財經茄哩啡: 畸型金礦

2009年12月18日星期五

畸型金礦

(刊於2009年12月18日am730)

Not all that glitter is Real Gold

（文章標題為後期改動）

如果世界有一種資產，熱得過黃金，應該係金礦，所以有咁多香港二打六上市公司，失驚無神變形金礦。

如果閣下坐擁一個百億金礦，打橫行入銀行，要乜有乜，借唔到平錢的話，一係銀行有問題，一係你有問題，一係你個礦有問題。

所以當順叔星期四睇到，瑞金礦業(0246)大股東吳瑞林，要發可換股債問投資銀行花旗借錢籌旗成10億，仲要俾9厘貴利，覺得好奇怪。瑞金今年2月先上市，08年賺一億人仔多少少，假設純利全部派息，持股62%嘅吳瑞林家族，股息先得六千萬，而家問花旗借錢，每年利息已經九千萬，通告解釋，吳瑞林要籌錢做「黃金無關的投資」。開金礦開到咁等錢使已經夠奇，用咁貴資金成本去買比金礦回報更高嘅投資，奇上加奇。

花旗叫人買，但預咗要蝕錢？！

瑞金通告，冇透露可換股債行使價，亦即係唔知吳瑞林冇錢還最後要輸幾多公司股票。好在接貨嘅花旗，其實對瑞金都幾有信心，折讓應該唔會好辣。花旗位分析員THOMAS WRIGGLESWORTH，星期一先再出報告，重申買入評級，目標價睇HK$12.4，報告發表前股價HK$14.72，即係話，又叫人買，又叫人預左要蝕一成半，呢啲咪叫大行報告囉。

講到呢度，都唔駛劃公仔劃埋條盲腸，兩個可能: 一係瑞金信唔過，一係花旗位分析員信唔過。對瑞金股東嚟講，仲有一個比較開心嘅可能，就係吳瑞林其實有意買盤，單刁仲可能係揍瑞金上市嘅花旗穿針引線，如果係咁，結論係以後唔駛信，投資銀行做刁同做研究有防火牆嘅廢話。