(刊於2011年6月10日am730)
上回講到，Prada(1913)作為一間全球化時裝企業，管理質素認真麻麻，香港招股，如果唔減價，往績市盈率，高達43倍，貴到冇朋友，當投資者係名媛闊太，又或者個個係揮金如土唔經大腦豪客。
講開PRADA，第一套諗起，唔係《穿著PRARA的惡魔》，而係《千王之王2000》，套戲最後一幕，張家輝買咗間珠寶店畀關秀媚，聲言寶石全部都係「Made in London… of the opera, to the sky, from the boys to men」，一句無厘頭英文對白，形容今日歐洲名牌，透過OEM代工，外判生產工序轉折流程，竟然出奇咁貼切。
Prada業績重上增長軌跡，賓架會同你講，近年新興市場億萬富豪多咗，藝術品到豪宅到奢侈消費，越賣越有，但唔少人忽略咗一個因素，就係好多時裝名牌開始放棄傳統，將生產外判，以「中國製造」成本，賣歐洲名牌價錢，如果間間公司堅持本地生產，利豐(0494)可以執粒。
至1月底年度，Prada做100蚊生意，賺你68蚊，09年毛利率仲係得58%，早幾年肯定更低。順叔出街有攜物需要，以前用背心膠袋，而家用環保袋，唔知Prada外判生產，對招牌長遠影響有幾大，不過問咗幾個港女，不約而同咁話，Prada賴以成名皮革手袋，感覺越嚟越唔矜貴。
「Made in Italy」，以前代表工藝質素保證， Prada近百年老店，以前好抗拒產地廉價形象，破壞名牌高檔感覺，上市要攤開盤數，不認還需認，舊年推出「Prada Made in」系列，索性將嘜頭改做「Made by Prada」。上市保薦人高盛，進一步同客仔倒米，研究報告透露，Prada已經將8成產品生產外判，喺初步上市文件，Prada亦承認大部分產品唔係意大利製造，五大外部生產商，包括一家「香港上市，為多個其他高檔時裝品牌設計、開發及生產鞋履的優質鞋履生產商」。
呢間香港上市公司，斷估就係九興控股(1836)，07年先上市，主力幫名牌鞋商做代工，之前唔少中外傳媒都踢爆過，九興工廠守衛森嚴神神秘秘，但鐵絲網後面生產線，收最低工資中國工人，做緊Prada皮鞋。九興最大客戶佔每年銷售近2成，可能以前Prada唔肯認，所以九興絕少提及呢個客仔，九興今年升咗近3成，往績市盈率只有16倍，只係百麗(1880)一半，做得名牌代工，功力唔會差得去邊，應該仲偷師唔少，甚至集各家大成，近年積極拓展自己品牌同零售點，如果要投資中國高檔消費熱，買九興，羸面高過Prada。
多年嚟大部分意大利時裝名牌，維持家族控制，甚至堅拒上市，唔係冇原因嘅，冇追求短期增長壓力，可以保持產品質素，最好係可以神神秘秘，保持疏離感扮上菜，Prada上市之後，日日有芬佬問你下年開幾多間分店，同店銷售又點，成本控制呢樣嗰樣，Prada第三代傳人，設計已經唔係特別出色，生產又外判，上市後經營壓力，必定迫使百年老店，同阿爺承傳手藝及傳統越行越遠，今次Prada超貴價上市，將會係呢間意大利傳統名牌，最後一次扮上菜。
關連文章:
1. 惡魔華裳（上）、（下）
