畸型金礦

(刊於2009年12月18日am730)

Not all that glitter is Real Gold

（文章標題為後期改動）

如果世界有一種資產，熱得過黃金，應該係金礦，所以有咁多香港二打六上市公司，失驚無神變形金礦。

如果閣下坐擁一個百億金礦，打橫行入銀行，要乜有乜，借唔到平錢的話，一係銀行有問題，一係你有問題，一係你個礦有問題。

所以當順叔星期四睇到，瑞金礦業(0246)大股東吳瑞林，要發可換股債問投資銀行花旗借錢籌旗成10億，仲要俾9厘貴利，覺得好奇怪。瑞金今年2月先上市，08年賺一億人仔多少少，假設純利全部派息，持股62%嘅吳瑞林家族，股息先得六千萬，而家問花旗借錢，每年利息已經九千萬，通告解釋，吳瑞林要籌錢做「黃金無關的投資」。開金礦開到咁等錢使已經夠奇，用咁貴資金成本去買比金礦回報更高嘅投資，奇上加奇。

花旗叫人買，但預咗要蝕錢？！

瑞金通告，冇透露可換股債行使價，亦即係唔知吳瑞林冇錢還最後要輸幾多公司股票。好在接貨嘅花旗，其實對瑞金都幾有信心，折讓應該唔會好辣。花旗位分析員THOMAS WRIGGLESWORTH，星期一先再出報告，重申買入評級，目標價睇HK$12.4，報告發表前股價HK$14.72，即係話，又叫人買，又叫人預左要蝕一成半，呢啲咪叫大行報告囉。

講到呢度，都唔駛劃公仔劃埋條盲腸，兩個可能: 一係瑞金信唔過，一係花旗位分析員信唔過。對瑞金股東嚟講，仲有一個比較開心嘅可能，就係吳瑞林其實有意買盤，單刁仲可能係揍瑞金上市嘅花旗穿針引線，如果係咁，結論係以後唔駛信，投資銀行做刁同做研究有防火牆嘅廢話。

There's a lady who's know, all that glitter is gold...

and she's buying a stairway to heaven...

伸延閱讀:
1. 瑞金大股東向花旗押股籌旗

聖誕長毛

(刊於2009年12月18日am730)

(文章標題為後期改動)

聖誕鐘，今時今日唔應該炒滙豐，應該記起股壇長毛David Webb。

作為一個財經茄喱啡，順叔過去十年所見，吹水吹到最明星級果位，就係毛哥。

毛哥職業，根據當年港交所年報，係「編輯」，98年開始攪個爛鬼網頁，十年時間變成香港企業管治、股東權益代言人，做到港交所董事，順叔由頭配服毛哥到腳指尾。

過去十年每逢聖誕，毛哥都會推介一間公司，股價跟手爆上。佢啲聖誕推介，其實有跡可尋，第一，多數持股超過半成，第二，聖誕前幾個月，多數曾經大手增持。基本因素方面，多數押注工業股，市盈率偏低同時派息OK，從呢個脈絡去睇，

新興光學(0125)，乎合晒條件，舊年聖誕成為HONORABLE MENTION，今年升幅超過一倍，不過市盈率仍然只係個位數字，呢隻嘢過去一個月，已經升咗接近兩成，話唔定唔少醒目資金，已經霸定位坐定定，等坐順風車。

有人話毛哥咁樣做，有利益衝突，順叔覺得冇乜所謂，最少自己把口喺邊度就放啲錢落邊度，真小人多過偽君子，好過唔少投資大行，一邊唱好一邊散貨，跟手反方向由頭做多次。

不過，毛哥個PORTFOLIO，近年好似越嚟越大，計落都有幾億貨仔，比得上一個小型對沖基金，可能毛哥近年啲聖誕推介越賺越勁，又可能佢本身好有米不過港股持貨越嚟越重，斷估，唔會掛牌做「編輯」，其實係個芬佬啩…

伸延閱讀:
1. 長毛: Christmas pick is Cancelled...

惠理明燈

(刊於2009年12月4日am730)

（文章標題為後題改動）

國浩(0053)投資東亞(0023)一役，證明大行報告其中一個最大用途，其實係用嚟做燈，分析員全面唱淡，就係價值投資者出動之時。不過揀啱時機、睇準位入咗靚貨，仍然未夠，要識得瞓覺，先至會有發達美夢。

08年9月底，股神入股BYD(1211)消息曝光之前，唔多分析員睇呢隻嘢。08年上半年，比亞迪十蚊水平 (計算埋10送28紅股因素) 橫行好耐，摩根大通有位CHARLES GUO，一路都CALL緊OVERWEIGHT，本來好正路，衰在風暴一吹，把持唔定，開始轉淡，今年初開始叫人沽貨，越CALL越升，年初睇12個月目標價9個半，而家升到80蚊…

分析員大錯特錯，芬佬，亦唔叻得去邊。

唔知有冇人記得，惠理(0806)大手掃入BYD，仲早過股神，07年底開始，持有BYD超過半成，一路增持，直到股神出手前一個星期，持股量已增加到13%，本來型英帥靚正，可識又係衰坐唔定，可能覺得好消息應該出貨，又可能舊年條數太核突，結果惠理一路減持，到今年三月之後，唔夠5%，可能已經賣清光。以BYD目前1700億市值計算，惠理當日高峰期持股，市值220億，等如惠理本身市值3.5倍。惠理小股東，如果未沽貨離場，下次股東會，一定要問謝清海，BYD手貨，係基金自己資產，定係幫客投資，坐盤果位，又炒左未。

講到尾，原來最簡單正接投資方法，係股神做乜就做乜，蝕少少價位都仲大把著數。順叔順手彈條橋俾港府，股神幾百億美金買火車，幾百億港紙起條鐵路，算得係乜?

東亞富貴門（下）

(刊於2009年11月27日am730)

（標題為後期改動）

財經茄喱啡上星期，用東亞(0023)做例子，引證分析員，同國浩(0023)呢啲Asset Traders，對捕捉價值時機、感覺有咩唔同。

順叔用左大摩啲分析祭旗，唔知係咪大行分析員都會睇AM730，花旗位銀行股分析員SIMON HO，本來同大摩行家，一樣一直唱得好淡，尋日出左份報告轉軚，睇翻好東亞。

從過去一年出過啲報告睇，花旗阿何生，唔算係一個牆頭草，仲可能係一個幾有性格既分員，由08年開始，基本 上一路堅持唔睇好銀行股，睇東亞，亦係一路叫SELL，今年二、三月，仲將目標價降到10蚊多啲，星期四出街份報告，一次過將東亞連升兩格，由SELL變BUY，目標價睇44蚊，仲一次過調高埋國浩，目標睇120蚊。

阿何生仲有一個新鮮論點，認為國浩插支旗落東亞，手上仲有一張牌，就係豐隆銀行，國浩未必會惡意收購東亞，但有可能傾單刁兩間銀行合併，變成一個跨中國香港東南亞嘅區域銀行咁話。嗱，呢招高，翻兜得嚟又有諗頭。不過，何生睇法同順叔都好相似，就係東亞就算賣盤，都會賣俾中資，國浩手貨，同舊樓打口釘，冇乜分別。

分析員一片唱淡時，國浩密密收集東亞，一鋪可能賺幾十億，係一個經典嘅相反理論投資動作，不過要賺大錢，買中咗，仲要坐得定。買啱股要識得瞓覺，有幾重要，下星期睇睇另一實戰案例: 比亞迪(1211)。

關連文章:
1. 東亞富貴門（上）｜（下）

伸延閱讀:
1. RTHK: 東亞懷疑傳言並非惡作劇
2. 傳奇過江龍　賣道亨勁賺三百億

大馬國浩vs大魔追魂

東亞富貴門（上）

(刊於2009年11月20日am730)

大馬老千與銀行世家的故事

（標題為後期改動）

東亞(0023)主席李國寶，近兩年認真流年不利，舊年初，坐飛機唔覺意大口道瓊斯單刁，破財六千幾萬，連行政會議都冇得撈，跟手撞上史上最大鑊信貸危機，銀行擠提，連保持三十年東亞控制權，都話可能衰俾國浩(0053)。

富貴門編劇，應該改劇本，加插橋段，話大馬老千散播謠言，導致銀行擠提股價大跌，乘機撈底掃貨，迫宮奪取控制權...

現實版，過去兩年股市大起大落，基本分析，基本上完全破產，不過正好可以引證，大行報告名牌分析，叻過順嫂幾多。

就以東亞做例子，大摩，夠大行未，佢地位銀行股分析員阿瓜華(ANIL AGARWAL)，08年頭半年，一路叫人HOLD住東亞，目標價睇40蚊，金融海嘯越嘯越勁，笑唔出，開始叫人SELL，SELL到今年三月，最低目標價9.09，到今日，仲叫人SELL緊。

睇翻轉頭，可以知道真正炒家同分析員，睇嘢有乜唔同。今年第一季，分析員睇銀行股最淡時候，國浩密密掃左超過半成東亞，掃到而家有8%，平均成本唔駛20蚊。

呢個故事最大教訓，係投資要揾真銀，往往只取決於一兩個決定，例如國浩當年賣道亨，坐住幾百億瞓足幾年，掃東行又係一鋪賺廿億，跟住大行報告出出入入，動作太多，賺極有限。

物極必反，全世界睇淡時重錘出擊，講就容易，不過寶寶貝近兩年太運滯，都係時候反彈。Sir David家族，已經唔係香港最有錢的「李」，但肯定最blood blue，五代皆昌，政經人脈非同小可，類似大馬老千取得家族銀行控制權情節，只會電視連續劇出現，東亞股東目前最大風險，反而係國浩止賺走人。

當然，站在國浩立場，無需要心急，更唔會幫手撲熄收購東亞嘅謠言，甚至有意無意煽風點火，東亞股價升得越勁，賺得越多，李國寶兩位公子，有更大誘因做好盤生意，證明自己接班能力，股息都可能收多啲，退一萬步，最後全體股東唔妥李氏家族掌舵，轉手賣俾中銀香港，隨時可以收翻50蚊一股…

關連文章:
1. 東亞富貴門（上）｜（下）

伸延閱讀:
1. RTHK: 東亞懷疑傳言並非惡作劇

寶寶貝會唔會懷疑係國浩散播謠言呢？

柯大俠盜

(刊於2009年11月13日am730)

(標題為後期改動)

中國人傳統民間智慧，話人不可以貌相，但又興睇掌相命理，有時唔知信邊個好。

順叔聽聞，前滙豐(0005)恒生(0011)大班柯大俠，手掌有條好深斷紋，聽講男人斷掌，左手握兵符，右手握財庫，唔怪得柯大俠做賓架幾乎做到一人之下，退咗休，仍然咁搶手。

艾爾敦咬長糧，最多寫BLOG跑馬仔，柯大俠就唔同，離開獅王仲大把人搵佢重出江湖。早幾個月國際資源(1051)，搵柯大俠做非執行副主席，消息一出，股價爆升近四成，市值急漲，於是出現，「柯大俠」三個字值20億嘅神話。

做得大俠，就算同班賊埋堆，都係羅賓漢，柯大俠呢個品牌，對於一啲靠印公仔紙大規模集資做LBO嘅變身公司，特別有穩定投資者信心作用，同樣準備蛇吞象嘅中策，搵埋柯大俠做CEO，年薪過千萬，再加六百球認股權，換股價一毫，消息公佈後中策最高爆上一蚊，柯大俠帳面可以賺5.4億，假設做滙豐大班平均一年袋一球美金，柯大俠要做到130歲，先賺到咁多錢。

嘅然柯大俠咁搶手咁值錢，順叔自然會諗，咁點解滙控當日，又會捨得放走柯大俠，唔通唔夠「金融界梁朝偉」王冬勝靚仔? 柯大俠今年五月退休，而家都係60歲，鄭大班今年六十有二，仲做緊滙控執董，同集團CEO紀勤爭屋住爭櫈坐，大俠同獅王唔夾冇得留低，一係太有性格上唔到位，一係滙控根本唔識揀大班，一係有啲不為人知理由…

動輒過千億LBO，好多時，都係大市見頂訊號，中策(0235)同博智收購南山人壽，廿零億美金，話大唔大，不過中策值唔值過千億，可以睇下，成間財險，都唔夠七百億。大孖沙擲幾十億，賭台灣監管當局最終會通過交易，跟唔跟，又可以睇睇，中移動(0941)入股遠傳，講緊一成幾股權，反對聲音遠遠唔及南山人壽，單刁四月公布，到而家，仲未知幾時可以埋單。

伸延閱讀:
1. 誰明賊佬心 - 中賊集團
2. 艾爾敦的網誌: Eldon-Online

財演與財茄

(刊於2009年11月6日am730)

香港近年，多左「財經演員」呢個新辭，變相將金融圈打滾搵食之人，分成有料冇料兩堆，淨識講阿媽係女人，長散戶盲目跟風者，冇料，謂之財演。

順叔打開電視，聽到有人講「唔升穿22000就可能下試21500」，一樣會噴飯，不過幾十年前唔係一街財演，咪又成堆散戶撲去買香港天線？ 所以財演呢個標籤，最大作用，可能係令好似順叔呢類財經茄喱啡，即時升呢，同你講，女人未必係阿媽，又搵到兩餐。

吹水叻，未必一定搵到食，但係金融界最搵錢果班，絕大部分，都有吹水出神入化嘅奇技，攞住間在火星賣飯盒既公司，敲50個老細門，被49個踢翻出嚟，只要有一個覺得有得諗，過左海就係神仙。

講穿左，金融界邊個唔係演員，不過講緊場大戲賣乜，做俾邊個睇。套戲唔掂，最多令好似順嫂的師奶，唔見幾十蚊；令人以為財星到有料到、唔係做戲果班，可能累到全人類輸身家兼財富大轉移。

最好例子，莫過於十年前，有人吹水吹到董伯伯相信，矽谷成功因為有矽，所以香港加數碼實掂，再吹到全香港都相信，數碼加盈科，動力十足，咁就變成香港金融史上最慘痛集體回憶

財星、財演、財茄，真真假假，有人食大茶飯，有人搵兩餐，順叔呢台戲，打正旗號吹水唔抹咀，炳人唔使本，逢星期五上演，希望大家鐘意睇。