禾桿冧磚頭

(刊於2010年1月22日am730)

東方海外(0316)將上海房地產業務，廿幾億美金賣俾嘉德置地，特殊收益逾80億港銀，消息曝光前一個月，股價抽升七成幾八成，冇春江鴨，打死唔信。

東方海外賺得多，原因簡單，就係買得早，部分上海市中心靚地，董建華仲係香港特首時期，已經買落，連國家領導人家族公司，都收埋唔少地多年未發展，中央政府要透過打擊囤地增加供應，難度有幾大。東方海外套現，可能只係聞到政策風向，冇眼屎乾淨盲，未必代表唔睇好後市，但接貨嘅坡佬，心口就肯定有個勇字。

香港唔少上市公司，收埋收埋嘅內地磚頭，可能多過好多中小型內房股，東方海外一個轉手，將內房價值釋放出嚟，非同小可，分析員如果睇唔到呢舊非核心資產，隨時斷正，例如麥格理，12月7日先出報告重申35蚊目標價，一個月多少少，東方海外股價已經標上55蚊水平。

好多兼營內房業務嘅綜合企業，各項資產價值，一加一再加一都係等如二，例如和黃(0013)，同長實(0001)夾份在內地掃左唔少地，淨係住宅物業，已經超過一千萬平方米，東方海外個土儲，大約百五萬平米，除開萬二港銀一平米，和黃土儲分散全國，當同上海有五成折讓，個大陸土儲都值14蚊一股，分拆獨立上市唔係冇可能，呢個亦可能係上實(0363)，收購中新地產(0563)考慮之一，買土儲送隻殼，好戲可以陸續上演，驚死投資者見佢唔到。

講多句，唔少「中」字頭巨型國企，資產負債表，都有唔少內房磚頭，有興趣，是但搵間望望。