(刊於2011年1月13日am730)
 |
| 哨牙仔感謝員工，年年都識講．．． |
受一位資深傳媒朋友所託，要幫香港打工仔出吓聲，尤其係傳媒，今期就講吓香港電訊傳媒股。
聽呢位朋友講，有一間大型電訊公司，又互聯網又電話又電視，做呢間公司股東，如果只有十個月資歷，飲得杯落，但十年資歷嗰班，全部瓜直。做呢間公司員工，亦好慘情，聽聞公司旗下有嚿收費電視，由體育台到財經台，開台咁耐幾乎涷薪咁耐。
唔係話冇加過，做三五年加得一兩次雞碎咁多咁囉，邊個部門嗰排多人劈炮，搵一兩件係咁意加少少咁囉，唔好話 GOOGLE全球員工加薪一成咁童話，相對之下，國泰全體加4.5巴仙都已經好辛福。
呢位朋友心地好，唔肯爆響口邊間電訊公司，大佬呀，香港咁多間，間間都咁大型，好多間都又電訊又傳媒，好似八掛雜誌用「R7」呢類高度加密暗號揞名爆，點估喎。
順叔份人冇咩好，好在插人夠主觀，專登搵啲電訊傳媒公司年報望望，都係冇乜得著，不過發現一個幾有趣現象，同大家分享一吓。
 |
| 點感謝法呢．．． |
至09年12月止5個財政年度，電盈(008)純利企喺15億左右水平非常穩定，即係冇乜增長，期間員工數目，由萬四人增加到超過萬八人，應該係全港最大僱主之一，不過員工開支，竟然可以每年下降，期間因為派息產生現金支出，又可以每年增加，09年私有化失敗，唔少幫拖大孖沙坐艇，電盈董事局仲慷慨派特別股息，幾乎一炮過派清公司現金，對員工夠慳家，對股東(講緊近年嗰班)夠慷慨，大家睇吓個附表，就知道點解主席李澤楷，每年年報裡面，都話要「感謝全體員工努力工作」，囉。
其他香港大型僱主，節員工之流，係咪都好似電盈咁有一手，唔敢肯定，不過傳媒機構，無論賺錢唔賺錢，間間都係咁，幾年一個牛熊起伏，金融海嘯，就話共渡時艱，經濟強力反彈，又話要居安思危，年終雙糧本來係中國企業傳統，而家變咗皇恩浩蕩，仲要唔係年年有，個個足，唔怪得連唐英年都話擔心香港傳媒待遇太差，留唔住人，驚影響傳媒質素。
有大學調查，話香港新聞機構公信力，全線下跌，如果邊間大學邊個新聞係教授，同學生講公信力下跌因為自我審查乜乜物物，學生從此日日走堂都唔會有損失，大佬呀，學院派唔食人間煙火都算，間間大學大專，新聞傳播學士碩士課程一大堆，廉價勞工大量供應，有錢佬鐘意做傳媒老闆，又唔肯擲錢培養人才，你想香港傳媒幾有水準，又幾有公信力呢？
呢個世界好諷刺，香港傳媒呢個死局，可能要寄望大陸資金，搶攻香港先可以打破，下回再續。
伸延閱讀:
1. 香港傳媒自我審查持續 公信力跌至新低
#
沒有留言:
發佈留言