Best Blogger Tips

2012年9月7日星期五

中遠艦隊(下)

COSCO's SOS

2007年,係中國遠洋 (1919)的高峰期,當時人仔對港元啱啱一算,波羅乜海指數過萬點,中國遠洋純利近200億元(人民幣,下同),相當於現在市值的6成。

在咁風光一刻,中國遠洋的艦隊,做集裝箱的,有144艘船舶,總運力435,138標準箱(TEU,20呎標準貨櫃),同時擁有全球最大支的乾散貨船隊,419條,當中217艘自己擁有,總運力近3,300萬載重噸(Dead Weight Tonnage),規模可能仲大過東海艦隊。

去到今年6月底,中國遠洋的乾散貨艦隊仲有357艘,自己坐住227條,總運力同2007年相若,但仍然係全球最大的一支乾散貨艦隊,家吓波羅乜海指數跌到唔夠1千點,中國遠洋自然蝕到阿媽都唔認得。

中國遠洋的船隊規模,聽講同兩三年前的高峰期,已經少咗百幾艘,應該係租少咗,從近兩年財務數字嚟睇,應該係向母公司中遠集團租少咗船,同時做多啲集裝箱貨運、加大碼頭及物流業務投資,中遠集團仍然擁有近800艘商船,5,600萬載重噸,中國第一世界第二,可以想像,中遠集團呢間國資委樓下的央企,蝕得更加跨張,蝕到阿公都唔認得。

造船同造飛機一樣,唔係今日訂貨明天送到,所以中國遠洋雖然調整緊艦隊規模,但同時每年仲要為以前落咗柯打的新船訂單找數,暫時仲有18艘乾散貨船,同埋22艘集裝箱船訂單,2012年的預計資本開支,仍然會按年上升74%至153個億。

中國絕大部分央企,都在自己地頭搵食,有阿公照住,不過航運公司的收入面向全球,可以話係參與國際市場競爭最多的「中國代表隊」,航運央企近兩年齊齊蝕到燶,既反映國企在國際市場的競爭力,亦反映咗國企用阿公錢投資,最緊要威,好似中國遠洋在董事長「Captain Wei」魏家福的帶領之下,太過著眼於建立「全球最大」艦隊,市況逆轉時完全冇晒轉身的靈活性,將中國遠洋同東方海外(0316)比較吓就知道,近兩年盈利雖然大跌,但未至於蝕到入肉,東方海外近年表現出嚟的,正正係一個跌過仆街過的老牌航運公司的沉著及穩健。

航運央企蝕到阿媽都唔認得,魏家福上星期公布成績時表示,已經向國務院上書,應該離不開「國貨國運」呢味,不過近年連華能(0902)及寶鋼等大型國企,都開始自己建立船隊,控制運輸成本, Captain Wei的「SOS」唔知有冇人會睬佢。

阿公打救船公司,查實早有前科,不過唔係國企,而係前特首董建華的東方海外,呢個打救一家船公司同時統戰一個未來香港特首的故事,可能大家都耳熟能詳,不過順叔一直都好想知道,2003年長實(0001)在權益披露新例下曝光的10%東方海外持股,究竟幾時落注。

董伯伯當年好想搞大香港航運,航運發展局、港口發展局、物流發展局,各自焗咗一個出嚟,但2005年腳痛之後,冇人再理呢三個乜局物局,梁振英做咗特首,新人舊風,又話要搞翻香港做「航運服務中心」,開邊辦,暫時未知,不過上個星期,聽講Captain Wei就摸咗落嚟香港同梁振英見面,一個最蝕錢的央企老總,一個面對最大政治壓力的地方領導,真係唔知邊個向邊個SOS先好。

根據梁振英之前接受外國傳媒訪問時透露的口風,計劃在香港搞多啲航運服務,要同倫敦拗吓手瓜咁,中遠集團樓下,仲有一間中遠國際(0517),就係提供航運服務,查實做緊乜,財經茄哩啡唔係太清楚,不過中遠集團早幾年被阿公勒令「棄陸」,撤出地產業務,帶脅中遠國際出售遠洋地產(3377)股權套現,而家仲坐住一大嚿現金,現股價3蚊港紙左右,現金每股3個6毫4。

中遠國際同中國遠洋唔同,唔係一盤可以蝕到入肉的生意,仲有薄利,現價計,中遠國際的航運服務本業,免費奉送再每股倒貼幾毫子,先會有人要,唔通因為準備大搞航運服務的嗰位叫梁振英,所以連累中遠國際搭沉船,都變埋「負資產」?

關連文章:
1. 中遠艦隊(上)(下)
2. 兩條沉船
3. 價值缺失(上)(下)

3 則留言:

  1. 順叔請教您點睇政府想將工厦改作出租單位新聞,工厦的改變用途是否一個趨勢?在下看報紙再加四圍問的結果是擁有全幢未拆散工厦的上巿公司, 正路多少的是信和,恆基和新地(但又好似不是佔她們總資產很大百分比);冷門有萬事昌,開達,大昌,大生等等(但又冇乜吉士買)。反而政府想快D批績起樓下,擁有兩塊巴士廠地中巴#26有冇得唸下?兩塊地分別位於黃竹坑同柴灣,當中後者更剛於8月尾重新闖關,而項目涉及總樓面約68.46萬方呎,中巴手頭現金不少而且過往中巴也曾伙拍太古發展物業呢。當然未知佢最後點批同補地價成本如何,但係以附近十年樓齡而又同樣係唔近地鐵藍灣半島作參考,呢個盤到時就算係咁依賣一萬蚊呎都已經大大超越中巴現在的巿值,怕就怕佢繼續"Sleeping",但近年都派兩蚊左右年息比股東,點睇?謝謝 John

    回覆刪除
    回覆
    1. 睇漏左,黃竹坑已經唔係佢地嘅

      刪除
  2. 仲未計其「幹」貨船被淡水河谷㩒住嚟「幹」!

    回覆刪除