2010年9月17日星期五

王子壞孩子(下)

(刊於2010年9月17日am730)

上回講到,中國體操王子同香港股壇壞孩子埋堆,李寧有限公司(2331)主席李寧,反向馮永洋控制嘅快意節能(8032),透過中國第一體育品牌公司盈利,將創業板公司升呢,平過直接在主板買殼,慳番幾億,可能成為創業板公司變身新模式。

相對其他耍財技扮財星其實係財演嘅股壇老千,馮永洋其實唔係太壞,當年策動一仙收購中華汽車(0026),甚至帶幾分正氣,伯爺禡景禧個名太響,形象玩世不恭,可以溝淡當年今日的記憶,間唔中整單創意奇刁,又可以證明,壞孩子都有股壇教父遺風,實力依然。

體操王子今年47歲,有排未退休,公司揹住自己個名,靠李寧品牌開飯,寧叔可能係全中國十三億人當中,最緊張自己形象及名聲一個,寧叔收隻殼番嚟玩,只係因為公司唔使自己落手落腳,有時間精力做其他嘢。當年為國爭光,今日為國產品牌揚名,絕對有理由相信,體操王子唔會輕易學壞,存心老千小股東,劃花自己多年辛苦建立貞節牌坊。

不過出得嚟行,好多嘢,預計唔到。

快意節能變身非凡中國,股價暴升十倍,帳面上,買賣雙方都大賺特賺,不過,唔好忘記,股壇壞孩子押在枱面,只係一隻殼,寧叔押上者,包括自己名聲,一個有形有價,一個無形無價;一個出豉油,一個出豬。

除咗收購李寧近31%股權,快意節能同時向獨主第三方,收購咗間大陸體育中介公司,同埋瀋陽地產項目,作價分別4億及7億(港元、下同)。至星期四收市,李寧市值大約250億,快意節能所收購近31%股份,大約值78億,但快意節能本身市值,超過131億,即係話,市場唔少人覺得,體操王子個招牌,做埋運動員經理人,撈埋地產,值五十幾億。

中國體育服飾品牌未掂,主要原因,係體育事業為意識形態服務,未夠商業化,寧叔進運體育中介,幫手包裝國產體壇明星,仲可以話為咗李寧進一步發展開路,不過染指地產,就算真心發展體育設施,就難以洗脫銅臭,生態城體育城,同當年數碼興港舊橋,分別唔大。

李寧體育服飾,唔夠外國品牌靚,又唔夠本地對手平,不過就算做唔掂,股價唔得,冇人會怪寧叔,中國消費者,甚至可能會反省,自己夠唔夠愛國;非凡中國出事,累跟風股民蝕錢,體操王子,隨時千夫所指。

搵快錢,人人都想,打造國際品牌,要千錘百鍊,唔少人真心希望李寧成功,多一事,不如少一事。

關連文章:
1. 王子壞孩子(上)(下)

王子壞孩子(上)

(刊於2010年9月16日am730)

今期講吓,體操王子與股壇壞孩子的故事。

好耐好耐以前,有間公司,叫大中華科技,老闆鄭潔賢係中大校董,二千年上市,網上賣中藥,招股價1.38元,兩嘢變仙股,03年帳目出問題,停牌兩年,一毫幾仙間浮沉。

小股東望上帝打救,08年望咗個魔鬼冧吧,禹銘(0666)主席,股壇壞孩子禡永洋同老死馮耀輝,透過私人公司,大約8000萬(港元,下同),每股7仙左右,收咗大中華科技隻殼嚟玩,舊年,收購個「表面係冷氣機實則係暖水壺」嘅環保節能業務,變身快意節能(8032)

今年4月,真命天子出現,唔講得笑,李寧(2331)主席李寧(下稱寧叔以作識別),真金白銀入股,上個月,收購埋李寧三成股權,反向全面收購,變身中國第一體育品牌控股公司,即將改名非凡中國,可能撈埋寧叔私人地產及體育業務,一度爆上近一蚊。

由賣藥到冷氣機到體育,十年嚟,間公司一毫子都未賺過,幾經滄桑,當年大中華科技股東,守到而家,叫做可以收番多少成本,但唔係咁多創業板公司,有咁傳奇經歷。

創業板成立超過十年,上市公司數目,由超過二百間,跌到上個月172間,每日平均成交額只有三億多啲,一個第二板市場,搞到咁失敗,其實係高樓價扼殺香港創意最有力證明,冇任何創業公司,頂得順香港舖租,大陸新興企業,而家可以幫襯深圳創業板,香港創業板,已經冇存在必要。港交所(0388)立場好明顯,由得佢自然陰乾,幾乎趕絕所有新上市申請之餘,亦鬆章俾乎合主板資格公司升呢,所以上市公司數目越嚟越少。

主板殼價,聽講已經炒到過五億,創業板殼價近年拉高咗,但最少平一大截。快意節能收購李寧,創業板公司控股主板公司,記憶中,應該係破天荒第一次,李寧盈利入數之後,快意節能好快可以升呢上主板,寧叔可以慳番幾億,先例一開,話唔定連A股上市民企都有樣學樣,嚟香港曲線收隻主板殼做嘢,進一步拉近兩個市場殼價,近排唔少創業板公司,失驚無神炒鑊金,就係咁解。

馮兩老搵到寧叔落搭買殼,難過發掘中山愛迪生,抵佢哋賺鋪勁,不過堂堂中國體操王子,同香港股壇壞孩子埋堆,配搭太離奇,投資者齊搲頭,一時睇唔通透,信心打折扣,交易公布之後,李寧股價一直受壓。

下回再續,睇睇李寧系兩間公司有乜搞作。

關連文章:
1. 王子壞孩子(上)(下)