Best Blogger Tips

2010年11月19日星期五

消防警報(下)

(刊於2010年11月19日am730)

上回講到,中國消防(0445),下稱中消)盤生意,過去幾年,並冇跟大陸樓市同步增長,即係話概念靠唔住,就算出現消防設備搶購潮,未必代表中消會突然好景。

根據人民消防網數字,全中消企業,接近五千間,競爭激烈,中消個名夠晒巴閉,但全國唔知排老幾。中消亦冇乜嘢必殺產品,人人都要買,舉個例,如果上海要買一百部裝有百呎雲梯火燭車,斷估中消一定做唔出。

生意做唔大,亦可能同公司老闆心態有關。

中消02年上市,業務每年高速增長,05年高峰期,賺1.7億人民幣(下同),同年搵到美國聯合技術(下稱UTC)入股29%,UTC同時購入認股權,可以在08年3月起五年內,收購主席江雄持股,一次過增持到51%以上,到時會觸發全面收購,行使價EBIT減淨負債後8.5倍。

如果閣下係江雄,簽咗呢份協議之後,變相幫UTC打工,心態都可能唔同晒。最理想情況,做大間公司,谷大除稅除息前盈利,博高價套現,不過現實可能係, 掛住控制債務,反而令中消擴展業務縳手縳腳,作為少數上市消防企業,並冇利用資本優勢,壯大業務。

美國佬有意進軍中國市場,但人生路唔熟,打口釘落中消,認股權變紅蘿蔔,引誘激勵江雄做好間公司,一家便宜兩家著。由08年3月底開始,UTC已經可以行使認購權,中消業績,反而開始步入倒退期,09年第一次出現稅前虧損,今年頭半年,稅前溢利亦只得幾百萬,小投資者唔可以完全排除,管理層用資產折讓取代盈利增長,引誘UTC收購嘅可能,不過如果公司經營溢利大幅變差,收購價好極有限。

UTC押在中國風險投資,亦唔只中消呢一注,在08年底,獲商務部批准,入股全國龍頭南京消防,同年全面收購另一隻火燭股海灣控股,UTC早兩個月,入稟控告海灣控股前股東,索償1.8億,理由係原來93年起,海灣控股已經冇幫員工支付社會保障資金,會唔會影響UTC對中消信心,又係一個未知數。

至今年6月底,中消資產淨值13億,經過近兩日大升,市值衝過8億港元,仍有大幅折讓,睇落好筍,望真啲,有唔少嘢解唔通。08年底,公司現金7.9億,海嘯前後好多人等錢周轉,又咁啱, 09年底現金水平急降至1.67億,中消解釋,幾單大型系統工程,完工前唔會有進度金,要墊錢做生意,甚至要放低幾億保證金,今年頭半年收回部分款項,現金變番3.9億,但營業額又唔見突破,奇怪。

簡單結論,中消概念一流,不過生意惡做,UTC收購變數太多,平未必代表抵買,一間公司股價長期停留在海嘯價水平,自然有佢道理。

以上純粹推測,如有錯漏,請當消防警報誤鳴。

關連文章:
1. 消防警報(上)(下)
2. Greener Buildings, Redder Alarms

伸延閱讀:
1. 公安部: 保溫材料等諸多隱患造成上海火災慘劇(新浪轉載新華網)
2. 另一種泡沬,另一個警鐘,聚氨酯建材消防隱患,兩年前已在深圳發現...(新浪網)
3. 外牆保溫頻頻惹火(中國建築裝飾網)
4.《高層民用建築設計防火規範》(廈門消防網)

2010年11月18日星期四

消防警報(上)

(刊於2010年11月18日am730)




2009年2月
北京央視大廈
2010年11月
上海靜安住宅
2011年2月
瀋陽萬鑫酒店

天地為爐,萬物作銅,上海沖天大火,怨消防不力,不如怪人工影天氣辦公室,近年呼風喚雨,點解唔射幾十支氣象火箭上天,炸幾嚿雨雲落嚟救火。

所有特大傷亡事故,幾乎都係一連串意外及疏忽,不幸咁撞埋一齊,事前可以防範,但事發好難挽救。官方新華社話,火災由無證焊工違規施工引起,已經拉咗八條友。咪玩啦,而家最重要話俾全中國知,點解楝樓會燒得咁通,邊類型樓宇存在類相威脅,唔係拉幾個民工或判頭揹鑊。

大陸舊樓建築用料唔襟燒,絕對唔奇怪,但冇理由廿幾層樓,瞬間化為熔爐。根據網上視頻,現場小區其實有三楝公寓,都搭咗鷹架,據報做緊「節能保溫」外牆工程,以綠色圍網高度睇嚟,出事大廈工程進度最快,大火高溫,加上圍網著火四圍飛,隔離大廈竟然未被波及,可以大膽估計,之所以燒通頂,主要因為外牆新添加物料。

近年大陸大攪節能減排,地方政府為滿足規劃硬指標,推動建築物加上節能設施,成為其中一項熱門綠色投資。今次出事公寓,用咗乜嘢隔熱建材、有冇通過安全檢測、全國有幾多大廈用咗,官方應該都唔會再交待,年幾前,上海成楝河畔新樓冧咗落嚟,有冇聽過邊間發展商被釘牌?

做得快,多數有古怪,香港當年八萬五趕起樓,都出咗單短樁醜聞,大陸呢兩年全國大興土木,高速城鎮化背後,收埋幾多隱患,怕且要再過幾年先浮現,上海樓宇安全標準,斷估已經最國全嚴,最大商業城市都攪成咁,番大陸買樓,要認真小心。

上海住宅唔同山西煤礦,今次咁大鑊,唔知會唔會震動到官場同樓市(高層住宅及做咗同類節能工程樓宇多數受影響),不過好可能出現消防設備搶購潮,因為國務院在星期二,出到「國辦發明電」紅頭文件,明令全國展開火災隱患大排查、大整改,確保要買齊消防設備,做足防火措施,否則所尋政府官員揹鑊。

投資市場出名冷血,汶川地震會炒東方電氣(1072),上海大火炒中國消防(0445),兩日升近兩成。

中國消防,個名改得冇得頂(前稱萬友消防),不過全國加大消防投資,中國消防又未必一定生意大旺。大家可以諗諗,呢幾年中國建築業蓬勃,新樓處處,同住宅落成速度掛鈎嘅管道燃氣市場,出現爆炸性增長。新樓要駁喉供氣,同樣要添置消防設備,但係近幾年,中國消防盤生意,只係唔上唔落,甚至可以話越做越細,並冇同建築業同步增長。

下回再續,睇睇點解。

關連文章:
1. 消防警報(上)(下)

伸延閱讀:
1. 公安部: 保溫材料等諸多隱患造成上海火災慘劇(新浪轉載新華網)
2. 另一種泡沬,另一個警鐘,聚氨酯建材消防隱患,兩年前已在深圳發現...(新浪網)
3. 外牆保溫頻頻惹火(中國建築裝飾網)
4.《高層民用建築設計防火規範》(廈門消防網)