Best Blogger Tips

2014年9月17日星期三

財經吳剛

名譽資深大波少婦
原圖:吳剛師傅淋滾油

今期唱花敬佛,開傳媒,凸透一位牙斬斬要派報紙的哎吔傳媒人,順便回顧一位報壇老行尊堅持立場幾十年不變的辛酸。

唔少人講過,想邊條友冚家富貴,最好聳恿佢搞報紙,印印吓好快印出血。呢個傳統智慧,啱一半錯一半,「傳媒老闆」社會地位,奇貨可居,邊份報紙執粒,好快出現大富豪接貨,後面政治價值,唔會死錯人者。

瘟雞未死一雞又叫,七月底講開「財經林峯」,主場新聞離奇收皮,爛口未完,「財經吳剛」趕住出場,踩火坑搞財經報紙,勇氣猶勝吳剛師傅吞炭淋滾油,呢位正義朋友,就係以「資深對沖基金經理」之名行走江湖、人稱「錢老牧師傅」的,錢志健叔叔(Edward Chin)。



話說錢老牧在信報專欄近日被叫停,按例,捵床輾蓆,哭訴身為「佔中金融組」負責人,慘被政治打壓。節瓜咁大條,眼淚水都標,鏡頭一轉,不得了:錢師傅正研究推出「新信報」,以「對沖」傳媒低氣壓。錢師傅今個星期會在大小西報登廣告,並在港交所門口獻唱,啟動佔中金融組全球攻勢,好似話仲會有神秘嘉賓,唔知財經林峯會唔會同財經吳剛同枱獻唱,一對掛金融精英之名充佔中之死士的中環孖寶,在置地廣場Chok兩嘢就叫冇走數。

聽講錢師傅計劃效法南韓的《The Hankyoreh》,街坊集資(Crowdfunding),每位散戶募捐助5,000蚊(港元,下同),就可以成為股東,兩萬友落搭,湊夠一個億,就可以起動香港第一份公眾主導的獨立財經傳媒云云。嗱嗱嗱,燒銀紙派報紙,向來只係大亨遊戲,家陣有正義朋友扯旗,帶領老散同蹈火海,攬埋一嚿過吓「傳媒老闆」之癮,財經茄哩啡唯有助慶陪唱,盡職審查,將錢師傅幾個招牌拆解一吓,全方位凸透呢位基金異士的金身,究竟有幾堅。

「資深對沖基金經理」

「對沖基金經理」呢個朵,拋窒唔少師奶,神神秘秘,唔識嚇死,識少少咩,笑到便秘。對沖基金從來冇一個明確定義,唔想被監管機構定型及限制投資行為的(相對監管甚嚴退休基金等而言),都可以叫自己做對沖基金,攞晒9牌開個雞棚(要熟門路,唔係講咁易),無論管理緊10蚊定係100球資產,有所求者,就可以自稱「對沖基金經理」,只要唔賣廣告吸客,唔算犯法。

「資深對沖基金經理」嚟講,更加係Oxymoron中的「嘔死Moron」。大波少婦聽得多,有冇見過「資深大波少婦」?對沖基金經理,幾年貨仔,唔掂,炒魷,個朵臭咗,翻身冇望,真正對沖基金出名大起大落,又有幾多個長勝將軍?假如有一個基金經理,操盤廿幾年屹立不倒,勁賺早夠退休之餘,行內行外聲譽必定極隆,好似Bill Gross咁,掛個名Partners已經排隊送上門,唔使日久日拋頭露面扮鹿扮馬,盤都唔使操,資咩深咩基金經理啫。

錢師傅自己公諸於世的覆歷,建議所有人揾工跳糟時,都要參考一吓,點樣利用大量如夢似煙的修辭,堆砌住選擇性事實,吹出一個令人覺得好猛的效果,語文運用的藝術,登峯造極。

一個基金的「Portfolio Manager」,套用錢師傅成日講的術語,工作就係「操盤」,靈魂人物也。上世紀90年代初,錢師傅先後在兩間加拿大商業銀行樓下的證卷部門任職,佢形容自己當時的崗位,叫做「a portfolio manager」,英文的「a」和「the」有冇分別,心照;幫手「manage」客仔「 portfolio accounts」,又唔知算唔算「portfolio manager」呢?

好喇,錢師傅在2000年回流香港,又同大家講,做過Man Investments的「Country Head」,驟眼聽落,好似大型沖基金成個香港業務,都係錢師傅打骰操盤,能嚇死人。又係文字藝術,究竟錢師傅係「the country head」,還是「a country manager」?順叔特登摷返十幾年前,鬼佬金融機構轉工跳糟的舊聞,還原錢志健的「對沖基金人生路」,發現錢師傅在回港頭五年,先後在Man Investments及Refco Alternative Investments任職,但做唔長,一年貨仔左右就要鬆人,而且主力負責sales及product distribution的工作,唔係話「sell屎」冇料到,不過同操盤落鑊,好似大纜扯唔上咁囉。呢段時間,錢師傅轉工頻密,唔係個個檔口都咁光鮮,例如好似冇人識的理財顧問公司Allen Perkins,2005年9月,壹周刊的八卦專欄,話錢師傅曾經做過澳門匯業財富管理部,中環茶客老蘭酒鬼,有興趣可以證實吓,錢師傅有冇撈過呢間被美國財政部視為眼中釘的馬交行。

當然啦,敲得老細門多,唔難揾到人打本開檔。據香港證監會的持牌人記錄,錢師傅在2007年2月至2008年9月,終於有次成為資產管理公司RO(Responsible Officers),基金叫做Pride Revelation Fund,蚊型,20球美金,老闆係今日大陸背景的傲陽集團。雖則2007年係癲雞市,丁魚丁蝦丁蟹都撲到水搞對沖基金,不過總算係正牌「Portfolio Manager 」,一圓操盤之夢,可惜,操唔夠兩嘢,大時代變大春袋,錢師傅用咗雷曼兄弟做sole prime broker,鴻圖初展撞上信貸核爆,坎坷。

錢師傅近年又話自己幫一個「家族基金」操盤,邊個家族操就從來唔講。證監會持牌人記錄上,錢師傅目前唯一仍然掛牌的基金公司,叫做Capital Global Management, 2011年2月開始,但間嘢好神,另外仲有5個Responsible Officers,喪搭近40個Representatives,要有誠伯基金會十份一規模的家族基金,可能先會咁疊馬,但係上去間嘢的網頁,乜九乜七都冇,奇奇怪怪。

要了解呢個現象,就要將錢師傅盤生意,分成「金身」及「皮相」兩部份,攞晒9牌的Capital Global Management,理論上就係錢師傅作為「基金經理」的「金身」,收收埋埋;同時錢師傅亦有檔MDE Hedge Center,做好多資產管理以外的垃雜業務,呢檔可以話係錢師傅作為「基金經理」的「皮相」,拎出街見人兜客,無他,在香港想開檔對沖基金,唔係講咁易,錢師傅浸咗咁多年,熟書熟路,幫啲蚊型基金敲吓門,擔擔抬抬,提供辦公室樓面(例如一張枱及電腦),即係錢師傅唔多提及的「hedge fund hotel」的生意,錢師傅的角色其實類似酒店大堂經理,當所有嘢嗱埋一注,久而久之,就難分主業或副業、「金身」或「皮相」矣。

總括嚟講,將錢師傅「資深對沖基金經理」個朵,斬開三截為「資深」、「對沖基金」及「經理」,三個形容詞分別準確,三截駁埋一齊,嘻嘻,又係中文字的應用藝術,後生仔求職時亦要學學。記者朋友下次幫錢師傅撻朵之前,最好先問問佢老人家,用「資深對沖基金經理」會唔會太爆,如果唔方便,順叔建議,可以改用「在對沖基金界打多年的正義朋」,去葉留青,亦為中文字藝術的另一應用也。

金融傳「道」人

順叔對任何局限於個人行為的信仰,冇任何意見。就拜火教,反而有幾句想講:宗教政治,東西咪撈,神還神,棍是棍,性交就性交,轉運就轉運,拜火教應該中出,拜火教唔應該中出,兩邊都咁柒。

入返正題,錢師傅熱忱公益,將15%時間行善,聽講過去八年,每月一次,堅持去赤柱向外國囚犯傳福音(赤柱原來咁多鬼佬監躉?),又搞社企、慈善組織,常向金融圈埋手,傳其「對沖心道」,叫人咪掛住拜金,賺咗回饋社會。

世俗眼光觀之,一個有良心的對沖基金,又係嘔死Moron,去狼心講良心,不如用個基金大包圍買六合彩啦,少理,今日香港,良心有價,慈善喪搭對沖基金,運用得宜,有得諗。話說錢師傅個Pride Revelation Fund未收皮之前,賣點之一正正係良心,講緊將10%的管理費收入,捐獻慈善團體。

即係咁,一個對沖基金經理,號召力遜於大部分行家,將基金包上一層良心,不失為上佳自我營銷,賣點當堂唔同晒,錢師傅在基金界際遇平平,唔代表佢操盤實力唔得,2008年基金爆煲乃非戰之罪,當年狙擊領匯(0823)的孩童基金TCI,就係著名的「狼心良心」混合體,錢師傅如果運氣好少少,分分鐘今日已經係港版大鐵球也。

佔據咗「良知投資」的市場定位,講道說德形象夠出,自然有知名道,副業反客為主,就算冇人再打本開檔,亦可大收協同應效,撰寫專欄、出席講座、投資社企,甚至客串基金公司心理輔導顧問,傳其「對沖心道」,教授克服恐懼妙法,不失財路多門矣。

錢師傅仲有一個招牌,叫做Master Firewalker,乜嬌嘢話?即係將一大堆木燒到千度化炭,輔開十呎八呎,叫人赤腳行過去,聽講可以將恐懼轉化為意志。美國有個教人火上行的組織,叫做「Spark the Fire Within」,錢師傅係香港的拍檔,網頁上甚至有佢老人家踩炭,教人用喉嚨頂斷枝箭的場面(網頁最近已經鏟咗,好在順叔有為錢師傅雄風留底),爆。後金融海嘯時期,債務危機百家樂玩足幾年,基金經理如驚弓之鳥,錢師傅教人踩炭克服恐懼,食腦,但邪開有條路,據報2010年一次錢師傅做搞手的「點燃心火」活動,一班金融及專業人士,燒到成腳起泡,好在,深喉斷箭暫時未聽過出事。

踩火坑大師 
深喉斷箭
講到玩炭,要請真正的吳剛師傅出場。呢位唔化妝都同王小虎一個餅印的演員,其實威過,78年已經係電影男主角,例如《歡天喜地對親家》,1982年捧紅李連杰的《少林寺》﹐聽講原本吳剛師傅做主角,拍拍吓,制片人唔滿意,燒晒底片由頭拍過,揾咗全國武術冠軍李連杰,造就一代武打巨星。吳剛師傅轉戰電視,在麗的拍咗代表作《醉拳王無忌》,跳糟無線,星運越沉,做完《極度兇靈》主持後,戲路更偏,形象神怪化,後來多數只能夠在籌款大騷偶然出鏡,爆肌搽一身油光,食炭淋滾油,越玩越激,後來搞到要捉鱷魚,無線都頂唔順,將吳剛表演全面叮走。

財經茄哩啡真心配服娛樂圈好多百折不撓的小人物,吳剛師傅正正有種能屈能伸的毅力,放下小生身段,縱被百度嘲笑,珍惜每個出鏡機會,就算嚿炭係燶芋頭,幕後認真練習台前賣力演出,在慈善大騷搏取知名度,慢慢轉型商界,代理過果汁,做過風水佬幫架仔名星睇相,甚至賣能量健康棒免費教阿婆健康操,世人笑佢越搞越騎呢,但最少在演藝事業以外闖出新天地。

錢志健的事業軌跡,同吳剛師傅好多雷同之處,都有種打不死的精神,永遠唔係一線紅星,但絕對唔容易淡忘,最少個個都知道有件「資深對沖基金經理」在蘭桂坊行嚟行去,當然,大家亦逐漸淡忘,吳剛師傅亦曾在演藝界百般奮鬥,希望成為李連杰。

哎吔傳媒工作者

錢師傅廿年前已經做過傳媒人,在加拿大一個山雞中文電視台做主持,呢班回流香港的哎吔傳媒工作者,影響力甚大,除咗財經吳剛,仲有財經林峯Tony Chok哥哥、香港電視(1137)主席王維基,在香港發光發熱,閒時又返加拿大座談會,唔少思想單純隔洋看花的海外華人,深受呢班加拿大幫意見領袖的串連效應影響。

錢師傅同外國記者俱樂部(FCC),亦老友鬼鬼,成日在FCC起壇作法,間唔中又在西文傳媒以香港金融界代表賣廣告,阿支阿左,佢在蘭桂坊的辦公室,以前都係FCC的行政部門所在。FCC當年直接同港督爭取平價會址,成為地球上罕見的外國記者會所,香港記者協會聽講都係個工會,唔知可唔可以效法吓FCC,向政府爭取個香港本地記者俱樂部?

錢師傅2006年開始在信報寫專欄,睇得出好多文佢有俾心機寫。信報的地盤,為佢「對沖基金經理」的「專業」添光加環,地盤被拆,自然扯火,佢話信報因為政治壓力「跪低」,曉,今時今日的長和系的誠伯,早已志不在香港,又使唔使跪低?誠伯細仔捋柒(Richard),2006年已經大叫「真民主」,同某部份泛民聽講好好傾,一個家族兩邊落注(李國寶買唐唐,李國章撐師奶,明未?),政改通過,可以邀功為香港民主進程出過錢出過力;原地踏步咩,繼續「賤郎三百X4」,最大得益又係地產霸權,早立於不敗之地。唔好忘記,戴耀庭「佔領中環」的意念,正正係在信報專欄吹出來,真要交個古惑仔祭旗,斬十八個都未輪到「資深對沖基金經理」啦。

近年香港盛產新聞自由烈士,CY Lai有情有義接收唔少,有報道話人稱長舌大嘴成龍鼻的神奇顧問伍老妹,都過咗檔壹傳媒(0282)發達,錢師傅冇咗信報專欄,在壹仔多咗兩個地盤,並且開始吹Crowdfunding,吹到係「年輕一代的吸錢大法」,為街坊集資搞新報紙造勢吹雞,真係有咁多蘋果迷,唔買iPhone6都要捐錢跟住錢師傅跳火坑,起壇作法後仲多嚿銀俾錢師傅打理,基金經理好夢重圓,快哉;籌唔夠旗,最少可以搞個財經網媒,豬腸新聞借屍還魂,都叫交到功課。

在香港,辦報失敗例子一大蘿。92年肥彭初到貴境,未開始搞政改,已經出現過一本叫《Window》的英文周刊,創辦人叫羅德丞,呢位港英重臣政治貴族,投身親中陣營屢建奇功,一度成為香港第一任特首熱門人選,聽講中銀先後貸款1,400萬美金,俾大羅搞英文雜誌,但未捱到97回歸,已經要執粒,大羅政治行情亦急跌(見「李氏樓刁」)。

捋柒早幾年亦曾一擲億計,整檔《CAI Business Indepth》,雄心脖脖,想做「中國的Bloomberg」,但捋柒忘記咗西人傳媒重鎮背後邊個做政治睇場,亦冇吸收大羅的教訓,揾班洗腳唔抺腳的老外,成事唔足,《CAI》結果「啋」一聲燒咗兩個億,幾乎未出街已經收皮。

大羅捋柒,一個政治能量高,一個老豆巴閉,創辦財經傳媒,雙雙玩出火,何解仲咁多人趕住跳火坑?電影《黑社會》都有教,Jimmy仔都只係想做生意,人在江湖,政治經濟又點分得開。有啲嘢阿公做唔到,又或者唔方便做,邊條古惑仔幫阿公搞掂,先可以顯示到自己有利用價值。

舉個例,今日阿公大把錢,想買邊個西文傳媒都得,但假如由人民日報出手,買份《金融時報》返來,公信力大打折扣,邊位有錢佬出手做得成單刁,又唔同講法,在北京面前當堂身價百倍,做生意分分鐘從此得心應手。旺旺(0151)老闆蔡衍明就係最好例,在新加坡上市年代冇發圍,2008年買台灣中時,入股香港福你個佳電視,旺旺大陸業務即時起飛,搬嚟香港上市做埋藍籌,巧合?

同樣道理,舊年寫「變態超人」系列時,已經指出,誠伯國際化的第一單刁,在歐洲收購的目標就係金融時報及經濟學人母公司Pearson,人哋深謀遠慮,相對之下,捋柒後來輕彈2億收購信報,小菜一碟矣。

誠伯 vs 林伯

信報被視為文人辦報最後一面旗幟,捋柒入主,哭喪全城,好似未姓李的信報,完全絕緣於金權遊戲,不落俗套於地產霸權的無遠弗屆。

信乎?

誠伯同信報林伯,潮汕同鄉,老友底,信報老巢所在的北角,就係誠伯痴膠花轉戰地產的橋頭堡,以誠伯盡攬天下奇士的用人之道,冇理由會睇漏林伯的鐵骨文膽。79年長實(0001)收購和黄(0013),全港獨家採訪到誠伯的,聽講就係林伯,睇返79年9月26日信報頭版,行文用字,可知誠伯林伯關係,非比一般。

當然,香江第一健筆游走龍蛇幾十年,中環到中南海都有讀者,自有令人折服佩服之道,基本法起草政制部份時,社會分化之激烈不亞於今日,誠伯林伯亦坐唔埋枱,最突兀一章,出現於1989年1月,英國契媽元旦授勳,整咗個荷蘭水蓋誠伯艱,信報投資者日記以曹仁超之名贈慶,串誠伯「過不了有錢求功名這一關」,後來林伯接受傳媒訪問,曾經證實,誠伯一怒之下,抽走所有在信報的廣告(抽廣告呢一招,過去三十幾年用得最多的唔係共產黨,而係地產黨)。多年老友又點會因為幾句閒話反枱,「過不了有錢求功名這一關」背後的政見隙罅,耐人尋味。

1987香港港出現經濟日報(0423),由馮紹波等國粹派人物創辦,同信報爭飯食。政治兩極化的地方,有作用力就會出現反作用力,有戴耀庭就有周融,有社民連就有愛港力,經濟日報係一份相對中立、立場傾向北京價值的報紙,光譜另一邊的信報開邊辨(或者政治睇場覺得佢開邊辨),就不難理解。當大孖沙同共產黨攬頭攬頸,大量地產廣告轉向經濟日報,信報開始冇啖好食,1997年後經濟日報做到上市,今日都叫做有十億八億市值,信報反而越做越殘,望返轉頭,順叔反而佩服林伯對自己政治立場的堅持。

林伯當年一句「中國不可信,英國不可靠」,概括八十年代唔少香港人的心態,希望香港保持開放型國際城市地位,生活方式及制度不變,呢個立場,林伯五十年不變。林伯乃香港最具影響力的論政者,亦即係抗拒中港融合扭曲所謂「香港核心價值」的最鮮明大旗,講白啲,就係信唔過你共產黨,誠伯入主信報,最大功德,就係令共產黨及眾多親北京商人想做廿幾年但未達的目標:收編信報,行近一大步(聽講經濟日報波叔亦曾洽購信報)。

香港主權過渡期間,誠伯變身超人,大發特發之道,絕對唔係買單邊成為北京紅人,而係同時亦代表咗英國在香港的利益(港燈、百佳都係與傳統英資綑綁埋一齊各自半匡市場)。企業併購除咗買賣雙方及投資銀行,好多時仲涉及一班高能量的中間人,呢班人少為公眾所識,但人脈深厚,食呢行飯最講信譽,愈是成功的中間人,愈無「忠奸」之分,接駁各種關係,同時為交易各方提供公平獨立的意見。假如誠伯係香港主權移交呢場世紀大刁最重要的中間人,確保香港唔會過急「去英迎華」,可能就關乎誠伯的信譽,從呢個角度睇,林伯退休賣盤,誠伯成為選擇不多的必然選擇,不足為奇,唔賣俾捋柒,唔通揾于品海咩。

在香港辦報會辦到冚家富貴的講法,源於80年代,高峯期每日發行的報紙超過70份,包括馬經及龍虎豹的期刊六百幾份,左中右中英美日歐,各種意識形態利益集團搶咪鬥大聲。香港慢慢由一個高度國際化的無掩雞籠,變成中國的一部份,大陸經濟越強,反共空間越細,右派報刊在97前後大量死亡,到今日每日發行的報紙已經得返20份左右,又借用林伯所言,此乃「中國日益強大下香港必然之變」之一。

林伯兩公婆同老曹,早幾年反枱,好多人唔明三個人二百歲點解會搞成咁,有一位高人網友(此君曾為信報長期讀者)早排指出,林曹割蓆,好可能亦只係香港社會面對中港融合洪流下,兩種意識形態的矛盾衝突的寫照縮影,一邊係唔理老七定老八揾銀至上的功利主義,一邊係誓不低頭的文人辦報花崗岩神主牌,共用一個針筒,拗撬難免。順叔睇返2003年廿三條立法時的投資者日記及林行止專欄,發現火藥味早已躍然紙上行間。哈公名言,飯照吃,共照反,唔係好明,點解係都要拗到臉紅臉綠朋友反目家嘈屋閉。

呢篇嘢長長臭臭,要多謝錢師傅的一句「新信報」,指教吓。唔好搞錯,順叔真心舉腳支持香港出現一份真正獨立的報紙,希望財經吳剛勇善之舉唔係得過講字。不過,講到揾錢的可能,要捐獻5000蚊Crowdfunding搞報紙,財經茄哩啡寧願買一兩手經濟日報股票放幾年,咩嘢滬港通,香港傳媒甚少留意冇在香港上市的A股,反之亦然,通條毛咩,中港財經傳媒互購合拼,遲早成為股市炒作理由。當然,滬港通真係掂,大把嘢買,有排都未輪到傳媒股,前提係直通車開得出,家陣講緊十月「去飲」,有乜豆腐冬瓜,一個唔覺意下個月港股直通車又延誤開出,大吉利是,到時大把籍口大插特插,內地同胞再開開心心上車嚟香港執平貨,唔通又叫人32,000點先嚟接火棒咩。

家陣香港好多民主鬥士,睇得出真心熱誠,亦有唔少古惑仔嘈嘈閉等收揞口費,臨尾講多句,報紙,幾乎份份都毒,不如睇多啲舊報紙,當年今日人臉桃花,新不如舊。

關連文章:
1. 財經林峯

醒神閱讀:
1. 錢志健的「對沖基金人生路」
2. 吳剛師傅的演藝人生
3. 投資者日記: 過不了有錢求功名這一關


同場加映:

一個教你蹈火海的人



名譽資深大波少婦
名譽資深大波少婦


39 則留言:

  1. 回覆
    1. 哈哈,禾成同嗌晒交的朋友講,nothing too serious嘛

      刪除
  2. 順叔好嘢!文章非常有趣!

    回覆刪除
    回覆
    1. 好耐冇見Victor巴打,射射繼續支持

      刪除
  3. 又長、又黑、又硬 ....... 不得不讚。

    回覆刪除
    回覆
    1. 篇嘢禾都嫌長,不過唔寫咁多背景資料(查實仲有更多),估計冇人會相信資深大波少婦原來可以咁流

      刪除
  4. 一個死士教人征服恐懼,另一個死士大大聲講我恐懼,真係唔知邊個係豬一般的隊友。

    回覆刪除
    回覆
    1. 痴痴呆呆死埋一枱,財經林峯應該跟財經吳剛踩吓炭

      刪除
  5. 回覆
    1. 馬沙哥,禾仲有財經黃夏蕙、電視阿桑奇、政治小柏林未寫,一篇五毛,發達囉

      刪除
  6. 「政治兩極代的地方,有作用力就會出現反作用力」

    應該是"兩極化",不是"兩極代"

    回覆刪除
  7. 順叔,呢篇文過癮抵死兼幽默風趣,要bookmark咗佢!

    回覆刪除
    回覆
    1. 苦瓜哥大駕,失敬失敬。
      禾有幫襯你個專欄的,不過成日都攞唔到AM730

      刪除
  8. 教踩火坑,睇到呆咗。咁都引到咁多人跟,又難怪佢玩上癮。
    我都贊成多一份有質素嘅財經報紙,不過佢搞就冇期望咯。

    回覆刪除
    回覆
    1. 等禾又引用吓網友在順叔Facebook的留言(提出「老曹林伯割蓆論」的,就是呢位人兄了):

      "財經丶宗教丶政治,三味都係相尅的邪門事業,如果有人話自己三瓣皆通而且人格高尚正義過人的話,你仲唔見到兜路走?"

      刪除
  9. 「街坊集資(Crowdfunding),每位散戶募捐助5,000蚊(港元,下同),就可以成為股東,兩萬友落搭,湊夠一個億」係咪即係非法集資?證監好似有條例?但當Donation算唔算集資呢?

    回覆刪除
    回覆
    1. 簡單重温吓幾句錢師傅的公開言論:
      (1) 在Johnny Lombardi的山雞中文台做主持,就話參與「創辦中文CNBC」
      (2) 在Man Investment Product做sales,就話係「最大型對沖基金Man Group的地區主管」
      (3) 逢星期日花10粒鍾寫信報專欄

      Crowdfundingi搞新信報?十劃有幾多撇,唔使估了

      刪除
    2. 相對之下,Master Firewalker反而最有說服力

      刪除
    3. 真係多奇人異士搞手,一個教人踩炭,一個連入大學都唔夠分,帶領香港人踩炭式爭取民主,唔死一身散

      刪除
  10. 小妹是女子,好懷念吳剛師父的胸肌,我覺得他可以轉行做健身鴨!BTW, 真係有資深大波少婦架 ─> ATV 宮雪花. 順叔你爛口得黎好有智慧,小妹佩服!:)

    回覆刪除
    回覆
    1. 爛口禾認,智慧就咪講笑喇。禾都好想亞視重播醉拳王無忌

      刪除
  11. 佩服!

    之前見佢玩踩炭, 班信徒仲要燒燶腳板底已經係勁搞笑, 原來仲有鐵布衫神功之深喉斷箭, 連硬氣功都識, 佢不如去廟街擺檔, 又或者 high class 啲教中剷子女贏在起跑線.

    http://magician__yang.mysinablog.com/index.php?op=ViewArticle&articleId=2707979

    又, 如果佢真係揸盤,一日48小時都唔夠用喇, 又邊得咁多時間出來做正義超人? 佢自稱「代表」香港金融界, 又唔見佢出來參選功能組別?

    http://magician__yang.mysinablog.com/index.php?op=ViewArticle&articleId=5304890

    回覆刪除
    回覆
    1. 漏咗大魔術師,財經吳剛你話佢完全冇料,又唔完全係,不過拍埋佢向受眾投射的形象,大家應該知道乜事

      刪除
  12. 哈囉 ! 順叔,一直都好鐘意你個Blog,又好笑又多野學 ! 另外,希望你唔好介意,唔知可唔可以醒下我,分享一下你的堅挺智慧,問一下題外話,請教一下你對 癲佬塔雷克 Nassim Nicholas Taleb 黑天鵝的看法。

    冇理解錯的話,佢重心係,世人在黑天鵝面前無能為力,晨早已放棄估市。記得佢話佢投資方法只分2種, 1是參與極高風險的極度價外期權膠遊戲,1是做極度保守膠,甚至純粹保留現金以等待黑天鵝,而中性風險的投資他均棄之敝屣,故在那10幾20點標準差的唔知幾時到黎既肥天鵝來到前,一直閉目流血輸錢。

    唔知你點睇? 又,你在金融武林界遊玩多年,唔知有冇見個有 癲佬 用此非主流的豪邁邪門盲丙武功,行走江湖而能生存至今?

    牛頭角宅男 K os 上

    回覆刪除
    回覆
    1. 黑天鵝白切雞呢類書仔,禾已經冇睇冇理十年八年。點解Adam Smith會被捧做經濟學祖師爺爺 (養起佢的銀行世家後人Emma Rothschild都話所謂「Invisible hand」極其量只係一個「ironic joke」)?點解1968年(冷戰期間)會無尻神神爆過諾貝爾經濟學奬出嚟(同期美元開始取代黄金),狂捧「自由」市場?2008年之後仲講自咩由咩市場?邊條友因乜嘢經濟、投資理論大紅特紅,唔會死錯人的(好似阿GEM在大陸會紅,明哥就冇乜可能發圍),所以禾近年對呢味嘢已經完全失去興趣。如果將「黑天鵝」簡化做逢股災執平貨,禾係認同的,不過唔覺得有需要寫幾百頁一本書咁囉。

      刪除
    2. 兩分鐘曉通經濟學:
      http://youtu.be/LD2vGgZh_cA

      刪除
  13. 網誌管理員已經移除這則留言。

    回覆刪除
    回覆
    1. 咁不如盼望禾燒炭好過。順叔絕對冇膽,亦絕對冇興趣掂呢壇嘢

      刪除
    2. 為免麻煩,唔好意思

      刪除
    3. 果然厲害! 呢個世界真係任有神嘅!!!!

      刪除
    4. 周公恐懼流言日,
      知命王莽下事時。
      其時若是身先死,
      一生忠偽又誰知?

      刪除
  14. 好文,讚。說到橫跨財經丶宗教丶政治三味,仲有位黃元山,絕對令小弟兜路走,不過看來順叔對佢無乜o野。

    回覆刪除
    回覆
    1. Think the big difference is he doesn't bloat his professional credentials for populist sedition

      刪除
  15. 順叔會不會寫寫梁振英或者第一号梁粉陳啟宗?

    回覆刪除
  16. 會唔會寫下亞記個國際視野教授?

    回覆刪除