次輪好戲（下）

先嚟一個同場加映，各位觀眾:

ICAC大踢爆: 許仕仁監制幕後大戲

上回講到，幾個當年幫行政長官曾蔭權上位兼冧庄的人，除咗永遠「兩袖清風」的肥龍許仕仁，其他核心人物，好似東亞(0023)李國寶、金管局總裁陳德霖，政界商場都出現突破性發展。

權力遊戲遊戲幾精采都好，局外人，要過一段時間，等所有人事起跌沉澱一下，先可以睇到大概輪廓，㷫烚烚當時，好多嘢會忽略咗。舉個例，香港今日仲有好多人相信，03年七一遊行，係導致董建華的原因，忘記咗，香港上一輪權力集團的更替，董落曾上，戰況有幾激烈。

03年50萬人七一遊行，董建華都未覺腳痛，仲可以「自由行」加「屍爬」(CEPA)，香港經濟甚至有啲起色，但係2004年聖誕節之前，房委會分柝領匯(0823)撻Q，就成為老董背上最後一根稻草，兩三個月就腳痛。司法覆核挑戰領匯上市這一役，除咗要爛熟相關法律知識，仲要精通政府行政程序，「出錢」兼出力的「靈魂」人物，正正是啱啱在商台被封咪的名咀鄭經瀚。

當年商台續牌跟名咀封咪，發生時間出奇地巧合，唔使問阿桂，背後有人刻意無意間，將兩者拉埋一齊，例如縮短牌照年期作威脅，不過，呢兩件事，同香港上一輪權力之巔的拗手瓜，發生時間亦出奇地巧合。言論自由唔單止係香港價值，亦係普世價值，最重要係，攞住支咪嗰個，為咩人發聲，劃公仔劃出腸就太核突，發動政變的時候，搵軍隊控制電台電視台，其實亦係對新聞自由的終極干預。

共產黨雖然在中國一黨專政，但唔喺香港「存在」；選舉法其中一個最荒謬設計，行政長官唔可以有政黨背景，所以香港權力之巔，唔會有政黨更替，只有權力集團爭櫈仔，捧咗一個代理人做行政長官，身邊人以後好辦事，當然，亦要講本身有冇牙力，例如在05年之後，東亞在內地發展迅速，內地銀行盈利增長平均40%，但東亞純利舊年冇增長，冇獨立帳目，亦睇唔到東亞發展內地業務揹多咗咩風險，東亞主席李國寶，如果呢期做唔到「造王者」，兩位公子就要爭氣啲，未來五年做靚盤數，避免黃雀在後成為被狙擊目標。

今期特首選舉，押注落梁振英的大孖沙，最初為數不多，最中堅份子，就係恒隆(0101)主席陳啟宗，無獨有偶，恒隆策略同東亞一樣，在內地晒泠，如果梁振英跑出，以「首席政治官」(Chief Political Office)自居的陳啟宗，最低限度，可以比以前更牙擦，吔文吔武。

當然啦，次輪好戲，又點會少得新地(0016)。

準確時間已經唔記得，大約9月左右，梁營搞咗個「富豪夜宴」，地產同銀行大孖沙，幾乎冇人俾臉出席，只有兩個主人家，一個係陳啟宗，一個就係新地前主席郭炳湘，之前財經茄哩啡講過，特首選舉之後，可能到新地有新戲上演，估唔到咁快今個星期已經開畫。

新地日前宣布，開國功臣兼執行董事陳鉅源，被廉政公署拘留，請留意，係「拘留」，懷疑涉及觸犯防止賄賂條例，呢種事情，同埋講到咁白的通告，好少在大型藍籌身上發生，廉政公署做嘢原來咁快手，一個星期都唔等得，要在特首選舉前做嘢，香港，原來仲有ICAC。

郭氏三兄弟，一個挺梁，兩位細佬撐唐，今次選情激烈，唔知有冇人需要轉軚，從正面角度睇，可能成為新地管理層，重新一團和氣的「導火線」都唔定呢。

講咗咁多，其實都係因為今期行政長官選舉太熱鬧，吹吓水，大家聽吓就算，今過呢，今次頭場大戲已經咁大龍鳳，次輪好戲，應該唔會好似05年嗰劑咁收收埋埋，好多嘢會即時浮上面，好簡單，9月又立法會選舉，大家擔定櫈仔，繼續睇好戲。


關連文章：
1. 次輪好戲（上）｜（下）

伸延閱讀：
1. 財經茄哩啡: 新地之料(外篇)
2. 壹周刊: 新地太子復仇記
3. 蘋果日報: 許仕仁住新地樓手尾長
4. 東方日報: 許仕仁否認受查傳聞

次輪好戲（上）

香港政壇近排太多大戲，仲要套套咁精采，搞到順叔事事評論員上身，差啲忘記咗作為財經茄哩啡的老本行，業績期都冇時間望到幾多張成績表，乾溏，冇貨交，今期唯有半政半經，圍住行政長官選舉呢個權力遊戲，睇睇周邊有乜人和事，吹吓水炒吓雜錦。

溫故知新，講吓現任特首，在商界好多朋友的曾蔭權先。當奴選過兩次特首，05年嗰次，董建華腳痛，當奴開心到吹口哨，自動當選，攝位做埋老董餘下兩年任期，07年競選連任，對手得條袋巾梁家傑，冇醜聞冇得打，悶到抽筋下喊住繼打呢份工。

雖然連選兩屆無驚無險，但係幫當奴出錢出計，擔擔抬抬都總會有著數，例如陳德霖咁，金管局出名高薪厚職兼唔使做，05年竟然劈炮，唔做副總裁，幫當奴助選，跟住幫渣打(2888)打吓工，搞吓「智經」智囊，又做吓特首辦大內總管，當奴成功冧庄，攞命陳修成正果強勢回朝，09年坐正國金頂樓金融雲端。

攞命陳「中年靜修」，05至09年離開金管局呢個白鴿轉，進退認真精采，如果唔係，任志剛可能到現家都未退休，打破埋聯儲局前主席格林斯潘，成為任期最長的「中央銀行家」。任總做足16年，攞命陳人工冇咁高，更加有5年任期，香港改朝換代，2013年，唔知到時聯繫匯率仲喺唔喺度，金管局又使唔使再執位。

大家仲記唔得許仕仁？呢位出晒名的「橋王」，斷估當年幫當奴出咗唔少屎橋絕橋，可能係真正的「造王者」(Kingmaker)，但亦係最冇「著數」的一個，最少大家睇唔到，只係做咗兩年過渡期政務司司長，差唔多做義工咁，過吓癮就飄然而去，不帶走一絲雲采，認真高。

許仕仁深諳進退之道，所以市場曾經傳聞，攞命陳進出金管局的幾步棋，都係許仕仁傳授，甚至有人傳過，當年佢在新地(0016)董事局，獻計迫前主席郭炳湘休假，呢啲嘢都係以訛傳訛，新地曾經隆重其事，發表聲明否認，許仕仁曾經為新地董事局變動提供任何意見。

當然啦，講到香港特首的「造王者」，又點會少得東亞(0023)主席兼行政總裁李國寶，佢老人家做嘢好似做上癒，除咗退休之期越押越後，做熱門特首競選人的競選辦主任亦做到不亦樂乎，幫當奴連做兩屆，今次又親自上陣撐唐英年。

不過呢，今次特首選舉，唔係好似上屆咁，一個大衛打十個歌利亞，真係出晒刀仔，寶寶貝呢啲藍血(Blue Blood)人，當然唔係好慣，仲有一樣奇怪事，李國寶力撐唐英年到底，但係佢背後的李氏家族，政治取態都好自由，前行政會議成員李國章，原來支持唐唐對家梁振英，仲幫佢做埋證人，唔話得。

東亞的李氏家族，唔係香港最有錢的「李」，但肯定最Blue Blood，五代皆昌，由經營生意到在政壇打滾，肯定有一手，今次李國寶同李國章，一個挺唐一個撐梁，唔知係大家望族分散風險的投注策略，定係代表東亞李氏家族，其實唔係咁槍口一致，如果東亞未來需要面對敵意收購，又唔知會點。

李國寶當日幫當奴助選，仲係籌款大隊長，負責揼大孖沙心口要錢，兩次都籌得超過2千萬港銀，籌錢又出力，當奴坐正之後，李國寶亦入埋行政會議，東亞在內地盤生意，亦越做越大，05至07年，就成為東亞最風光的兩三年。

公平啲講句，以李國寶級數，雖然做立法會幾十年三點不露，就算冇幫當奴助選，做行政會議成員亦一啲都唔失禮，不過呢，如果唔計滙控(0005)在交通銀行(3328)的投資，東亞而家在內地盤生意，係香港銀行當中最大一間，擴張生意咁順利，同政治人脈多少有啲關係，例如搵人向地方政府辦事人打個照呼，呢啲已經係最大的無形價值。

下回再續。

關連文章：
1. 次輪好戲（上）、（下）

伸延閱讀：
1. 財經茄哩啡: 新地之料(外篇)
2. 壹周刊: 新地太子復仇記
3. 蘋果日報: 許仕仁住新地樓手尾長
4. 東方日報: 許仕仁否認受查傳聞

唐唐又呃人

唐唐早兩日在電台講，自己本來好口密，但係梁振英提起「疏化」呢一句說話，「撩㷫」咗，先至踢爆行政會議機密。

今日在「唐生大地震」facebook，有網友提起呢單嘢，順叔走睇返原本片段，屌，唐唐原來又講大話，睇睇當日辯辯時，自由搏擊環節最開始的ＵＮＣＵＴ片段：

Timecode/正確時序：
0:50 梁振英主場開始
1:27 唐英年嘗試踢爆商台續牌黑幕
1:57 唐英年發言被梁振英引用主場權利打斷
2:21 梁振英「疏化論」
3:16 唐英年主場，再爆商台續牌機密

從呢個時序，可以見到，唐唐一進入互相質詢環節，已經想爆料，最開始時候，仲緊張到起痰，咩先撩者賤，又係另一句大話而矣．．．

當然啦，梁振英究竟有冇講過有關言論，先係重點，呢方面，順叔相信唐唐多啲。

可能兩個都係大話精，拔，事實就係，其中一個講大話講得好屎，每次開聲都係以柒告終．．．

四萬炮發

好想知道，如果華叔在生，會做乜嘢．．．

公用功用（下）

經典煤氣廣告

上回講到，中電(0002)在政治大時代買政治保險，97年已經有前科，曾經搵中信泰富(0267)入股兩成，最新拍住南方電網，計劃收購美國埃克森美孚在青山發電的60%股權。

如果「公眾利益」可以凌駕行政會議保密制度，咁「公眾利益」更應該凌駕兩電利潤管制的商業機密，所謂「規管透明度高」喎，大佬，只係相對兩電而矣，香港人其實矇查查，以目前兩電公開的幾條大數，講咩股本回報ROE，多餘，因為從來冇人知道實際資本開支項目有啲乜東東。

越難打破的壟斷，涉及既得利益越巨大，無事無幹，埃克森美孚點會輕易撤出香港電力呢個「規管透明度高」的市場，呢單刁以百億港銀計，應該屬於當年香港電訊之後，最巨型的本地併購個案，賣到乜價錢、南方電網佔幾大份，可以知道買賣雙方攻防進退的步署。

查實香港玩到今時今日，就算開放市場，仲有邊個有財力加入競爭，國企是唯一有經濟實力亦有政治誘因加入戰團的新力軍，五大國企發電公司，作為內地公用股，真係被阿公用到盡，為公眾服務蝕到眼光光，望住香港「規管透明度高」的電力市場，應該個個都想香港會開放電網，以內地成本賣電嚟香港。除咗改變遊戲規劃，仲可以拆龍門，分開發電及輸電市場，南方電網一定會拍爛手掌。

埃克森美孚等幾間外資油公司，同樣被視為壟斷標誌，香港人習慣將目光放在加油站，油公司在香港公用事業市場燃料供應商的角色，冇乜人留意，例如兩電發電的主要燃料，相信就係外資油公司，又例如中華煤氣(0003)咁，所謂「煤氣」，主要由石腦油提煉，相信主要供應商，亦係埃克森美孚等外資油公司。

煤氣講咗要轉用天然氣好耐，中石油(0857)及中石化(0386)，吼住香港市場更耐。中國話要西氣東輸，向香港供應天然氣，更加係「治港36條」之一，阿公咁多天然氣，又話鼓勵全國多啲使用，香港已經冇乜理由長年從外國輸入石腦油或者天然氣，呢個唔知係咪埃克森美孚有意撤出香港市場原因之一，再放遠啲睇，香港直接燒天然氣，煤氣唔再變成獨家生意，絕對有可能，難度仲低過打破兩電壟斷，既冇利潤管制協議，新建住宅加個儲氣設備已經搞掂，改變少少賣地條款，煤氣壟斷8成市場地位，即時可以變成97年前的香港電訊。

兩電一煤，壟斷香港公用事業幾十年，一直以來，都是增長穩定的收息對象，不過未來可能齊齊要面對遊戲規則的大改變，習慣長坐呢幾隻嘢的投資者，唔好意思，就算對政治冷感，未來都要焗住關心吓政治洗牌，公用股繼續會係公用股，不過，呢個「公」字，多咗「阿公」的味道。

改變遊戲規則，為國企南下開路，既可以加強對香港經濟命脈的控制，亦回應咗香港人日益高漲的反壟斷反霸權素求，大大增加管治牙力及認受性，俾你做智囊，你都會彈呢條橋俾中央政府，俾你做中央政府，寧願國企蝕章少少，都會打呢張牌。

在香港經濟命脈，注入更多國企力量，同自由行投資移民造成的人口互換，同擁抱香港娛樂圈造成的文化大同，效果及目的，都指向同一個方向，就係中港社會經濟文化各領域的進一步同化（大家去吓新彊就知道發生緊乜事），到香港宅男唔鐘意靚模只愛北方佳麗，香港電影圈唔再識得拍香港電影，「一國兩制」就會變成一個無需存在的議題。

呢個算唔算係一種威脅，順叔唔知，只係知道，香港既得利益者而家先高舉一國兩際，已經遲咗，今日香港人唔鐘意唐英年的情緒，套用何俊仁一句，就係「香港人受夠了」，順叔早排在Youtube，剪咗條「唐英年金句20年」，頭一段片其實係惡搞剪接，老屈唐英年，但係，而家香港的制度，絕對唔係一個好的制度，睇唔到任何理由，再去強化呢個制度。

關連文章：
1. 公用功用（上）、（中）、（下）

依依俄俄

除咗湯顯明忽現大將之風，老廉拘留新地(0016)陳鉅源之外，近排股壇仲有一單奇怪事。

俄鋁(0486)。

上星期五，俄鋁公布，委任張震遠做主席。(俄鋁通告)

張震遠做得梁振英競選辦公室主任，早排缺席流浮山飯局，因為身在英國。選戰入直路，心戰室統帥竟然去咗倫敦，究竟有乜大茶飯，對張震遠嚟講緊要得過香港特首選舉，諗翻轉頭，好可能就係傾俄鋁單嘢。

俄鋁呢隻嘢有幾重要，可以諗吓一樣嘢，過去咁多年，有幾多個俄羅斯元首，曾經訪問香港？答案係只有一個，普京條靚，梅德韋杰夫，舊年嚟咗香港。(梅德韋杰夫訪港YOUTUBE視頻)

香港冇外交，俄鋁在香港，係中俄關係的一個神秘標誌，無論俄鋁背後代表咩政經利益關係，人哋放得袋錢落你個場，你就要搵個信得過的睇場，所以，俄鋁其中一個非執行獨立董事，係香港700萬人當中，中央政府最信得過的梁愛詩（賭王分燊家，都係詩姐出面做魯仲連兼信差）。

如果在中央政府眼中，張震遠的可信程度，拍得住詩姐，咁梁振英即係更加信得過？

差啲唔記得，星期一，張震遠之前另一個奇怪東家，泰山石化(1192)宣布，因為欠債，可能需要引入新股東，控股權有機會易手．．．(泰山石化通告)

張震遠搞泰山石化搞到唔湯唔水，商品交易所長年ＴＲＡＤＥ空氣，市建局起埋晒啲「華而不實貴到無倫」的樓，呢幾份成績表，樣樣都炒得，但繼續做「公職王」，７月之後可能再上一層樓，唔係「自己友」，真係做過ＭｃＫｉｎｓｅｙ識飛咩．．．

新地之料（外篇）

香港，原來仲有ＩＣＡＣ．．．

之前講過幾次，如果梁振英跑出，特首混戰之後，好可能輪到新地(0016)上演大戲，估唔到咁快，新地開國功臣陳鉅源，被ＩＣＡＣ拘留，請留意，係「拘留」，唔係飲咖啡協助調查。（新地通告）

根據明報報道，呢單嘢，源於郭炳湘在2008年5月入法院控告其兩名弟弟及一眾新地董事所披露的質疑，即新地以高於賣家叫價買入一幅位於大圍香粉寮的地皮，賣家由執董陳鉅源介紹。

廉政專員湯顯明，作為特區政府「主要官員」之一，上次知道老廉有可能要調查老闆曾蔭權，第一時間話識得黃楚標，精過鬼，將自己排除於政治漩渦之後，同朋友打吓哥爾夫就唔使做嘢，下次要搵個只係識上網的宅男做廉政專員了，一個毫無大將之風的廉政專員，選擇在呢個時候，忽然回勇，拘留大藍籌高層，呢份吉屎，唔知邊度嚟。

敲山震虎，老廉要郁陳鉅源，點解唔可以等多一個星期，3月25日之後先做嘢？老廉呢個時候出手，挺唐的地產大孖沙，仲有班鄉下佬，聽到呢單嘢，斷估唔少人會震騰騰。

如此看來，阿公已經正式吹雞了．．．

伸延閱讀：
1. 財經茄哩啡: 另起爐灶（可以只係睇最後兩段．．．）
2. 財經茄哩啡: 新地之料（上）、（中）、（下）（可以只係幫襯上篇幅改圖，同埋下篇最後幾段．．．）

公用功用（中）

上回講到，長和系近十年大舉投資海外，業務國際化，香港資產佔比只有15%，對中港政治風險做充對沖，根本唔存在「撤資」的需要，反而中電控股(0002)計劃夥拍南方電網，收購青山發電有限公司(于稱青電)的6成權益，更能反映壟斷公用事業的財團，對香港未來政經秩序重新洗牌的憂慮。

先講吓青電的資產規模，青電在香港擁有3個發電廠，包括全地球規模最大燃煤發電廠青山發電廠，總發電量6,908兆瓦，呢嚿中電在香港業務的發電資產，中電反而唔係大股東，持股4成，其餘股權，由美資埃克森美孚擁有。

中電最新市值大約1,600億元(港元，下同)，青電6成股權，投資銀行估計最少值400億元，即係話成個青電企業價值最少666億元，留意青電只係中電在香港的發電資產，並唔包括中電輸電資產的13,000公里電纜、變電站13,000個，三間香港電廠，最後賣價如果超過中電市值三分一，唯一可能，就係買家比賣家更加心急。

青電兩大股東之間點拆數，中電向來好少透露，埃克森美孚亦好可能係香港電廠的主要燃料供應商，好難估計埃克森美孚有冇誘因離場，不過，中電有興趣收購青電權益，而經傳咗好耐，中電通告亦都表示，跟埃克森美孚已經「洽商多時」，最新出現的變數，可能在於買方，例如好似中電咁講，「南方電網在後期才加入洽商」。

中電同埋南方電網，好多方面可以話係天生一對，例如南方電網基地在華南兩廣，同中電的輸電設施，地理環境上市場有一定重疊的空間或可能，中電一直有賣電到內地，未來亦有誘因引入內地核電，配合同香港政府的減排協議。兩間巨型企業，亦各自面對「反壟斷」的壓力。

南方電網及國家電網在內地電力市場的壟斷情況，財經茄哩啡在舊年《煤電網聯動》講過，呢度唔重覆，中電及電能國際(0006)在香港，打橫各據市場一方，打直兼營產電輸電，壟斷優勢更大，兩電的壟斷地住，亦成為香港大財團「霸權」的最大標誌之一。

兩電在香港的利潤是否合理，呢個問題，唔識答，因為政府同兩電簽署咗利潤管制協議，「商業機密」竟然可以幾十年凌駕「公眾利益」，開支成本結構，唔需要攤開俾大家睇，香港人唯有靠估，點估呢，好簡單，望吓兩電舊年在700萬人口的香港賺幾多，又望吓五大國企發電公司，在13億人口的中國賺幾多，就知道兩電利潤是否合理，香港電力市場的現行監管框架又是否合理。兩電在香港長做必賺，衝出香港，其實唔係做得咁出色，例如中電在印度及澳洲市場，盈利絕對冇香港咁穩定，電能近兩年大肆投資歐洲，開頭條數好易計，要未來幾十年，好似過去香港過去幾十年咁穩陣，除非歐洲監管架構，好似香港政府咁溫柔體貼。

兩電舊年加價，加幅在利潤管制之內，香港政府唔怪自己幾年前重訂利潤協議時戇居居，反而透過公眾壓力，同兩電開天殺價落地還錢，呢個究竟係乜嘢世界。現行兩電利潤協議，去到2018年先到期，即係到咗2017年，行政長官選舉面對700萬人而唔係1,200人小圈子時，必定會成為競選議題，呢個5年後可能出現的難關，兩電冇可能睇唔到。

中電在政治大時代，買政治保險保住香港大銀袋，已經有前科，97年曾經將20%股權，出售俾當年的中資紅牌阿姑中信泰富(0267)，當時講明以發展內地市場為合作基礎，最後唔知中電發現內地電力市場規管太緊計唔掂數，定係中信泰富露底原來唔係咁猛，策略聯盟好快瓦解，兩年後中電購回15%權益，中信泰富剩低中電權益其後逐漸在市場出售。

掛住睇特首選舉辯論，下回再續。

關連文章：
1. 公用功用（上）、（中）、（下）

公用功用（上）

今期開香港公用股，睇睇幾隻既得利益集團軍代表，壟斷地位未來會唔會受到威脅。

香港政治大時袋，普通市民忽然眼界大開，見到好多以往冇可能見到的物事，好似順叔呢類財經茄哩啡，當然狂食花生，邊睇戲邊學嘢。香港大孖沙身家百億千億計，就唔會有睇戲心態，應該唔少人好擔心，政經秩序重新洗牌，被人夾住大春袋，被迫交出大銀袋。

總理溫家寶，在人大政協兩會閉幕記者會上公開表示，有信心香港能夠選出一個「多數港人所擁護的特首」，話音甫落，電能國際(0006)大老闆、長實(0001)主席李嘉誠，忽然公開表態，繼續力撐唐英年做特首，又講明就算梁振英當選，長和系都唔會「撤資」。

唐英年今日的「民望」，好大程度上，其實係香港普羅大從對大財團既得利益的情感投射，之前幾次特首選舉，誠哥都冇話公開透露自己投票取向，今次竟然赤膊上陣，無疑只會令市民對唐英年更反感，誠哥這翻「挺唐」言論，「反梁」味道更重。

上星期五的特首選舉電視辯論，可能漸覺大勢已去，唐英年表現反而出奇的輕鬆，似為絕地反擊，更似一鑊熟，為「公眾利益」抖出疑似政府機密，「踢爆」梁振英曾經講過要遲早要出動防暴警察對付香港示威者，仲有建議縮短商台續牌年期。

唐英年搬得出這兩個「自殺式」炸彈，已經完全放棄政綱上的比拼，正接在意識形態層面拗手瓜，將梁振英劃成對集會言論自由的威脅，亦把自己變成捍衛「最核心的核心價值」的選擇；將一場被喻為「地產黨對共產黨」的權力鬥爭，幻化成「中環對西環」的價值之戰。

反枱到呢個程度，差在未呃出「港人治港對黨人治港」的口號，下一場特首辯論，如果唐營唔敢引爆「香港地下黨」這個「大殺傷力武器」的更多資料，可以視為特首選舉「開始受控」的跡象。

老實講，港英年代，中國共產黨在香港活動，已經係公秘密，回歸之後變成自己地方，又點會忽然「河水不犯井水」。梁振英曾經否認自己是共產黨，但身處香港權力核心幾十年，又點會唔係重點培育的「自己人」，香港有錢佬信唔過梁振英，一來潛意識上，抗拒一個被大孖沙視為「地產經紀」的測量師，忽然成為自己老闆，二來唔知道梁振英會開邊辨，會唔會帶來政經秩序重新洗牌的可能，睇唔通，對大財團的大銀袋就是最大威脅。

誠哥夠膽公開講，就算梁振英當選，長和系都唔會撤資，原因得一個，因為根本唔存在「撤資」的需要。長和系放在香港的資產，唔夠兩成，從來冇將所有雞蛋放在同一個籃，晨早已經對沖晒政治風險。

舉個例，假如香港在3月25日全民公投，表決是否將全港最大5個財團的資產公有化，共產一次下不為例，相信未必會得到大多數人通過，萬一通過，長和系最多唔見15%資產，但係新地(0016)及恒地(0012)等，可以變得一無所有。

過去十幾年，在歐洲狂燒銀紙搞電訊，過去兩年開始止血，電能國際及長江基建(1038)兩單近千億銀大刁，又係放在歐洲的公用事業，香港已經做到咁大，可以霸的地頭已經霸晒，當然冇類似投資機會，問題係，唔通在中國內地都冇類似投資機會？呢度就要套用誠哥當日所講，做大刁最緊要選擇「法律政治穩定」的地方，再講白啲，就係唔尻信你共產黨。

長和系業務向來國際化，在歐洲做一兩單大刁，唔代表對中港營商環境，突然變得悲觀，不過，作為電能國際在香港的「競爭對手」，中電控股(0002)上星期公布的一項消息，足以反映香港大財團，對未來政經秩序可能重新洗牌的憂慮。

上星期五，中電宣布正與南方電網商討，向美資股東埃克森美孚，收購其所擁有的6成青山發電有限公司的權益。

呢單其實係大新聞，下回再續。

關連文章：
1. 公用功用（上）、（中）、（下）