Best Blogger Tips

2011年11月26日星期六

星爺的聰明朋友

如果呢個世界有「財經演員」,星爺名乎其實就係「財經影帝」,係財經茄哩啡的偶像,叻到冇朋友,支持唐唐做特首,唔同蠢人做朋友...


呢班茄哩啡,應該屬於「蠢」的一類...

李修賢
吳孟達
李力持
黃一飛

嗱嗱嗱嗱嗱,呢件就聰明喇...


關連文章:
1. 財經影帝(上)(下)

2011年11月25日星期五

一紀創業板(上)

(刊於2011年11月25日am730)

創業板開鑼: 天時雙鄭

(標題為後期改動)

呢期開創業板,香港嗰塊。

順叔日前在汽水機旁邊避雨,見到後面有隻貓,「乜咁啱嘅」,諗起93年版太陽檸檬茶廣告的男主角「檸檬」,聽講有間大戲公司,計劃放上「創業板」上市(深圳創業板未對境外企業開放),當年今日,一喵驚醒夢中人,原來香港創業板已經12歲。

十二年一紀, 1999年11月25日,香港創業板開鑼,第一日就搶閘掛牌的公司,有隻天時軟件(8028),集資近5億銀(港元,下同),主席鄭健群後生時候,據聞有舖癮踎在坑渠邊睇黑格爾鍛鍊意志力,其後矢志帶領天時砌低美國微軟,但上市後唔夠一年買咗中環中心頂樓做辦公室,可能係咁,冇咗以前緊咬牙關的奮鬥精神,天時軟件好快得返個「軟」字。

當年鄭健群的得力助手鄭云翔,套現發財後唔見人幾年,近年在香港演藝界重新蒲頭,以「云翔」之名行走,自資自導專拍三級同志電影,挑戰「列限級」,甚至「列根級」,新片《愛很爛》就快上,呢個「財經演員」變身影壇導演的故事,舊年財經茄哩啡已經寫過「財經影評」,呢度唔再重複。


鄭健群訪問(由13:00左右開始)

邊度都有陽光,但太陽底下亦無新事,公平啲講句,香港股壇財經大戲,年年月月都上演,卡士幾大都有,天時軟件只算小本製作,同樣作為香港人創業發達的樣版,米蘭站(1150)咪又係上市半年貨仔,已經用咗一大嚿上市資金買磚頭做總部,由九龍灣搬去尖東。

跟天時軟件同年同月同日掛牌的,仲有隻浩倫農科(1073,當日8011),呢隻嘢唔單止係第一間香港創業板公司,亦係第一間「升呢」上主板的公司,在內地賣肥料農藥,向來低調,本來冇人好講,不過,如果大家有睇順叔今年3月嗰兩篇「超大農作」,應該記得浩倫農科。

超大(682)香港總辦事處兼主要營業地點,在灣仔華潤中心27樓2705室,浩倫香港總辦公室兼主要營業地點,亦在華潤中心27樓,不過係2706室,啱啱隔離,呢對福建股孖寶,內地總部咁啱又係在福州西湖,早幾年在香港的鄰居,仲有隻第一天然(1076)添,大家福建老鄉,又齊齊耕田搵食,好自然,我幫你買肥料,你同我賣瓜菜,上游到下游,成條調理農務供應鏈串埋一抽。


超大地址

浩倫地址

今時今日,第一天然晨早已經爆咗,超大9月底停牌至今,啱啱沽咗手亞洲果業(073)股份套現,如果大家好記性,亞洲果業亦曾經創下,掛牌第一日即被勒令停牌的香港記錄,同超大只是「一牆之隔」的浩倫,股價過去兩星期已經跌咗近3成。

講到毁滅市值的「奇幻逆緣」,仲有「Tom仔」變「老Tom」的故事,Tom集團(2383)當年以「tom.com」在創業版出世,冇耐市值已經衝上近千億,而家市值得返廿零億,過去幾年一蚊都冇賺過,市場估值叫好俾臉,成十幾歲仔,半毫子股息都未派過,科網股爆煲見勢色不對,進軍傳統傳媒,轉頭又生個「Tom Online」出嚟,點知「Tom仔個仔」都係唔生性,又私有化再改正歸斜,忽而「online」忽而「offline」,搞嚟搞去,都唔知佢想「on」邊條「line」,大股東唔係唔識投資互聯網,不過好似入股Facebook呢啲咁高風險的投資,當然唔好連累小股東啦。

「tom.com」招股截飛迫爆滙豐 (相關新聞)

當年除咗長和系,新地(016)生咗個新意網(8008),恒地(012)亦屙咗件恒基數碼,當年新世界發展(017)周身債理唔晒,如果唔係隨時有個「新世界超時空要塞」,幾間巨型地產藍籌,全部集資以億計,如果當年將集資所得,眯埋眼做風險投資,是但投資幾十間中國互聯網公司,十零廿間執粒,總有一兩注射中筍嘢啩?

一潭死水的香港創業板,仲有咁多可歌可泣的故事,一期竟然講唔晒,唯有下回下周再續。

關連文章:
1. 一紀創業板(上)(下)
2. 財經影評(上)(下)
3. 財經茄哩啡: 超大農作(上)(下)
4. A Tale of Two CEOs

伸延閱讀:
1. 創業板諮詢

同場加映

乜咁啱呀: 93年陽光「檸檬」茶
也是待續...

2011年11月24日星期四

財經CSI(下)

(刊於2011年11月24日am730)

見股東

見芬佬

上回講到,資本策略地產(497)中英文名都改得唔好,英文名「CSI」,令投資者(尤其係外國人或電視迷)一睇就諗起「犯罪現場鑑證」,中文名用「資本策略」行頭,亦容易聯想起公司主席鍾楚義,之前幫電盈(008)蛇吞香港電訊的一場經典悲情財經大戲,冇乜人夠膽買佢後面大幅折讓的「地產」。

上回提過,資本策略最新公布的「資產淨值」,由3月底的42億(港元,下同)上升30%至9月底的55億元,較公司市值折讓近7成。如果揭開資本策略至今年3月底中文年報第4頁,在「財務回顧」一欄最後一段,會發現一項好有趣的「補充資料」,話你知如果將公司及「共同控制實體」的「持作出售物業」,以「應佔重估盈餘」入帳,而不是「成本價」入帳的話,資產淨值會高達85億元,每股HK$1.05元,星期三資本策略股價,跌至HK$0.202元,折讓超過8成。

有關數字,資本策略管理層在見分析員及芬佬的推介資料上,都有提出,唔算大細超,即係話鍾楚義都忍唔住,劃公仔劃出腸,同全世界講自己本數簿,相對同其他地產公司更加吸引的地方。

折讓大,未必一定係市場對公司及管理層有所誤解,營運歷史亦是其中一項重要因素。資本策略年報,唔會有「管理層分析」一項,因為根本冇「管理層」,得幾個董事,買呢間公司股票,其實就係買鐘楚義炒樓。

資本策略04年賣殼,開始進入香港地產市場,食正香港磚頭大牛市,08年10月開始的半年,樓價曾經出現調整,但一跌即彈,對一直集中香港寫字樓商舖大宗買賣的資本策略及鍾楚義,未算真正考驗。

資本策略定位,其實已經由「物業投資新角度」,變咗近年的「多角度」,近一兩年樓市漸現見頂壓力,但資本策略高位買落唔少貨,物業組合已經包括山頂豪宅、銅鑼灣精品酒店、中上環服務式住宅、銅鑼灣道住宅重建項目等等。

近兩年高位入貨

資本策略的香港業務,由商業地產,快速轉型至住宅項目,並講明未來幾年,內地磚頭會佔公司價值50%,上海業務,暫時仲未交出成績表,換句話講,逾40億未入帳的「應估重估盈餘」,已經因為近一兩年的積極掃貨,轉化成中港樓市的風險。

未來幾年中港樓市變數,包括全球經濟及中國調控,仲有香港房策地政出現突變的壓力,呢個轉折位,將會真正考驗鍾楚義營運地產公司的能力,可唔可以保持過去幾年炒賣寫字樓的輝煌成績,將巨大資產折讓,轉化成公司價值。

鍾楚義玩「資本」耍「策略」,「往績」一流,炒樓係咪一樣咁叻,唔知,根據權益披露記錄,鄧普頓及惠理基金,先後持股超過5%,但最新的主要股東綜合名單,已經剩低持股約34%的鍾楚義,09年底入股並大大聲話「長線持有」的鄧普頓光頭佬麥樸思,今年初更已經沽到一沽不剩,兩個基金在資本策略的投資軌跡,無論代表芬佬對大股東的「信心」,定係反映鍾楚義的「人脈」,都要扣分。



犯罪證據不足...

自簽擔保外出

鍾楚義未入主前,資本策略資產淨值唔夠10億,現在最少升咗5倍,過去3年,股本結構冇出現重大變化,大股東亦冇做過乜嘢,明顯搵小股東笨的動作,最差的情況就是,中港樓市大跌,資本策略股價低處未算低的時候,鍾楚義提出私有化,將今日市值85億元的資產,收返入自己袋慢慢坐。

舊年今個月,向來低調的鍾楚義,竟然接受香港傳媒專訪,其中一句:「不過現在最有興趣做地產」,順叔印象深刻。

一間公司有冇活力及潛力,好講話事人有冇衝勁。電盈當年蛇吞香港電訊,台前幕後一班「功臣」,幾乎個個套晒現發晒達,電盈主席李澤楷,當年已是千億財產的準繼承人,反而唔能夠甩身,幾次套現大計都撻Q,作為一間上市公司,近年電盈的死氣沉沉,或多或少,反映了四十出頭的李澤楷,「壯志未籌」被迫「同床異夢」的怨氣,相對之下,鍾楚義啱啱50歲,既已發達,仍當盛年,輕身自由,重新上路,犯不著為自己再招罵名,轉行轉性「為興趣」,未必沒有可能。
終身監禁

關連文章:
1. 財經CSI(上)(下)
2. 舊地新磚(下)
3. 信佢就托(上)(下)




2011年11月22日星期二

財經CSI(上)

(刊於2011年11月23日am730)


今期冇力諗新題目,翻叮一吓隻資本策略地產(0497),星期二啱啱出中期業績,都叫做新鮮熱辣。

先睇大數,至9月底半年,資本策略未經審核純利,勁升超過10倍,賺13幾億銀(港元,下同),權益總額當係「資產淨值」的話,膨脹30%至55億元,星期二收市,市值近18億港元,市帳率0.3倍,折讓近7成,當下半年冇賺冇蝕,市盈率1.38倍,如果只係計算行使價低於市價的認股權,攤薄後每股盈利15.5港仙,相對星期二收市價21.8港仙,市盈率都係1.4倍,分別不大。

聽落好筍,唔知全港九芬老盲咗,定係冇人敢掂。

可能唔怕生壞命,最怕改錯名,上市公司都係,資本策略個名,英文係「CSI」,04年未賣殼之前,叫做「Capital Strategy Investment」,之後招牌變咗縮寫,咁就捉蟲,因為「CSI」三個英文字,太深入電視迷心,「Crime Scene Investigation」呢家嘢,美國大大話話拍咗幾百集,嚟到香港,由大宋提刑官做到香港差佬法證科,歐陽震華做到柴九,翻醃十劑八劑都仲未悶,問你死未。

好死唔死,資本策略主席鍾楚義,又係當年策劃電盈(0008)蛇吞香港電訊,呢場香港金融史上最催淚苦情財經大戲的幕後監制,玩資本耍策略太多年太出色,套現電盈股份發達後,04年買隻殼又叫「資本策略」,就算最新近加咗「地產」兩個字跟尾,但之前路過軌跡寸草不生,似乎都冇乜人夠膽信佢,會發財立品轉行兼轉性。

既然係咁,順叔都扮吓法證,仔細鑑鑑呢隻嘢。

首先睇睇本帳簿,唔知係乜的東東,例如「可供出售投資」等項目,唔算太多,亦冇產生「或然負債」,冇「衍生工具」,「證券經紀所持現金」(可能係孖展)本來超過1億銀,有啲擔心,但最新帳目已經降至2,500萬元,睇落唔似有問題。

資本策略最大嚿資產,叫做「持作出售物業」,即係早幾年買落的物業,雖然相當部份係有租金收入的商業地產,但當係流動資產,講明隨時會賣出街套現,咁做法,以財經茄哩啡有限會計知識,會當佢係最大賣點,唔會因為「投資物業公平值變化」,每年所出現的波動,影響咗資產值能見度。

三四線地產股,資產值折讓例牌好大,例如市值規模相約的金朝陽(0878),最新市值25億元,至6月底權益總額91億元,折讓超過7成,仲深過資本策略,但係「投資物業」已經入帳近100億元,過去幾年加多幾多水份,就冇咁容易還原。資本策略物業資產,以成本價入帳,加上營運歷史得幾年貨仔,每一單重要物業買賣,都容易追查到價錢,單單講磚頭部分,好難喺條數做乜嘢手腳。

資本策略在財政年度上半年,溢價連息贖回近1億元明年到期的可換股票據,蝕大約1,600萬元,反映鍾楚義唔係好想股權點樣被溝淡,間公司現在坐住22億元現金,26億元銀行貸款,接近一半5年後先到期,總括嚟講,資本策略本帳簿算幾乾淨易睇,如果未來一兩年,有融資需要時,有銀行肯借錢或發債,而唔係透過可換股債、批股供股等有攤薄效應的方法,可以加分。

跟住到損益表,資本策略上半年純利勁升10倍,因為期內沽咗唔少磚頭出街,租金收入大約1億,暫時可以唔理,分拆寫字樓物業出售,包括尖沙咀模漢大廈,同埋灣仔國衛中分6層寫字樓,賣呢兩嚿嘢,經營溢利已經十幾億;住宅項目, 08年在藍塘道買咗棟舊樓華群軒,11個單位,唔使3億銀,係咁意包裝下變成The Hampton,而家賣咗兩個單位,已經收返1.7億元。

鑑證到呢度,好似幾靚仔,冇乜「犯罪證據」,下回再續再鑑,睇睇係咪可以幫襯鍾楚義,俾錢佢幫小股東炒樓。

關連文章:
1. 財經CSI(上)(下)
2. 舊地新磚(下)
3. 信佢就托(上)(下)


同場加映

犯罪現場鑑證,Crime Scene Investigation,作為一個電視劇主題,有幾爛?

老祖宗,美國《CSI》,好似已經拍到第12個SEASON,仲分裂咗幾個版本,由CSI - Miami幾乎去到CSI - Alaska,死未...當然未死,抄到嚟香港,《洗冤錄》已經食咗兩劑;又未死,抄埋去大陸,《大宋提刑官》,執多52集,今次死得喇啩...佢老味,都仲未死,《法證先鋒》又食多三劑,仲要係咩嘢「死實死」邁向45周年台慶鉅製,你唔死順叔都悶死...

大餅變紅衫

o殊!千奇唔好話俾咁多人聽...



同場加映

I tried it 100 times but only got ashes...

信佢就托(下)

(刊於2011年11月22日am730)

艾維朗袋中必備的高息「有因」...
(最後一行順叔幫佢加落去的)
(網誌版本大部分用字,唔使問阿桂,同報紙版梗係唔同啦...)
 
上回講到,電盈(0008)2000年併購老牌藍籌香港電訊,蛇吞象後市值一度超過2千億(港元,下同),今日嘔返隻象出嚟,分拆HKTT(6823)以「信託」形式香港上市,估值剩低三兩百億元,為股東財富帶來史無前例的破壞力,十年人事,今日「8號仔」已經變成「老八」,電盈主席李澤楷,亦由一位三十出頭的年青金融才俊,踏入不惑之年。

當年港股仲未國企橫行,電盈係最受市場注目的公司,一舉一動都可以成為國際報章頭版新聞,李澤楷絕對係香港新紀元初最風頭無兩的人物,今日分拆HKTT,唔知投資者幾有胃口,不過傳媒輿論,幾乎鬥都冇人鬥一句,可見「老八」今日的唏噓。

李澤楷及其幕後真正「財經演員」,空手入白仞,一隻殼換千億資產控制權。今日電盈28%股權,最新市值計,只係60億元,加埋近幾年十億左右股息,百億銀都唔夠,對於超人之子,濕濕碎,斷估李澤楷唔會滿足於,自己事業最大成就,僅限於羸咗無數散戶條底褲,所以近幾年三翻四次想套現甩身再上路。

Richard's ONLY Legacy?

對於一個花心的男人,上天最大懲處,莫過於罰佢同一個自己唔鐘意的女人一生一世。大股東想「趙完鬆」,但包括聯通(0762)的小股東唔放過佢,攬住同床異夢,鬆又唔鬆得,唯有將手上資產搓嚟搓去。

爛船都有三斤釘,唔好話香港電訊呢間百年老店,每年最少有幾十億港銀現金流入,去到2007年,港股升到呯呯聲,踏入中年的「8號仔」,雖然斯人獨憔悴,股價冇乜起色,但最少似返個人樣,當年平均股價,大約有四個半,一年派兩毫子股息,都叫做有4.4%息率。

「8號仔」急速變成「老八」的轉捩點,出現在08年的多事之秋,李澤楷幾次賣盤未能甩身,「金融海嘯」後趁亂私有化,但擲煲費又唔夠毫,仲搞出個大頭佛,「家事」告到上法庭,最致命、亦是電盈從來冇清楚解釋的一點,其實是私有化失敗後,為何突然大派特別股息,每股派HK$1.3元,幾乎派清公司現金,呢13毫股息,當日「豪」俾邊個,唔知,但肯定完全打亂減債部署。

電盈04年開始恢復派息,05年開始,每年股息資本開支,大約10億至13億元,就算01年借落一批,10億美元10年期厘債券今個月到期,電盈都可以應付,但09年私有化失敗後,一炮過派息88億元,資金流出現巨大裂口,亦埋下今日「老八」要生仔賣仔撲水的禍根。

「老八」要生仔,有新錢進入上市公司體系,總好過生嚿叉燒,但係如果話HKTT最大賣點係「派息」的話,幾乎冇乜說服力。

如果閣下養咗隻奶牛,每年可以吱10桶奶出嚟,一刀將隻牛斬開,無論分幾多件,就算隻牛死唔去,最多都係吱到10桶奶,唔會話忽然吱到12桶係咪。

電盈行政總裁艾維朗,近年見人,總會袋住一張圖表,話電盈04年恢復派息開始,息率有幾高幾高,如果電盈賣點係「公用股」,派息高,生個仔出嚟,HKTT賣點,又係話派息高,上市後第一年,派發唔少於25億元股息,息率高到有9厘咁滯,但係再下一年,預期盈利得13億幾,又仲有冇9厘?唔使問所謂「信託」,究竟托緊乜託緊物,除非隻奶牛突然吱到12桶奶出嚟,否則電盈及HKTT之間,其中一個息率難以保持。

艾維朗唔知天真定假膠,當年開國功神之一,又冇好似袁天凡鍾楚義咁,晨早套現走人,留到而家,每年袋幾球人工,佢例牌拎出嚟晒嗰張圖表,其實永遠冇咗一個最重要數字:電盈股價。

電盈或者HKTT,個價跌到啪啪聲的話,息率自然高人一等,大股東唔可以「趙完鬆」,而家出到「趙完嘔」呢一招,咪話唔絕,「信託」未必一定係唔使問阿桂的衰嘢,但經歷咁多年風風雨雨,信佢,咪托囉。


關連文章:
1. 信佢就托(上)(下)

伸延閱讀:
1. 迷宗迷思: 拆解電盈商業信託 (強力推介)
2. 迷宗迷思: 和黃以商業信託分拆大解構
3. 迷宗迷思: 商業信託只對大股東有利—星洲經驗
4. 迷宗迷思: 和黃以小控大 分拆港口好處逐一數

2011年11月21日星期一

信佢就托(上)

(刊於2011年11月21日am730)


今期開電盈(0008)

香港廣府話充滿活力,一句歌詞,一個社會事件,可以形成廣泛流傳的俗語用字,例如「唔使問阿桂」的「阿桂」,其實姓「李」,叫「李世桂」,光緒年間廣州一位千總,大貪官,最後被整肅拘審時,轟動廣州亦大快人心,歌仔「問阿桂」唱通廣州港九新界。「唔使問阿桂」,意思就係話,某啲衰嘢,肯定係做慣衰嘢的人所做的;掉轉頭用又得,某人如果記錄不良個底太花,做任何動作,雖然大家唔係咁明,「唔使問阿桂」,都係衰嘢。

「信佢就托」呢一句俗語,如果引用「社會事件」去推敲的話,出處好可能係幾十年前的銀行爆煲事件,純粹靠估的話,好可能出現在三十幾年前「海外信託銀行」、甚至再遠少少的「廣東信託銀行」爆煲之後。你「信」佢,佢「托」你啲錢走,呢個「托」字,廣東粗口亦有「托這個」及「托那兒」用法,所以「信你就托」使用喺上嚟,「留白」之處,亦有谷住度氣同時加強語氣之妙用。

由幾十年前香港兩間「信託」銀行,到97年亞洲金融風暴後的「廣東國際信托投資」,投資者最痛苦的集體爆煲回憶,都深深烙上「信託」兩個大宇(「託」定「托」,還請高人指點)。中國今日幾十間「信托公司」,亦是銀行體系以外最重的影子銀行,透過銷售理財產品向民間集資,大打金融擦邊球,所以「信佢就托」呢句俗語,可謂充滿街坊智慧。

明唔明?!

作為財經茄哩菲,順叔每次聽到「信託」兩個字,就會頭痛,因為唔熟、唔識、唔明。電盈)最新一個動作,將公司旗下最重要資產,以「商業信託」形式分拆,複雜到無倫,「單位」、「普通股」加「優先股」,可以收息又冇管理權,分拆後股權結構同埋違約風險分佈,望到個圖就頭痛。

長和系老闆李嘉誠,又或者麾下某幾位財金高手,斷估同香港金融監管機構,牙齒印幾深,過去咁多年,幾次將資產搬去新加坡,將港交所(0388)或證監會一軍,例如隻置富產業(0778),就係先幫襯新加坡,香港監管機構先嗱嗱聲搞房地產投資基金(REIT),和黃(0013)將碼頭「托」去新加坡,香港又嗱嗱聲俾商業信託掛牌上市,電盈分拆隻嘢於是可以留在香港,否則架構更加複雜。

面對複雜的問題,有兩種處理方法,一係咬緊牙關逐頁揭,一係乜都唔理,複雜問題簡單化,用最街坊常識,諗吓幾條大數拍埋一齊之後,合唔合理。

電盈今次分拆出嚟的信託單位,由「香港電訊信託」及「香港電訊有限公司」聯合發行,其實即係電盈旗下電視業務以外的電訊資產,亦即係當年盈科數碼動力,蛇吞象式併購回來的香港電訊資產,包括固網及流動電訊業務。

當年呢嚿嘢,市值超過二千億元(港元,下同),今日條蛇,將隻象嘔返出嚟,以分拆胃口兼估值下限286億元計,11年時間,市值蒸發2千億元,以一隻股票計,諗唔到香港金融史,仲有邊間公司,對股東財富破壞力更大,唔怪得電盈大小股東,包括早幾年先落搭都仲未返家鄉的聯通(0762,當年以網通身分成為策略投資者),關係咁惡劣難纏,大股東幾乎每一個動作,尤其是系內幾次私有化動作,都因為擺脫唔到小股東「又搵我笨」的指責而失敗收場。

十年人事,電盈主席李澤楷,已經由一個三十出頭的年青金融才俊,變成不惑之年的一名中坑,「8號仔」亦已經變成「老八」。李澤楷當年空手入白仞蛇吞香港電訊,斷估唔會滿足於,呢個香港股民最慘痛集體回憶,就是自己一生人的事業高峰。

下回再續,睇睇電盈呢隻「老八」,同埋即將出世的「老八個仔」,又有乜景。


年青才俊
「8號仔」

中坑
「老八」

關連文章:
1. 信佢就托(上)(下)

伸延閱讀:
1. 香江舊語(作者「魯金」,強力推薦!)
2. 廣州話粗口研究網
3. 迷宗迷思: 拆解電盈商業信託