在密密投資。

內地城市管道燃氣項目,至2011年底,港華燃氣有66個,煤氣本身都有34個,阿媽地盤主要在一二線城市,為1,320萬客戶供氣,新奧能源只係駁到510萬;煤氣燃氣總銷量,已經突破100億立方米,北控舊年的總銷量,亦只有64.7億立方米。

唔計港華燃氣的投資,煤氣本身在內地的管道燃氣項目,大大話話已經投資咗120億元(人民幣,下同),不過好多項目未達到需要披露的水平,所以香港投資者唔多覺,見住煤氣發到咁大,新奧拍住中石化(0386)收買中國燃氣(0384),或多或少,就係想搶回「中國最大」管道燃氣公司呢個光環。

燃氣市場增長速度,同大陸城市化的速度成正比,新樓起得越多,越多用戶需要駁喉供氣,私人住宅多炒家,好多新樓空置,水電氣咪錶永遠唔識跳,阿公講明要起多啲政府津貼的「福利房」,未來5年廣廈3,600萬間,呢個來自公營房屋的供應,唔會起咗冇人住,下游燃氣供應商,受惠於廣廈千萬間的程度,其實仲大過水泥基建公司。

除咗下游市場,煤氣近幾年更加衝上中上游,單是所謂「中游項目」,即係天然氣接受站,自2004年開始已經投資103億元,唔細得過城市管道燃氣的投入,當中包括廣東省的液化天然氣項目,煤氣佔股只有3%,但投資額76億元,呢嚿嘢大有文章,好簡單咁講,可以加大煤氣在成本控制的能力,包括香港業務的成本。

煤氣在內地市場越游越上,近年所染指項目,已經包括煤礦、煤基化工等「新能源」項目, 可以想像,未來的煤氣,或者有可能分拆出來上市的內地能源資產,同昆侖燃氣(0135)呢個垂直式發展的巨無霸,會係同一類公司,不過「煤氣」呢個中文招牌,有可能要改一改,唔係好配合中國減少燒煤呢個政策大方向。

之前講過,內地管道燃氣市場有兩類公司,一類好似新奧,全國幅射式的擴張,一類好似北控及以前的鄭州燃氣,將一個主要市場圍到滴水不進,煤氣目的的運作模式,在內地屬於前者,鬥快,在香港屬於後者,鬥穩,煤氣守中有攻,所以近年抗跌力特強。

煤氣日前舉行股東會,管理層講到,未來3年,仲會在內地投資100個億,7成放落新能源項目,香港增長有限,每年只係放7個億維修及建設管道,未來如果再出現類似大埔呢類爆喉斷氣之鑊,香港人可以有合理懷疑,煤氣北上擴張,已經影響到在香港的服務質素,當然啦,煤氣北上大搞,亦唔排除火燒後欄,出現國內能源公司殺入香港供氣市場,同煤氣正接競爭的可能。

關連文章:
1. 煤氣今天(上下)
2. 公用功用(上下)

2012年6月6日星期三

煤氣今天(上)


今期開中華煤氣(0003),睇睇呢隻香港最老牌企業之一,近幾年靜靜起地革命,搞緊邊科。

香港出名地少路迫喉管多,十幾間電訊公司加水電煤,十幾條喉塞埋一箸,理論上,安全措施一定會做足,確保一條喉出事,唔會影響到其他管道,所以好少話兩喉管齊齊爆,爆咗影響範圍都唔會好大。不過,前日大埔爆鹹水喉,竟然可以射穿隔籬條煤氣喉,搞到成個大埔過萬商住用戶,約十萬人口斷煤氣,仲要搶修兩日都尚未恢復供應,好耐冇見過咁大場面。水務署成日爆水渠自然抵鬧,之不過煤氣條喉咁雞,原來用水一射就會爆,又好難扮「受害者」博同情,商戶要索償斷氣損失,唔知應該告政府定係告煤氣喇。

港府容許供電供氣幾間公共事業,擁有壟斷或近乎壟斷的地位,正正係為咗換取下游能源市場的供應穩定,又正正係為咗避免大埔出現斷氣呢類影響民生的大鑊嘢發生,煤氣今次可以話多謝支聯會,因為「六四」燭光晚會入場人數破紀錄,佔盡報紙電視頭條,避過一場公關災難。

又公平啲講句,煤氣多年以嚟經營的溫馨體貼的企業形象,呢個時候亦大派用場,今次咁大鑊,都唔見太多針對煤氣的批評報道。倘若掉轉頭講,如果成個大埔或北角停電兩日,中電控股(0002)以及電能實業(0006),肯定被人鬧到狗血淋頭。

將煤氣拍埋恒基地產(0012)一齊睇,好難相信,兩間公司其實同一老闆同一個系統,由企業管治到形象公關,煤氣都贏恒基幾條街,俾人有更現代化、更用心的感覺。如果恒地賣樓,可以發揮煤氣公司千分一的「溫馨體貼」,香港人對發展商,相信亦唔會有咁大怨氣。

恒地主席李兆基同埋兩位公子,在煤氣董事局都只係非執行角色,恒地及煤氣之間企管及形象的反差,既反映專業管理,以及家族管理的分別,亦反映咗香港賣樓實在太易搵錢,唔當客仔係人,一樣大把人幫襯。

中電、電能實業近年成日話成本上升,攞住利潤管制協議,大條道理地加電費,反而利潤冇受類似商業合約保證的煤氣,今年講到明唔會加價。
至於去年,聽過煤氣職工會對加薪幅度不滿,醞釀罷工,即刻又傳出一年加兩次人工的新聞,今時今日一間香港企業,可以一年加兩次人工,順叔亦唔知去邊度搵。公司唔係咁賺錢,百年喜慶都唔會有著數益股東,今年煤氣成立150周年,又有紅股又話派17港仙特別股息,一間公司對客戶、對員工及對股東咁疏爽,亦可見到煤氣近年有幾好搵。

近年市場對在香港有穩定收入,在內地又衝得有聲有色的公司,例如恒隆地產(0101),特別有興趣,煤氣其實正正係一間基業穩在香港,並於北上發展迅速的公司,公司招牌所謂「中華」兩個字,以前名不符實,只集中香港,公用股形象太深入股民心,今年在內地業務愈做愈大,市盈率亦長期企在20倍樓上,已經廣被市場視為一隻「增長股」。

煤氣舊年純利增長一成,並已突破60億元,達61.4億元,冇乜物業發展的特別收益,息稅折舊攤銷前利潤,香港貢獻44億元,增長7%,內地業務貢獻29個億,增長36%,管理層講明,內地業務的盈利貢獻,今年將會超越香港,即係內地業務將繼續保持強勁增長,成為少數真正在內地搵到食的老牌港企。

下回再續,睇睇除港華燃氣(1083)之外,煤氣在內地仲搞緊乜。

關連文章:
1. 煤氣今天(上下)
2. 公用功用(上下)

2012年6月5日星期二

黑白濠江(下)

呢期都唔記得上回講到邊度,大約係現任特首越係臨尾越係香,攪到候任特首梁振英上京面聖時,兜口兜面訓示為政者要清廉,做人都要清廉。

老實講,中國共產黨話要搞反腐敗反貪污,大大話話都講咗23年,8964講到2012,日講夜講,阿水都知道冇乜說服力,政治錯誤永遠大於經濟罪行,每逢乜大物大換屆前後爭「坐館」,總會有幾單大案打一兩隻大老虎,直轄市、特區呢類「揸數」位置好似特別多誘惑特別容易出事,十八大有個薄熙來,十七大又有個陳良宇,深圳都唔記得有幾多個市長揩過嘢。

澳門終審法院,日前就前運輸工務司司長歐文龍案第三階段,審訊兼宣判,法官判詞提到,歐文龍涉貪金額巨大,亞洲「無人可比」,呢個涉及量化數字的判詞,唔知計到幾久遠的年代,例如計唔計前菲律賓總統馬可斯,或者一眾涉貪落馬未落馬的中國境內高官。

點都好,近排中港澳都刮起反貪風暴,例如歐文龍案,老實講,澳門司法程序,財經茄哩啡識條毛,不過問過人又查過資料,都冇人答到呢單複雜大案,究竟會分幾多個階段,月前忽然發現原來仲有第三階段,失驚無神,原來華人置業(0127)主席劉鑾雄等香港商人都涉案其中,唔知未來仲有冇第四階段,又會將乜人捲入呢個反貪漩渦。

農業銀行(1288)日前證實,資格最老的副行長、原本仕途無限的楊琨,「正協助中國有關部門的調查」,「有關部門」是否共產黨員最驚的中紀委、楊琨是否已經被「邊境控制」定係「去到邊境被控制」、開邊瓣,內地傳媒及網上好多唔同消息謠言,真真假假,大家可以自己查查。

不過由歐文龍到楊琨,案情都指向澳門濠江的黑白世界,已宣判及傳言中的罪名,都包括「洗錢」賭錢,又難怪近排澳門賭場好似冇咁興旺,大佬,當奴豪遊馬交出席賭場春茗,都俾人吊到張相,風頭火勢,咪話唔驚,唔好話澳門賭場,近排聽講連香港名店,內地豪客都少咗,門口的人龍好似都消失咗。

澳門賭金收入按年增長,上個月放緩到7個巴仙咁大把,聽講增長低於「市場預期」,財經茄哩啡可以好負責任咁講句,澳門賭金增長,除非分析員本身撈偏,又或者在馬交疊馬仔的黑道白道好有人脈,否則只係一個「估」字,冇話乜嘢「市場預期」,因為澳門除咗「賭錢」,最重要一項經濟活動,叫做「洗錢」,將身家由黑變白,得咗。

呢項活動太多唔同形式,涉及金額有幾大,唔知,不過聽講部分澳門賭業的中介機構,規模已經發展到,有需要去國際評級公司攞信貸評級,所以咪睇澳門賭場個資產負債表乾乾淨淨,得幾塊地幾間酒店,真正信貸風險,大部分去咗博彩中介人,呢個偏門世界甚少見光,攤晒出嚟,可能會見到唔少香港人熟悉的人名公司名添。

一間公司染藍成為恒指成份股,當然有其代表性,但往往亦預示咗有關公司甚至有關行業,增長即將放緩,金沙中國(1928)星期五正式成為香港藍籌,但係澳門同日宣布賭金收入跌至單位數字,如果只係巧合,咁中港澳打黑反貪,同濠賭股股價大幅調整,可能都只係咁啱。

核突啲講句,澳門賭業的增長,暫時睇,同中國政府的腐敗程度,差唔多成正比,唔好話宗教團體可能因為賭場染藍而杯葛盈富基金(2800),賭場先天係一個撈偏行業,今日大部分濠賭股仲係廿倍市盈率,唔熟悉澳門黑白世界的話,小賭怡情算了。

關連文章:
1. 黑白濠江(上下)
2. 濠賭馬交(上下)

伸延閱讀:
1. Economist: 十八大前賭錢洗錢熱潮

2012年6月4日星期一

毋忘六四


2012年6月4月,上證綜合指數,收市跌64.89點。
(圖片冇經過特別處理: http://www.etnet.com.hk/www/tc/stocks/indexes_china.php

2012年6月3日星期日

黑白濠江(上)

今期再開澳門。

未講濠江,先睇香港。早排香港特首選戰期間,現任特首被踢爆坐大孖沙私人飛機遊艇,豪遊澳門泰國,全港上下左中右塘邊鶴笑甩下巴,政要高官貪「小便宜」的縮骨精神,變成大家茶餘飯後的八卦笑料。

上星期審計署報告詳列當奴任內外訪的住宿安排,原來我們的特首,豪住總統套房成癮,當奴承認個人處事不當,被迫公開再說一次對不起,見到當奴多次雲浮外國的軌跡,仲有佢老人家在壓力下左邊鼻哥谷出嚟粒大孖瘡,可能好多人開始笑唔出。

當奴前任董建華,甚至前代港督的外訪,唔知道係咪個個都住總統套房,不過,如果呢個係港府慣例,特首辦應該晨早提出作為抗辯理由;當年董伯伯在國際上出名人面廣,回歸後亦有實際需要全地球唱好香港,但係建華八年,外訪次數少過當奴十次八次,當奴在任7年,離港外訪55次,上個月,新舊特首交接期間,好多事等佢拍板交涉之際,仲要嚟多次「畢業旅行」,無厘頭踏遍巴西新西蘭等南半球多國為香港查找商機,結果成為被踢爆多年來浪費公帑超豪外訪的伏筆。

有一個好簡單的疑問,大家可以思考一吓,假使閣下有咁上吓年紀,有空閒時間,都會選擇留在屋企攤抖吓,係咪?就算講明請你坐頭等客位甚至私人飛機,免費住宿總統套房,如果閣下已經見盡世面,龍床唔似狗竇,免得就免,唔會鐘意一年十次八次長途跋涉出差應酬,係咪?

近幾年全球金融市場風起雲湧,有傻強之稱的財經事務及庫務局局長陳家強,5年外訪43次四出收料,可以理解,不過作為一位68歲的花甲老坑,作為香港呢個壓力煲日理萬機的特首,曾蔭權仲咁有時間精力頻頻外訪,搲爆頭都諗唔到乜嘢特別理由,唯有九唔搭八咁猜度一吓。

特首可能係香港最冇人身自由的香港人,行出街有一堆鏡頭圍住,官方活動有一大班隨從,休假外遊要刊憲公告天下,斷估特首官邸的所有電話電郵通訊記錄都有留底,唔知係咪咁,當奴特別嚮往出國時候的自由空間,可能佢老人家住總統套房入骨成癮,不能自拔;當然,唔排除當奴真係為香港躹躬盡粹,唔放過任何在外地宣傳的機會;又或者,當奴在官邸太多雜物,驚住遲啲搬走唔夠地方,有需要透過特首外訪的貴貴貴賓通道,搬去境外的迷你倉咁。

講到總統套房,好多人即時聯想起酒池肉林式的窮奢極侈,幾豪幾華都好,都唔會舒服得過前港督府,絕大部份政要貴人,選擇總統套房,唔係貪奢華硬件,而係百分百的私密,仲有無微不至有凸的貼身服務。一間入流的酒店的總統套房,其中一個必備服務,就係一個24小時貼身服侍的管家,對於一個現代政客嚟講,一個政府耳目外的臨時管家,有時好使好用過一個多年心腹,舉個例,唔想俾下屬知道自己在外國有個迷仔倉擺放雜物,最好就係搵個臨時管家代勞啦。

做官做到越高位,越要俾人見到比白紙更白,正正就係要避免財經茄哩啡呢類事事評論員,得閒無事捕風捉影。之前講過,絕對權力先會絕對會滋生腐敗,香港特首從來冇絕對權力,萬大事應該有個譜,當奴在港為官四十載,廉潔應該成為體內血液的組成部份,順叔真心希望呢個係事實。

早排候任特首梁振英上京面聖,總理溫家寶兜口兜臉講,為政者要清廉,做人都要清廉,講俾邊個聽,唔知,不過舉目所見,北京上海重慶幾個重要直轄市,市委書記先後涉貪出事,香港錢銀出入更方便,一個人坐上高位後,眼界同時大開,忽然知道原來個世界咁玩法,多年貞節有所動搖,亦未可預料。

下回再續。

關連文章:
1. 黑白濠江(上下)
2. 濠賭馬交(上下)

伸延閱讀:
1. Economist: 十八大前賭錢洗錢熱潮