Best Blogger Tips

2010年12月10日星期五

十萬億火急(下)

(刊於2010年12月10日am730)

上回講到,內地官方喉舌,患上熱錢敏感症,11月12日內地小股災,人民日報瀨國際投資銀行出口術,中央電視台《經濟半小時》,本來做做吓直擊G20系列,失驚無神痛擊香港,關注對沖基金屯兵積糧,密謀大舉侵華。

中銀香港(2388)研究員黃少明,隨口噏咗熱錢十萬億個數,攪到滿城風雨,不過茶杯風波,對中銀嚟講,真正十萬億火急,其實係人民幣清算額度突然爆煲。

香港係中國唯一離岸人民幣結算中心,中銀又係香港唯一人民幣清算行,同上海外匯交易中心,今年貿易結算有個80億 (人民幣,下同)兌換配額,到9月,仍然剩一半,但十月未完,另一半額度未夠一個月用盡,即係唔可以結匯,如果唔係金管局同人民銀行有個貨幣互換安排,借調100億人仔應急,十月底可能在香港銀行暢唔到人仔。

金管局踢爆事件後,銀行界消息人士,突然蒲晒出嚟,中港兩地通街毒箭,主流講法,話九至十月期間,人仔結算貿易,並冇特別增幅,清算行兌換配額等然爆標,有人借貿易之名,行炒賣之實,令中央大感不滿云云,撞啱內地官方喉舌熱錢敏感症爆發,又撞啱金管局帶隊訪京,增爭增加人仔結算額度,中銀鏹水洗都唔清。

如果香港只批准一間地產商起發水樓,大家可以估吓,其他大孖沙會點反應,中央獨厚中銀,做獨市清算生意,人仔個餅又越嚟越大,其他銀行表面上粒聲冇出,大家又可以估吓,背後做咗幾多嘢。

中銀管理第幾流,大家心中有數,但斷估唔會蠢到,殺隻會生金蛋嘅雞,攞對腳做鳳爪,單嘢背後有冇大行高人發功,得個估字,但個勢已經做咗出嚟,香港金融界,共乎已經出現共識,齊齊合奏清算行獨市風險太大,一係多幾間做,一係金管局做。

港銀人仔業務,涉及眾多外匯管制法規,普通人好難明白攪緊乜,斷估全香港有接近700百萬人(包括順叔),結算同清算分別係乜都唔知,中銀從來冇解釋有關業務點運作,又冇拆條細數出嚟,母公司中國銀行(3988),年報有條「結算與清算手續費」,09年收入75億,65億來自國內,當中10億差別,或多或少,可以反映中銀呢盤獨市生意,有幾好賺。

人民日報含沙射影,嫌疑犯高盛即刻對號入座,借啲意開個記者會公開解話,咁先係波,中銀除非自己身有屎,否則當係危機處理又好,投資者教育又好,都係時候出嚟為自己盤獨市生意解吓畫(最好搵埋黃少明出嚟講熱錢)。作為香港清算行,可以睇晒所有行家人仔盤路,香港銀行人仔盤越坐越大,斷估中銀呢盤生意,唔會獨市得好耐,不過霸得一時得一時,好過坐以待弊任人砌。

關連文章:
1. 十萬億火急(上)(下)

伸延閱讀:
1. 人民日報: 要打擊操控市場的國際資本大鱷

2010年12月9日星期四

十萬億火急(上)

(刊於2010年12月9日am730)


熱錢十萬億點嚟?

今期開熱錢。

月初番到香港,周街講緊咩嘢十萬億熱錢囤港,以為所謂貨幣戰爭已經開拖,仲上演到諾曼第登陸戰。香港要谷大人民幣離岸水池,失驚無神,變咗熱錢侵華橋頭堡。

引發風波源頭,中央電視台《經濟半小時》,早在11月12日播出,不過唔知道適逢金融局加銀行公會訪京,內地傳媒借勢翻叮,定係香港傳媒,睇完重播以為中央唔妥香港,總之連續幾日,個個好認真咁討論十萬億,焗住香港高官齊齊撲出嚟解畫。

嗰排《經濟半小時》,連續幾日,做緊個「直擊G20」系列,去到11月12日,忽然變咗「直擊G20之熱錢屯兵香港」,仲無厘頭過「柴九之九姑娘」,內容主要話索羅斯等國際炒家及對沖基金,紛紛香港開舖,虎視眈眈內地資產市場云云,裡面訪問咗中銀高級研究員黃少明,叫佢估計吓熱錢數量。黃生首先假設美國大量印銀紙,可能令舊年6000億熱錢湧入香港情況,歷史重演,加埋對沖基金引入資金,就噏咗十萬億呢個數出嚟。

舊年金管局話6000億湧入香港,講緊08年底至舊年10月,銀行體系結餘加埋外匯基金票據淨增長,當中唔少應該唔係熱錢,而係貪香港有存款保障嘅細膽錢,銀行體系結餘,已經由舊年底三千幾億,回落近一半,近半年一直持平。黃少明用6000億呢個數做基礎,加加埋埋,合理推斷,應該係一萬億,點解加多咗個零出嚟,變咗十萬億,要問番佢自己,不過與其隨口噏當秘笈,不如問吓點解單嘢在內地炒得咁大,又反映咗乜嘢心態。

心水清者,應該記得,在11月12日,內地股市急跌超過半成,好有理由相信,《經濟半小時》有關負責人,臨急臨忙,開咗隻做定咗嘅罐頭應節,將小股災同國際大鱷拉埋一齊無限聯想,結果直擊G20,變咗痛擊香港。

今個月初,人民日報一連三日,大大篇幅評論中國股市未來廿年路向,又咁啱,又特別提到,11月12日,一間幾日前積極看好中國股市「某國際知名投資銀行」,向客戶發出沽售中國股票電郵,「翻手為雲覆手為雨有操控股指謀利之嫌」,高盛已經對號入座,公開大大聲話唔關佢事。

中國財金大員,今日由樓價到菜價都要管,有冇時間理埋中央台人民日報講乜,好大疑問,對沖基金香港開檔話人哋對內地市場不懷好意(炒港幣同人民幣掛鈎其實更加有得諗),投行唱淡H股又話人哋A股期指上下其手,論斷其實相當天真,財金大員如果咁水平,中國經濟都幾牙煙,但合理推斷,美國開閘放洪,中國已經擺好陣勢落閘放狗,大家如果有A股老鼠倉,咪貪方便喺香港上網落盤,喺找換店打錢番大陸, 又咪以為好似銀行服務咁安全,大陸落閘抗洪,大動作未必會做,打吓老鼠倉,甚至做低三兩間地下錢莊,絕對有可能,亦會為股市帶嚟陣痛。

下回再續。

關連文章:
1. 十萬億火急(上)(下)

伸延閱讀:
1. 人民日報: 要打擊操控市場的國際資本大鱷

電視風雲(上)

(刊於2010年12月2日am730)


今期開電視。

後知後覺,啱啱睇鬼佬雜誌,先知道在英國極受歡近嘅《Britain’s Got Talent》,已經移稙中國,融合英文日文中文,叫《中國達人秀》,青年劉偉,自幼失去雙臂,自學用腳趾彈鋼琴,技驚全國,賺人熱淚,眾望所歸取得冠軍。

中國地方電視台,近年亦好興真人秀,但亦搞咗唔少大頭佛,例如早年《超級女聲》,搞到廣電總局,通令全國禁止再全國網上或短訊投票,《非誠勿擾》,有條中女,又爆咗句刺痛全國仇富神經嘅「寧在寶馬哭不坐男友單車笑」,搞到要換主持,劉偉斷臂鋼琴師嘅故事,夠勵志又啱廣電總局胃口,節目叫好叫座,收視破晒記錄。

大陸電視市場發展快,節目需求大,頻道多內容少,有渠冇水,加上廣電總局呢樣唔準嗰樣唔準,《畫皮》都只可以係妖唔係鬼,成日顧住唔好踩地雷,創意空間大極有限,好似上海衛視買版權做《中國達人秀》咁,入口外國節目,可能越嚟越普遍。

外國電視內容,唔係樣樣啱中國人口味,呢方面,由香港上市電視台到節目製作人,其實有好大發展空間,尤其係華南廣府話地帶,聽講唔少人電話鈴聲,仲用緊中坑集體回憶《天蠶變》主題曲,可見香港文化仲有一定市場,唔好話天王巨星賺人仔賺到手軟,三四線過氣藝人甚至講波佬,在大陸都搵到飯食。

從呢個角度睇,在香港電視市場擁有近壟斷地位嘅電視廣播(511),如果話你知,內地業務在09年,營業額只有1.8億(港元,下同),佔公司收入唔夠半成,仲少過內容賣埠馬六甲,實在講唔過去,無記在內地一年盈利,分分鐘可能少過謝霆鋒,開拓內地業務唔夠積極,唔知係冇人,定係冇創意。

當然啦,一間公司43歲,六叔103歲,又好難要求間公司有幾進取,喺香港幾乎零競爭,就算好似影音工廠咁,日復一日年復一年,用埋同一班人,拍賣啲換湯唔換藥嘅連續劇,已經足夠麻醉八成市場。無記製作,在內地唔係冇人睇,不過網上老翻太多,唔係咁多電視台肯出錢買內容。

上個月,廣電總局出咗一系列新例,嚴打影片分享網站侵權內容,仲搵咗幾間細雞公司祭旗,內地幾個熱門影片分享網站,都未上市,如果要上市,尤其係去海外市場掛牌,第一件事就係要清理門戶,大家可以留意吓,未來香港電視台,會唔會直接賣內容俾內地網站,分得幾多唔知,但最少係條新財路。

下回再續,睇睇除咗內地市場,無記仲有乜嘢資產未用盡。

關連文章:
1. 電視風雲(上)(下)