(刊於2011年1月7日am730)
上回講到，唔可以當比亞迪(1211)係車股，因為股神中美能源入股之後，出現策略突變，多咗瓣新能源業務，電池技術唔再局限造電動車，攪埋太陽能電池同埋儲能電站。
泊得股神碼頭，最大作用，就係全球免費宣傳。舊年3月，Mercedes-Benz搵拍檔做電動車，如果唔係股神信心一票，斷估唔會咁快輪到比亞迪，比亞迪汽車，中價國貨，喺唔少大陸富豪甚至中產白鴿眼中，唔算入流，拍住平治，未來電動車產品，可能可以當靚車咁賣。
比亞迪品牌升呢，多咗知名生意拍檔，有唔少更加係股神帶脅，同巴郡及中美能源旗下公司合作。舊年7月，比亞迪宣布，同KB Home合作，喺美國高度強調綠化嘅城市Lancaster，合作起環保住宅，可以想像，一間未來KB Home綠屋，屋頂會有比亞迪太陽能面板，屋裡面有比亞迪LED照明，車房有架比亞迪E6，當然唔少得儲能電池。
比亞迪在美國業務加速，舊年9月，王傳福喺深圳特區30週年慶典威威完之後，比亞迪跟深圳官方訪問團去咗洛杉磯，同市水電局簽咗個儲能電網合作項目(類似項目比亞迪同南方電網及湖南省電力公司都做緊)，11月，更加喺洛杉磯成為北美總部，阿諾舒華辛力加去到參觀，發現比亞迪展品，除咗電動力，仲有一大抽太陽能電池、LED照明等垃垃雜雜。
咁多新攪作，即係比亞迪燒起咗唔少火頭，公司09年底員工數目已經超過16000人，分公司由日本南韓開到印度羅馬尼亞，管理層能唔能夠掌握迅速擴展新業務，其實係一大問題，股神買花好叻讚花香，勁讚王傳福係愛迪生同Jack Welch混合體，但王傳福諗頭太多，掛名主席兼總裁，實際撈埋總工程師，可能要有三頭六臂，先可以各樣兼顧，比亞迪做細細粒手機電池起家，今日做緊會行會走巴士私家車，自主創新能力無須置疑，但舊年汽車銷售甩轆，可能係公司企管能力備受高壓表現。
比亞迪新能源業務三大瓣，一項成功已經商機無限，大三元就不得了，現價基本反映市場當比亞迪係車股，再加幾錢股神溢價，市盈率十零廿倍，其他新能源概念股，例如龍源(916)，市盈率閒閒地廿零三十倍。
科研技術領先，公司管理得法，產品如果未夠成熟商業化，亦唔會有錢賺，比亞迪舊年咁多項新能源新攪作，極可能只係試票様板項目，多數唔會太好賺，前景講到無限好，幾時收成冇人知。當比亞迪係新能源股咁投資，或多或少，要好似BYD個招牌咁，帶少少浪漫夢想，不過都係嗰句，有股神照住，開到口話可能一世唔賣(出爾反爾就大鑊)，發惡夢機會唔係太大。
伸延閱讀:
1. 楓葉資料室: 比亞迪的宏大夢想
2. 看好比亞迪的原因
#
