Best Blogger Tips

2012年9月28日星期五

乾溏小鴻海(下)



鴻海成個集團,包括香港上市的富士康國際(2038),有過百萬人幫老闆郭台銘打工,廉價勞工密集,好似出事的太原廠,閒閒地十萬八萬人,生產線的轉移往大陸,帶動內陸省市城填化,打公仔唔再需要穿州過省落深圳打工,有乜唔順超返鄉吓都容易啲,亦即係話,鴻海降低咗「生產成本」同時,新一批員工劈炮唔撈的「機會成本」亦大大降低,更容易拍拍屁股走人,更容易企起身反抗過度剝削,鴻海的生產大軍變得更唔穩定,管理更難。

近年大陸的勞工市場,每逢見到富士康或鴻海大舉請人,就知道美國蘋果好快有新型號出街,山西省傳媒今年3月已經報道過,鴻海攞咗愛瘋快的大單,即時要請2萬新工人,臨時拉伕,模式同香港建築業勞工供應的判頭制已經冇乜大分別,邊個有大單就大量請人搶人,周不時出現大量的勞動力缺口,好多時要出動到地方政府出面,層壓式要下面市縣級政府幫手請人,好似鴻海太原工廠,請咗大量山東及河南工人,更加容易因為地域主義出現「群眾事件」。

當然啦,「鴻海」及「富士康」兩牌招牌,多得之前的員工連環自殺,已經洗唔甩「血汗工廠」的味道,更成為勞工權益的最有影響力反面教材,新一批民工,講緊好多90後,唔似得上一輩咁任勞任怨任打任捱,鴻海等工廠老闆,如果掟錢唔夠毫,類似太原單一工廠的「群眾事件」,肯定陸續有來。

一部愛瘋快當賣5000蚊港紙,如果蘋果賺500蚊,鴻海可能只係賺5蚊,甚至更少,所以要用規模搭救,用錢掟工人會壓縮所剩無幾的毛利,過份壓窄生產力又會引爆社會或政治炸彈,一句到尾,就係一盤不可持續發展的生意,「代工」查實係已經落後的經濟發展模式,鬥胆正命平,亦係中國所謂「經濟轉型」最想擺脫的發展模式。

鴻海做代工做到最大,主要隨身個人電子物品,乜都袋,都有一個好處,最少唔使點擔心客仔的產品被市場淘汰,一雞死一雞鳴點都有生意做,不過富士康國際叫單飛,Nokia被蘋果及三星打到變豬頭,富士康國際亦冇得撈嗱,越嚟越乾溏,近幾年差唔多年年見紅,啱啱爆發騷亂的太原廠房,就係舊年賣俾鴻海,生產線繼續縮水,上個月公布半年成績表,又係蝕兩億幾美金,市值仲有200億港元,股價其實絕對未算殘。

鴻海成個集團,唔係冇賺錢能力,最近仲話大舉進軍光伏產業,執吓平貨,不過在系內分工分餅,面對最大轉型壓力的富士康國際,暫時仍然只係含住條豬頭骨, 最弊公司透明度接近零,年年都話「專注智能手機市場新客戶」,「研發投資實起作用」,大佬,阿水都話識得自制工業革命,究竟你想點啫?

富士康國際主席,唔係郭台銘,而係一個叫陳偉良的香港人,當年為咗Nokia呢個大客,全家搬咗去芬蘭,終於拎到大單,造就富士康國際2005年上市前後的幾年黃金時期,市值一度接近二千億港紙,幾年時間做咗一個「小鴻海」。

富士康國際上市之後,鴻海冇話點賣舊股套現,亦冇乜發行新股集資,最多因為行使認股權先出現股本變化,似乎富士康國際在鴻海集團的最重要角色,係要獎勵好似陳偉良呢類高層,對於母公司嚟講,好似可有可無咁, 陳偉良舊年唔再兼任行政總裁,新官程天縱上任,唔夠一年,早幾個月又劈炮,聽講因為本來想搞自己品牌,但大老闆郭台銘反對,結果要反枱。鴻海系管理過百萬工人已經一頭煙,系內高層的關係亦似乎今非昔比,挾在中間的富士康國際,越嚟越似一個孤兒仔,公司大幅提高透明度之前,投資價值接近零。

關連文章:
1. 乾溏小鴻海(上)(下)
2. 鴻海迷航(上)(下)

伸延閱讀:
1. 視頻: 郭台銘訪問(上集)|(下集)|(文字實錄)
2. 中國經營報: 河南巨額補貼助富士康招工
3. 商業周刊: 陳偉良兩年創造小鴻海

2012年9月27日星期四

乾溏小鴻海(上)



今期開富士康國際(2038),曾經何時被稱為「小鴻海」的香港藍籌。

家吓全球市值最大的公司,叫做蘋果,美國做愛瘋捱劈嗰間,市值盛惠6,300億美金,中石油(0857)中移動(0941)再加中國銀行(3988),三大巨型中字號巨企攬埋一齊,先有呢隻蘋果咁重磅,你話佢值唔值咁價都好,一個iPhone瘋靡全球,從此香港人搭地鐵要耷頭縮膊拗壞頸椎在所不惜,仲用緊Nokia乜叉乜零冇What’s App等如冇朋友,由Window到Google到iPhone,都係一個消費產品改變人類生活甚至生命模式,不得不配服美國佬的創新能力,中國唔想在第三次工業革命重演100年前命運,有排追。

蘋果最新產品,叫愛瘋快,蘋果新教主 Tim Cook在美國時間今個星期一,發表一份萬眾矚目的聲明,愛瘋快推出市場3日,第一批超過500萬部愛瘋快已經賣清光,佢又話正竭盡所能,務求令所有想愛瘋快的顧客,盡快一人有一部咁話,可能愛瘋教主勢估唔到,就喺呢個時候,蘋果最重要的iPhone代工其中一個大型生產基地,啱啱搞到一鑊泡要停產。

話說中國時間星期日晚,富士康國際母公司鴻海科技在山西太原的廠房,爆發大規模騷亂,據大家估估吓的數字,有2,000人扎馬,參與人數及傷亡數字,斷估冇乜人知道,不過根據官方傳媒講法,出動到5,000武警平亂恢復秩序,場面都應該好哄動,話佢係建國以來在單一企業爆發的最大規模「群眾事件」,都唔算過份。

出事之後,鴻海發言人話老闆郭台銘已經即飛到太原坐鎮善後,出事工廠唔負責組裝愛瘋快,唔會影響出貨咁話。攞棍扑,效率又點及得上用錢掟,聽講鴻海即刻派發加班費,工廠「放假」一天就恢復生產,繼續流水作業。

鴻海的生產線應該高度精細有效率,系內各公司點分工,資料披露就真係得「呸」一聲,就算富士康國際,相信冇乜邊個散戶講得出做乜,有意冇意間,保持神秘感,就好似佢老母鴻海的工廠咁,保安高度嚴密設防,工人進出都要搜勻全身,聽講被發現身藏任何金屬物料,即炒冇情講,避免好似蘋果呢類大客仔的商業機密外泄。

不過鴻海過百萬員工,請得咁多人,即係入職都唔會有乜嚴格要求,肯做步捱就得,所以斷估工廠裡面,永遠潛服咗唔少競爭對手派嚟的無間道,早幾年十幾個員工跳樓自殺之後,連勞工權益組織及國內傳媒都經常派臥底入鴻海或富士康工廠,污嘈嘢又變得好易曝光。

好似爆發騷亂的太原工廠,只係八月底,上海有份晚報就派咗個記者仔做臥底,踢爆太原工廠有份生產愛瘋快的后蓋,臥底記者被分派到的生產線,只係將手機蓋的音量孔用貼紙遮住,方便下一道的噴漆工序,工作細份簡單,但係做到冇停手,一日十粒鐘,一個人已經要處理3,000個愛瘋快組件咁話。

報道出街唔夠一個月,太原工廠即爆大鑊,鴻海話最新反日情緒高漲,部分後生仔將敵意發泄在同日本Sharp有密切生意來往的鴻海,不過大陸社交網站最流行的版本,講緊工廠保安在出事當晚,狂摳一個山東工人,激發山東幫老鄉還拖,搞吓搞吓,河南幫都加入戰團。富士康太原工廠接近8萬個工人,保安千幾二千個,做得工廠保安,多數都係本地人,即係山西幫,唔使問阿桂,成件事同中國特色的地方主義好大關係,同聲同氣的工人分幫分派,擦鎗走火好易變成「群眾事件」。

咁就帶出一個更大問題,好似鴻海呢類聘請大量廉價勞工的工廠,近年大舉北移內遷,已經改變咗流動人口的暗流,成個勞工市場結構改變晒,鴻海要在內陸複制又平又勞工密集的生產線,同時要面對全新的管理問題。

下回再續。

關連文章:
1. 乾溏小鴻海(上)(下)
2. 鴻海迷航(上)(下)

伸延閱讀:
1. 新聞晚報: 富士康太原廠臥底10日

Marriage Bounty



5個億,港紙,法官大人,呢件...

趙世曾把口唔收,口快快一句,變咗國際新聞,怕且條友呢世人都未試過咁出名,既然係咁,財經茄哩啡都唔爭在加把口,挑,5個億,精蟲佢都唔知出唔出到啦...

伸延閱讀:
1. 哈哈哈哈哈: Pray the Gay Away ?!愛瘋鴨...

2012年9月26日星期三

五毛不值

比亞迪
樂天虎

里昂呢位樂天虎,中文名夠晒猛,聽講係「亞洲最佳分析員」,整份報告,認為比亞迪(1211)5毛子都唔值。虎哥的論據,例如在「四年十萬里」有壞包換保養承諾之下,電動車賣1,000架,換電池成本幾球嘢,全部都係合情合理的,12個月目標價呢,都係嗰句,12個月內只要改一次,就永遠唔會錯,唔使咁認真,3年前,虎頭睇緊98蚊。

不過,份嘢既然在9月25日出街,就放上嚟做過記念,一兩年後再睇吓,有乜事會發生...

關連文章:
1. 飆凸你的夢(上)(中)(下)

伸延閱讀:
1. 下載: 虎哥報告
2. 思想花園: 比亞迪的國企病

忠奸中間人(下)

田生集團(0183)專門幫發展商起釘收樓,比傳統地產經紀收多兩個佣,不過如果用市盈率比較,美聯集團(1200)往績市盈率有24倍,田生集團得7倍鬆啲,或多或少反映咗收樓中間人呢盤生意,冇咁穩定。

田生集團業務模式夠晒獨特,做中間人好多嘢又唔可以講清楚,成盤帳簿就唔可以當係一隻典型地產股咁睇,好似去到舊年6月,手頭現金突然由2億幾(港元,下同)增加到超過7億銀,不過短期負債上面,同時有嚿「預提費用及其他應付款」,總值14個億,一個咁大嚿又咁生面口的項目,反而冇註腳解釋,純粹靠估的話,好可能係發展商預先科水俾田生地產做收舊樓的彈藥,當然啦,最後項目做唔成,亦唔代表田生需要坐貨。

田生集團從來唔會透露幫邊個做嘢,不過如果將佢網頁上面,近期及以前經手收買的項目的地段位置,同之後出現的樓盤對照一吓,就知道呢間舊樓收買佬同邊個最熟,舉個例,筲箕灣而家新地(0016)個譽都,即係iUniQ,就係田生幫手收返來,可見呢位中間人都拉到大客,至於佢收到發展商柯打先做嘢,定係收到七七八八四四六六先搵大孖沙兜售,就無從估計。

之前幾年香港樓價爆升,唔計2008年第4季至2009年第1季半年,坐咗貨可能嚇到鼻哥窿冇肉,不過田生集團既然有起釘收樓的能力,如果大膽少少,就算冇開發樓盤又唔識得發水秘笈,成個樓盤收咗強拍再轉賣俾地產商,賺物業差價而唔係收服務佣金,可能已經發咗,又用返iUniQ做例子,2008年新地收個盤返來,2億銀唔夠,舊年掟出街賣,聽過一炮沽清套現8個億,又即係話田生收樓夠晒薑,但係做生意唔係咁胆生毛,一次生兩次熟,如果意外,田生好可能會自己搞一個半個細盤玩吓。

查實全香港大小地產商,在強拍門檻降9成降至8成之後,好多人都打緊舊樓主意,同樣係舊樓收買佬,金朝陽集團(0878)斷估冇乜做收樓服務,唔係中間人,最多成個地盤賣出去當炒地皮,金朝陽本身做開地產發展,有一定專業知識及經驗,近年在港島舊區都做咗幾個重建項目,或者收樓手法比較正路,冇乜話聽到會在阿婆屋企對面掛幅巨型不知名畫咁得意,亦冇大地產商在背後做財力支持,所以項目唔算多,早排宣布同恒地(0012)聯手強拍大坑禮賢街重士街項目,唔知邊個佔大份,似乎係個個地產商鬥打釘起釘,撞埋一個盤就不如齊齊發展。

金朝陽本身亦有做商場寫字樓,例如銅鑼灣的金朝陽中心,雖然零售舖位唔多,不過勝在夠中心,對住九倉(0004)個時代廣場,至舊年底財政年度,金朝陽中心租金收入1.9億元,睇吓點計喇,粗粗地5厘,估值都有38個億,等如公司最新市值,在小型地產公司當中,算係一個被忽略的包租公,霎東街及耀華街項目完成之後,有可能好似早排的希慎(0014),估值提升幾格。

講到舊樓收買佬,唔可以唔提吓偉大的市區重建局,香港最大型的土地供應,唔計新界,就要數市區重建,即係話市建局查實手握最大的潛在樓面供應,不過政府做市區重建,阻力分分鐘仲大過發展商強拍,首先要顧及保育,保育對象包括實實在在的古跡及有時未必個個一樣的集體回憶,唔係樣樣話拆就拆,更高難度就係要自負盈虧,當自己係間地產公司咁營運,咁就出現咗好似前政務司司長唐英年所講,起埋晒啲「華而不實貴到無倫」的樓,亦好難扮演土地供應中間人的角色。

市建局真正的作用,查實應該係做一啲好似觀塘的超大型重建項目,令一個舊區改頭換面,市建局手腳慢,各大小地產商已經搶住做,搞到市區一楝二楝香雞型的蚊型樓,唔三唔四,增加市區重建的難度及可塑性,家陣香港任何土地規劃的吋步難行,開拓新界難,市區重建又難,世事冇咁完美,二擇其一的話,市建局睇怕要嚟多次大變身。

關連文章:
1. 忠奸中間人(上)(中)(下)

2012年9月25日星期二

忠奸中間人(中)



董建華在2005年腳痛唔做香港政長官,當年的律政司司長梁愛詩,冇幾耐亦都辭職,今日董伯伯成為中美溝通的橋樑,梁愛詩亦都唔執書,甚獲阿公信任,成日擔當中間人的角色,雞毛蒜皮至愛國家族內鬥爭家產,大至家國大事政制爭議,都見到兩位前朝高層的身影。

例如早兩年澳博(0880)老闆何鴻燊幾房人爭家產,香港到澳門街鬧到開巷,市傳就係梁愛詩出面做和事佬,幫手叫停爭燊家風波,早排霍英東家族爭產告上法庭,聽講就係董伯伯做調停人。2010年香港政改方案過唔到立法會,據民主黨講法,正正係梁愛詩做中間人,獲得阿公授權,負責將白鴿黨的信函及說話,轉達俾胡錦濤。

香港政壇「誰是中間人」的競猜遊戲,在3月特首選戰時的所謂「黑金飯局」亦玩過一次,不過單嘢唔係咁馨香,被人踢爆後分分鐘得不償失,所以到今日都冇人肯認頭,呢類「中間人」的存在,反映咗一個好簡單的道理,當一個人坐上某個位,好多嘢唔方便講唔方便做,甚至有實際需要使橫手,做啲踩界過界動作,例如在港人治港範圍內的香港政制發展指手劃腳,就需要「中間人」出面出手出口,政治世界係咁,金融世界更加係咁。

大孖沙要做單刁,好少直接搵對家傾,會搵個唔關事的中間人摸吓底,拉埋兩家坐底傾,金融世界查實好多呢類中間人或者中介人搵食,穿針引線,大家比較熟悉的,當然要數吓全國政協劉夢熊,夢熊大師從來冇掩飾自己全職中間人的身份,早十年八年活躍於買殼賣殼的中介活動,好似佢自己成日講,得意傑作包括在十幾年前,成功游說九倉(0004)老闆吳光正,賣甩寶福(0021,現稱「滙通天下」)及港通控股(0032)兩隻殼。

當年夢熊大師好似做過台資投行京華山一的顧問,通常在投行或外資基金的乜乜「顧問」,往往就係可以搭通天地線的中間人,可見在回歸冇耐的香港,好多人唔熟大陸政治生態人脈,夢熊大師搵到兩餐食,近年政治上越見高調,反而係作為中間人能量褐色的最大反證。

講到有啲嘢大孖沙唔方便做,要靠中間人提供中介服務的,查實有一大抽,部分仲上埋市,舊樓收購專家田生集團(0183)就係其中之一。收購舊樓起釘呢類粗重功夫,冇理由要藍籌地產公司出手,唔好講其他,假如小業主知道係恒地(0012)或者新世界發展(0017)對自己單位所在的地皮有興趣,多數會嗌高啲價,所以出面收購舊樓的中間人,多數唔會同你講背後老闆係邊個,要勞動田生地產呢類收樓專家。

田生集團原本叫做「全美國際」,做吓手袋零售咁,2007年田生地產借殼上市,成為香港「首間地盤併購重建的上市公司」,轉型做地產,2010年4月舊樓強拍門檻,由9成降至8成,正式實施之前,打釘及收樓活動已經因為政策風向轉趨活躍,田生集團越做越有,轉埋主板,最新市值13億元(港元,下同),最新目標係每年併購大約2,000至4,000個舊樓單位咁話。

至2011年6月底年度,田生集團完成咗23項大型併購項目,年內主要「竣工項目」之合約總額約89.8億元。既然係中間人,田生集團好多嘢唔可以講得太白,例如同邊間地產公司合作多,又或者收幾多個佣,不過可以透過年報的蛛絲馬跡,大概估計吓呢隻嘢的生意模式。

田生集團唔會真金白銀自己發展地產項目,近90億的所謂「竣工項目」,斷估係涉及收購舊樓物業的金額,根據年報資料,田生集團同期佣金收入3.57億,即係做100蚊買賣,大約收4蚊佣,普通地產經紀做中間人,買賣兩邊各收一個佣,都係物業買賣價的2%,即係田生地產的中間人服務,貴過普通地產經紀一倍左右。

下回再續。

關連文章:
1. 忠奸中間人(上)(中)(下)

2012年9月24日星期一

忠奸中間人(上)



今期開中間人,財經茄哩啡好耐冇關心過家國大事,今次由北京領導人的健康開始講起。

在民主國度,國家領導人健康關乎公眾利益,好多時會第一時間公開,但在中國仍然被視為國家機密,唔可以隨便講。話說中國副主席習近平,早排失驚無神唔見咗人,消失於官方公開活動差唔多兩個星期,連原先安排咗同美國國務卿希拉利大嬸的會面都失場。

習近平被視為中國兼中共領導接班人,習總變摺變,全地球自然打鑼咁搵佢,謠言四起,由踢波跌親到心臟病發到中伏被人行刺,都有人傳過,最接近官方最權威的解釋,來自前香港行政長官、現任政協副主席董建華。

董伯伯上星期突然接受美國電視訪問,牌面講中日關係,唔知預先有默契定係刻意臨時爆肚,主持人臨尾問董伯伯習總點解唔見人,董伯伯透露,習總做運動時受傷(He hurt himself in sports),背脊有事(He has a back… back problem),主持人再問多句,董伯伯就話習總應該係游水時整親(I believe it’s swimming)。

講緊家吓十八大勝利召開密鑼緊鼓,釣魚島中日關係劍拔弩張,習總在黨國均處極敏感時刻忽然失踪,唔見人的官方原因又係咁蝦碌,可能好多老外的難以置信。

不過呢,中共領導人的公開活動,唔可以隨便攞嚟講笑;中共領導人在敏感時刻的游水活動,更加唔可以隨便攞嚟講笑,位列國家領導人之一的董伯伯,應該好明白呢個道理。

可能中共領導慣咗在北載河集體講數,所以游水一直係北京坐館的傳統強項,在敏感時刻領導人水著出場游吓水,好多時更係展露政治肌肉的重要場口,好似1966年七張幾嘢橫渡長江的老毛澤東,就係北京坐館的經典游水活動,其後1989年夏天在北載河每日游一粒鍾的鄧小平,以至幾乎去到邊游到邊死海游到夏威夷的江澤民,每次公開游水活動都唔講得笑,在呢個「游水政治」的傳統下,現任坐館胡錦濤,任內寧願去日本大戰福原愛,但從未試過以水著出場,亦自然成為外國觀察家分析一大餐的現象。

習總今年被去美國,接受華盛頓郵報書面訪問的時候,曾經講過佢好鐘意運動,最鍾意就係游泳,斷估泳術有翻咁上吓,在敏感時期,做自己兼北京坐館最耍家的運動整親,無論係論盡拉親,定係跣咗一鑊撻親肉背,都咪話唔邪。

董伯伯腳痛之後升做政協副主席,位高權輕,過去7年極少評論港事國是,今次接受美國傳媒訪問講中日關係,好正路,臨尾為習總失踪謎底開估,已經夠震撼,更震撼一點,係冇迴避主持人有關北京最高權力交接的問題,董伯伯好斬釘截鐵咁話,習近平毫無疑問可以順叔接班,主持人問到佢胡錦濤會唔會保持軍權一段時間,董伯伯竟然有照答,就連自己都並不知情,但根據以往做法,胡錦濤可能保留軍權一段時間。

董伯伯近年最重要的角色,好似佢間「中美交流基金會」咁,作為中美之間商界及半官方接觸交流的橋樑,亦即係中間人,致力利用自己人脈,促進中美關係,好似今年初習總訪問美國,就係董伯伯帶佢去遊花園四圍打招呼。

一個成功的中間人,如果諗住長做長有而唔係一舖大茶飯之後鬆人,絕大多數時候,會好珍惜自己的信譽,董伯伯講到胡錦濤會唔會保留軍權一段時間,有關「裸退」的高度敏感話題,如果最後係流料,以後都好難在美國政商兩界行走,如果係堅料,又可以證明董伯伯同新任北京坐館關係非比尋常,熟到可以做代言人到美國發言,幫手澄清謠言。

不過聽講十八大好快開波,董伯伯及其背後條水有幾堅,應該好快開估,唔使估估吓,下回再續。

關連文章:
1. 忠奸中間人(上)(中)(下)
2. Brokeback Curtain