紫金山下（上）

(刊於2010年7月22日am730)

一片綠衫消不得，拖紫腰金是何人？

今期開紫金(2899)。

中國第一金股，國內形象出奇負面，提起紫金人事，多數開兩飛，一係巨額國有資產流失，一係滲漏污染環保問題，今日先講前者。

話說紫金董事長兼總裁兼總工程師陳景河，本來係閩西地質大隊分隊長，在福建紫金山勘探近十年。

93年放棄鐵飯碗，申請調職到上杭縣礦產公司(紫金前身)做經理，偏向瘠山行。陳景河在紫金山放低唔少腳毛，探山探到幾多棵樹都知道，有眼識金山， 其實抵佢發達，不過紫金98年底改制前，向國家上報金礦藏量只有5.45噸，引入私人資本後，紫金山黃金儲量激增，搖身變成全國 最大單一露天金礦，仲要上金下銅，越掘越有。落差太大，咁就引起唔少非議，指陳景河當年隱瞞紫金山實際藏量，令國有資產賤價流失。

陳景河自己賺咗幾多，順叔唔得閒慢慢查，不過佢個最佳拍檔，紫金其中一個主要發起股東，陳發樹，在2000年8月，透過三間「新華都」字頭控股公司，注資約2500萬人民幣(下同)，已經取得近27%紫金股份，紫金在03年及08年，先後港中兩地上市，市值高峰期逾1700億，有幾好賺，自己計。

陳發樹透過減持紫金，保守估計，套現幾十億計，而家係青啤(168)第二大股東，大陸打工皇帝、前微軟中國總裁唐駿，08年盛傳10億身價，過檔新華都幫陳發樹打工。陳發樹發過豬頭，花名一大堆，又「福建首富」又「中國巴菲特」，越發，越多人唔妥佢，舊年底聲稱捐身家45%，83億成立慈善基金，想做「中國蓋茨」，反而惹起更大反彈，話佢其實想避稅及買政治保險。

由陳景河到陳發樹，公眾形象唔討好，唔係仇富情緒咁簡單，根本原因，在於紫金控制權買得太平，賤買國有資產，即係侵吞眾人之財，自然犯眾憎。公司「惹火」，有乜行差踏錯，亦容易變落水狗，中證監已經先後兩次，就紫金資訊披露問題，立案調查，七月爆出「環保門」醜聞之前，唐駿亦被踢爆「學歷門」，在山雞大學買博士沙紙，成個集團系統，隱隱然山雨欲來。

紫金由改制到香港上市期間，福建話事人，叫習近平，當年習近平以省長身份，視察紫金，仲當住陳景河面，讚紫金「體制活、效益好、環保有創新」(據《中國礦業報》2001年11月報道)，如果紫金出事，唔知會唔會令習儲履歷，多咗隻黑豬。

陳景河神通廣大，08年8月，胡錦濤訪問塔吉克斯坦國，又咁啱，紫金約好咗塔國官員簽合作備忘錄，於是出現咗國家主席，見證紫金海外拓彊偉大場面，玩到咁大，除非胡總甘心命抵站台，否則好牙煙。

靠山吃山靠水吃水，下回睇睇，紫金山下汀江傍，居民吃什麼山，又吃什麼水。

關連文章:
1. 紫金山下（上）｜（下）

伸延閱讀:
1. 趙岩: 陳景河大肆侵吞國有資產(轉載博訊文章，真偽自辨)
2. 習近平讚紫金「環保有創新」(該文記者為鄒永明，與紫金宣傳部長同名同姓)
3. 紫金宣傳部長否認封口費 (鳳凰網)
4. 中塔元首見證紫金與塔國合作簽字儀式 (紫金網頁)

呢條友乜水．．．