變型金礦（下）

柯。。。柏文。。。麥加登。。。

上回講到，作為港股當中變身最快最多的國際資源(1051)，近幾年終於冇得變住，放棄在馬達加斯加掘黑金，游過去印尼蘇門答臘開金礦，買咗個轉手多次的Martabe 金銀礦，挖足三年，上星期終於掘到，管理層即刻上演大戲，抬住嚿金影相派通街，又四圍接受傳媒訪問。

一個礦無論蘊藏量幾豐富，礦主幾好賺、採礦成本高低，取決於表面的廢石礦層有幾厚，去到黃金礦床要鑽幾深。

紫金礦業(2899)個紫金山，當年出名成本低易開採，紫金公司網頁記載咗一個典故，話說在1997年底，紫金曾經用過千噸炸藥，將成個紫金山頂炸開，爆破移走的山體量，超過100萬立方米，等如10隻巨型航空母艦，從此紫金山可以露天採礦，不過呢，用炸藥粗暴扭轉百萬年的自然之力，紫金山成個山體亦變晒，呢間曾經被中國國家副主席習近平(當年做緊福建省省長)公開稱讚「效益好、環保有創新」的中國第一金股，近年經常出現高污染奪命事故、砂霸崩圍咁，極可能就係當年(及多年來)透支大自然的咭數。

近年全地球環保意識高咗，唔係個個國家只求經濟增長，妄顧子孫福祉，正正經經由零開始建立一個礦場，難度唔細，好似中信泰富(0267)咁，在澳洲個鐵礦2006年已經買咗返來，搞到今日都仲未投產，成本超支仲要一超再超，

中信泰富可以話係中信集團的「面子工程」公司，成隊國家隊照住，澳洲個礦艱苦經營6年都未投產，國際資源個金礦，規模當佢只係十份之一，但係亦需要由零開始建立管理、鑽探、工程團隊，呢頭啱啱先掘嚿金出嚟，嗰頭管理層又同傳媒講，要擺脫「只此一礦」的經營模式，要收購亞洲其他金礦項目，仲要係取得控股權攬晒上身嗰種，老實講，掘幾十萬盎司黃金上嚟先講嘢啦。

印尼蘇門答臘掘金，政策環境，好似紫金當年「福建第一爆」咁胆正命平又有政府高官力撐，定係好似澳洲咁諸多限制工會又麻麻煩煩，最好搵啲印尼華僑問吓。不過呢，有啲公司，研究太多係多餘的，印尼的礦務政策、環保監管、勞力保障、外匯風險、政局變化，順叔冇諗住花時間樣樣調查。

可以咁講，除咗公司名帶住「資源」兩個字的，大家亦可以留意吓有幾多間公司個名有個「礦」字，斷估唔過百都有幾打，應該係內房股之後最熱門的香港上市公司種類，內房股大部分仲賺緊錢兼有息派，一眾變型金礦有幾多間有錢賺，可能一隻手數得晒，一間可以話例外，幾十間就唔會是偶然，最少可以推出一個結論，就係「炒礦」好搵個「開礦」。

如果只係想對一間公司攞個「感覺」的話，最簡單直接就係望吓管理層坐住乜人，唔識國際資源主席趙渡，又唔識邊個係Owen Hegarty，好彩仲有個前滙控(0005)恒生(0011)大班柯清輝。國際資源當日揾柯大俠入局的消息公布後，股價單上爆升幾十巴仙，於是出現「柯清輝」三個字已經值廿個億之說。

一個導演如果同幾個演員合作開，主角又好茄哩啡都好，唔會希望個班底的成員，接其他戲接得太爛，拍到Cheap晒，可能「柯清輝」呢個品牌太好，人緣又廣，個個爭住碌佢張咭，唔做銀行大班之後，反而大把世界，國際資源之後，又接拍中策(0235)蛇吞象南山人壽的大戲，最近思捷(0330)一眾台前演員大地震，柯大俠又捱義氣自己坐正，呢三間公司加埋，散戶點都有個「感覺」啩。

「柯清輝」呢個品牌賣得，因為37年銀行大班的經驗唔係講笑，工行(1398)都搵佢老人家頂梁錦松個非執董職位，滙控呢排被人告到甩褲，又涉嫌操控倫敦銀行同業拆息，又話涉及洗黑錢，好彩柯大俠走得快。

銀行非礦洞，何處惹塵埃，金融世界到爛泥石坑，世間竟無淨土。

關連文章:
1. 變型金礦（上）、（下）
2. 思捷女屍（續集）
3. 柯大俠盜（續集)

伸延閱讀:
1. 名字帶「礦」、「能源」、或「資源」的公司

王子個頭（下）

上回講到，李寧有限公司(2331，下稱「李寧公司」)上星期宣布人事大變動，老臣子行政總裁張志勇退下火線，主要股東私募基金TPG放咗條高層落去睇數，仲要創辦人兼主席李寧多啲蒲頭，專注管理「對外事務和關係。

除咗人事變動，李寧公司仲提出，分三個階段的策略調整，今年剩低6個月，就係第一階段的短期措施，劈頭第一句，亦是新管理層一再重覆強調的一句，就係清理存貨，即係去貨要錢，跟住就係改善銷售渠道。

TPG入股半年，已經忍唔住出手，而且仲要係大動作，唔係求其放個二打六入董事局做線眼，而係用個高層擔任近乎全職的工作，更提出救火式的改革，可見李寧公司盤數真係唔太掂，下半年大劈價去貨，甚至捐去賑災，今年條數可能會幾核突，舊年純利唔夠4億元(人民幣，下同)，換句話講，李寧公司最差的財務數字，可能仲未完全反映。

香港上市的幾個中國體育服飾品牌，就算係「老」大哥李寧公司，都只不過廿幾年貨仔， 好多成功中國企業，例如騰訊(0700)，查實係老翻外國成功模式，不過外國互聯網公司入唔到大陸，李寧公司就要同Nike等外國一流品牌在自己地頭拗手瓜，講緊中國消費者，查實唔係太愛國，唔係咁鍾情國貨，對唔少國產消費品更充滿戒心。

Nike的招牌，已經響亮到，一間體育用品店或百貨公司，唔放一堆鐮刀牌產品，顧客會覺得奇怪，即係話Nike可以真正以批發形式散貨，唔雖要依靠大量的加盟店，甚至連專門店都唔使開咁多間，中國競爭對手仍處於靠舖頭開到全國都係嚟做品牌宣傳，李寧公司去到舊年底，特許經營店及自營店，仍然高達九一之比，存貨賣唔去，都係自己捉蟲，唔想見到大量加盟店消失破壞本身的零售網絡，唯有回購存貨。除咗李寧公司，斷估採用類似管理模式的思捷(0330)，如果盤數冇花冇假，應該亦受同樣問題困擾。

李寧公司知道唔掂，大刀濶斧改革，未來計劃幾行字講晒，核心訊息清清楚楚，相對之下，思捷「批發」業務出現問題後，搵條冇乜人識的靚佬，鑊鑊同你遊花園講品牌概念，乜嘢「喚醒睡美人之吻」，一年貨仔自己都跳埋船，兩間公司拍埋一齊，李寧公司的救亡行動實際好多囉。

李寧公司而家有兩大機構投資者睇住盤數，可以出古惑的空間應該好細，摷返李寧出嚟做投資者關係，亦係正路做法，雖然唔知體操王子過去廿年發生咗乜事，但比起同國際資源(1051)、中策(0235)等扯上千絲萬縷關係的思捷新任主席柯清輝，李寧似乎靠得住好多囉。

如果話LV對Prada(1913)，大家仲可以講吓品牌價值，而家中國體育用品股跌到咁殘，查實係時候暫時唔睇品牌，望住幾間公司的救亡方法，判斷吓各自的企業價值。

大家可以諗吓，就算國產品牌幾老土冇創意，係咪每一間都唔識進步，中國消費市場，又會唔會一間土炮都裝唔落。李寧公司最新市值，50個億都唔夠，唔計品牌乜乜物物，講緊一盤可以滿足近萬個服飾銷售點的生產力，清除存貨壓力，執一執盤數及管理，一年賺幾個億唔係太過份要求。

連生意都唔講，TPG手上的李寧公司的換股價，接近8蚊港元，扣埋4年4厘息，當佢望住6、7 蚊價位，TPG放個人落去李寧公司全職打工咁滯，冇理由只係為咗4厘息，目標4年後是要貨唔要錢。

市場往往向相反極端揈得太遠，幾年前李寧公司30倍市盈率都大把人追，相對之下，大家亦可以諗諗市場對呢個行業睇得太淡，大佬，財經茄哩啡就唔相信13億人冇人做運動，個個只會幫襯休閒時裝。

關連文章:

1. 王子個頭（上）、（中）、（下）
2. 王子壞孩子（上）、（下）
3. 體育戰場（上）、（下）

伸延閱讀:
1. 土豆網《武尊少林》片段: 李寧誤窺郭藹明全相 
2. 土豆網《武尊少林》片段: 李寧送佛珠請郭藹明食檸檬

柯大俠盜（續集）

恒生(0011)大班、工行(1398)非執董．．．

國際資源(1051)、中策(0235)、思捷(0330)．．．

俠耶？賊耶？

如果國際資源真有資源，中策真個併購有策，思捷女士應該唔係女屍。

思捷市值１３０個億，「柯大俠」呢個品牌，今次又會值幾多個億？

關連文章：
1. 柯大俠盜

亞洲金融

(刊於2010年3月11日am730)

過江龍香港上市，披露要求超高，上市聆訊踢爆太多污糟嘢，想賣得好價都難，可能見到俄鋁搞到咁，AIG分柝AIA香港上市，臨過堂彈弓手，寧願TRADE SALE套現，一炮過賣斷俾保誠。

走得快一定有古怪，香港散戶唔洗恨咁多，AIA單刁最大人間意義，係話俾大家知，唔少西方老外，極度睇好新興市場保險業，大拿拿35億美金擲過嚟眼都唔眨。

如果大家相信呢個投資方向，其實唔少細細粒但平好多嘅選擇，例如亞洲金融(0662)，就係一隻迷你版新興市場保險股，由前行會成員陳智思打骰，06年賣咗亞洲商業銀行之後，仲坐住19億港元(下同)現金，至星期四，市值30億多少少，市盈率9倍，幾乎零負債，市帳率0.69倍，細細件，幾抵食，最抵死，冇乜大行分析員COVER，唔會被人搶貴晒。

亞洲金融同大股東控制嘅盤谷銀行，近年拍住上買落唔少好嘢，包括5%中國人民人壽保險、上海地產項目，仲有康民國際兩成股權，當中泰國康民醫院，聽講做旅遊醫療相當出色，大吉利是順叔唔想去試，不過陳智思雖然高大威猛，但據聞試過幾次入廠大修，由佢投資醫療項目，包括計劃中嘅香港私家醫院，呢瓣業務，增長斷估會快過保險本業好多。

投資呢類保險醫療股，未必會有爆炸性回報，不過可以穩中求勝，由一個有政治野心嘅人掌舵嘅公司，小股東被搵笨風險亦好低，最低限度，好過買中策(0235)，成個AIA都就快甩手，南山人壽單刁，都就快拖咗半年…

關連文章:
1. 柯大俠盜

柯大俠盜

(刊於2009年11月13日am730)

(標題為後期改動)

中國人傳統民間智慧，話人不可以貌相，但又興睇掌相命理，有時唔知信邊個好。

順叔聽聞，前滙豐(0005)恒生(0011)大班柯大俠，手掌有條好深斷紋，聽講男人斷掌，左手握兵符，右手握財庫，唔怪得柯大俠做賓架幾乎做到一人之下，退咗休，仍然咁搶手。

艾爾敦咬長糧，最多寫BLOG跑馬仔，柯大俠就唔同，離開獅王仲大把人搵佢重出江湖。早幾個月國際資源(1051)，搵柯大俠做非執行副主席，消息一出，股價爆升近四成，市值急漲，於是出現，「柯大俠」三個字值20億嘅神話。

做得大俠，就算同班賊埋堆，都係羅賓漢，柯大俠呢個品牌，對於一啲靠印公仔紙大規模集資做LBO嘅變身公司，特別有穩定投資者信心作用，同樣準備蛇吞象嘅中策，搵埋柯大俠做CEO，年薪過千萬，再加六百球認股權，換股價一毫，消息公佈後中策最高爆上一蚊，柯大俠帳面可以賺5.4億，假設做滙豐大班平均一年袋一球美金，柯大俠要做到130歲，先賺到咁多錢。

嘅然柯大俠咁搶手咁值錢，順叔自然會諗，咁點解滙控當日，又會捨得放走柯大俠，唔通唔夠「金融界梁朝偉」王冬勝靚仔? 柯大俠今年五月退休，而家都係60歲，鄭大班今年六十有二，仲做緊滙控執董，同集團CEO紀勤爭屋住爭櫈坐，大俠同獅王唔夾冇得留低，一係太有性格上唔到位，一係滙控根本唔識揀大班，一係有啲不為人知理由…

動輒過千億LBO，好多時，都係大市見頂訊號，中策(0235)同博智收購南山人壽，廿零億美金，話大唔大，不過中策值唔值過千億，可以睇下，成間財險，都唔夠七百億。大孖沙擲幾十億，賭台灣監管當局最終會通過交易，跟唔跟，又可以睇睇，中移動(0941)入股遠傳，講緊一成幾股權，反對聲音遠遠唔及南山人壽，單刁四月公布，到而家，仲未知幾時可以埋單。

伸延閱讀:
1. 誰明賊佬心 - 中賊集團
2. 艾爾敦的網誌: Eldon-Online