Best Blogger Tips

2010年1月29日星期五

大行小報告

(刊於2010年1月29日am730)

財經傳媒,日日講故仔餐餐要開飯,冇米落鑊,最好解決方法,就係食大行報告。

不過所謂「大行」,好多時係指歐美投資銀行,中資金融構機,企業融資部門冇乜大刁,招牌唔夠巴閉,被人潛意識當成「細行」,研究報告寫得幾好,都冇乜人留意。

十年前,香港上市公司唔夠七百間,今日,超過千三間,大家可以問吓,大多數投資銀行研究部,期間分析員數目有冇增加一倍,亦即係話,港股有唔少滄海遺珠,在「大行」雷達覆蓋範圍以外,未受到應有注視,所以好多時,中資投行有關冷門企業分析,尤其資產收埋內地果啲,更有參考價值。

例如,神州數碼(0861),中銀國際08年11月開始叫人收集,當時股價兩蚊,過去一年一直唱好,到09年11月,仍然叫緊人買,目標價HK$12.1,到今日,中晒。中金唱好遲左少少,但如果信佢,舊年6月,股價六蚊樓下上左車,到今日亦已經有一倍利潤。

掉轉頭,大摩,夠「大行」未? 佢地位電子股分析員,到星期二,先至將神州數碼納入分析範圍,叫人買、睇HK$17,後知後覺,算唔算水尾,下次再講,不過同一位大摩分析員,過去兩年剩係顧住聯想(0992),如果聽佢枝笛,舊年年初,以為聯想只係值HK$1.3,沽左,到今日反彈至五蚊樓上,喊都無謂。呢個故事教訓我地,「大行」雷達範圍,亦係市場焦點所在,跟住大圍走,賺大錢幾時輪到你?

沒有留言:

發佈留言