2011年5月27日星期五

轉型中移動(下)

(刊於2011年5月27日am730)

上回講到,電訊網絡數據用量爆炸性增長,電訊商不斷投入資金幫網絡升呢,不過無限上網唔可以無限收費,開支同收入越嚟越唔成正比,反而益咗社交網站等互聯網公司。中移動(941)唔甘心做「啞管道」,積極轉型打造新平台,將現實世界網絡基建壟斷性優勢,轉化到虛擬網絡。

中移動董事長王建宙,08年被軟庫老闆孫正義當頭棒喝,認識到蘋果真正Killer App唔係iPhone,而係App Store,開始急起直追,09年開始推出Mobile Market,近年中移動高層開始將MM掛喺咀角,聽聞MM下載量,更加成為地區主管KPI考核指標之一。

順叔仲用緊鴨寮街水貨諾基亞3310,MM得唔得,唔知,不過可以理解,中移動由OPhone到MM,都係老翻緊人哋策略,創意等如零。中移動要向移動互聯網轉型,王建宙喺新浪網訪問中講到明,最大挑戰,就係缺乏「互聯網瘋子」。

「創意」呢樣嘢,對中移動呢類國企,唔係人力資源問題,而係體制問題。

中移動年賺逾千億,幾年前肯定有居安未思危之嫌。Facebook請人,喺大學宿舍放幾台電腦,要班靚仔鬥快飲酒鬥快寫Program,Google有個Creative Lab畀班友仔齋吹水發白日夢,中移動係按省市縣鄉劃分行政級別,公司高層任命,同大型國企一樣,按黨齡論資排輩,一個咁體制,冇乜可能會出現一個無限創意嘅顛佬,假設中移動員工之中,有一個後生仔,有個賺錢諗頭,斷估第一件事係辭職自己開檔,搞兩三年拎去納斯達克上市公印公仔紙。

中移動做流動電視,入股鳳凰衛視(2008),做手機支付,又入股浦發銀行,由做創新業務到做併購,都滲透住呆頭呆腦作風,試吓想像,騰訊(700)股權相當分散,中移動如果早兩年同南非間NASPERS講掂數,又或者嚟過換股加現金槓桿收購,持股一成左右嘅馬化騰,其實做唔到乜嘢。唔係建議中移動好似微軟咁,近百億美金愈400倍市盈率買件Skype嚟玩,而係講緊中移動體制,唔容許天馬行空式企業動作出現。

正面睇,中移動夠晒穩陣,但冇創意之餘又太缺乏冒險精神,好難成功跨越式轉型。王建宙就快退休,最緊要安全著陸唔好臨尾香,可以想像新人事前,唔會有太新作風,大家可以留意,未來中移動會唔會出現行政架構上大手術,例如引入黨外甚至國外人才。

電訊互聯網新世代大戰,技術從來唔係問題,中移動亦大把現金彈藥,回歸國內上市,更加不得了,要重拾增長,可以話只係一「念」之間, 呢一「念」會唔會出現,幾時出現,好難講,好在股價已經跌到個位數字市盈率,又有4厘幾息墊底,冇大增長但亦冇乜可能倒退,買嚟守,等佢攻,風險有限。
伸延閱讀:
1. 新浪王建宙訪問
#

2011年5月26日星期四

轉型中移動(上)

(刊於2011年5月26日am730)
今期再開中移動(941)。

業績期後股東會,匯控(005)及中移動兩隻大笨象,管理層同樣命運,被股東兜口兜面質問,點解股價咁殘。兩間公司高層,亦拿拿臨四圍接受訪問,為公司策略解吓畫造吓勢。

中移動董事長王建宙,過去一兩個星期,中港兩地做咗唔少訪問,香港報紙兩個訪問,老實講,冇乜新意,未睇已經知道想講乜;新浪網《財經面對面》,有聲有畫有埋全文實錄,原汁原味睇到全球最大電訊公司話事人思路,香港傳媒呢樣嘢可能要學吓,透過記者消化完再反芻千零幾百字出嚟,唔夠立體,拉近唔到投資者同公司管理層距離。

王建宙喺新浪訪問講到,同美國蘋果公司老闆喬布斯見面,開過好多次電話會議,舊年2月仲喺紐約見過面,仲參觀咗曼哈頓58街間iPhone Store。王建宙斷言,「蘋果當然不會放棄中國移動有6億用戶這個市場」,07年已經開始傾引入iPhone,一直傾唔埋欄,因為中移動希望蘋果會支持TD-SCDMA,蘋果已經明確表示,到4G商業化時,會「全力支持」TD-LTE。言下之意,蘋果全iPhone生意做唔切,即使中移動有6億客仔,睬你都傻,4G時代先算。

中移動引入iPhone講唔掂數,只係同聯通(762)等行家較勁時暫輸一招,電訊新時代全球各路英雄大混戰,中移動完全搵唔到優勢先大鑊。王建宙提到,08年京奧開幕,同軟庫老闆孫正義打牙較,呢位日本首富同佢講, iPhone厲害,但更厲害的是App Store,王建宙如夢初醒,開始搞中移動自己App Store平台。

呢度帶出所有電訊公司一個大問題,資訊流量爆炸性增長,需要不斷投入資金幫網絡基建升呢,但係用戶用量收費,100M收200蚊,無限上網又係收200蚊,數據增長益咗社交網站等互聯網公司,中移動坐擁6億客仔,反而搾唔出乜嘢著數。呢個就係王建宙口中,中移動「越來越成為一個啞管道」原因,必需「轉型」,諗計增加非話音業務收入。

話音服務,目前佔中移動數入近7成,王建宙講到,最近同日本韓國等電訊行家開過會,想學吓人地,點解非話音服收入超過一半。

中移動非話音業務收入唔高,即係有好大增長空間,要開拓呢個市場,中移動大大話話已經講咗四五年,嚟嚟去去仲講緊乜嘢SMS、電話鈴聲下載,呢啲嘢連順叔都識,即係話已經OUT到爆,下回再續,睇睇巨無霸搞新意思,最大問題係乜。
伸延閱讀:
#