Best Blogger Tips

2010年2月12日星期五

恒大前傳

(刊於2010年2月12日am730)

中國首富香港地址

恒大(3333)擁有全國最大土儲,主席許家印,貴為中國首富,理論上地球邊忽都住得起,不過根據招股書資料,擁有香港身份證嘅許生,住址係柯士甸道祥景樓6樓A一個幾百呎單位,認真估佢唔到。

一間公司資產幾大都好,冇現金,都要執粒,同樣道理,紙上富貴,唔代表一切。或者祥景樓係許生發達風水屋,又或者超級富豪行事,凡人本來就難以理解,例如過去兩個星期,許生幾個動作,又認真令投資者O晒咀。

1月29日,許生抵押幾億股份,向工商銀行借四千萬美金兩年期貸款。

2月3日,首富開始連日增持恒大,總共用左3億港紙左右,同工行貸款金額差唔多,但恒大股價繼續直插,舊年11月5日HK$3.5上市,到2月8日,收市最低見過HK$3.14。

香港首富誠哥,增持長和下下億億聲眼都唔眨,堂堂中國首富,要問銀行借錢,已經夠奇怪,出動到抵押股份借錢,更莫名其妙,散戶夠膽投資恒大,首先要夠耐性,睇完佢本招股書。

08年恒大第一次上市失敗撻Q,全世界銀行又開始收緊銀根,恒大先後搵左兩班投資者入股,包括美林同彤叔,入股價介乎每股HK$1.12至HK$1.65,總共籌錢近10億美金,許生拍心口保證班大鱷,在恒大上市後一年內,大約有82%回報,否則個人最多賠償16億港紙!幾單刁相關條款,複雜到爆,呢度只能高度概括,但大家自己可以計下數,恒大股價跌到乜位,中國首富就要蝕到入肉。

許生用恒大幾時上市、同上市後股價,同大鱷豪賭,恒大就恒大,燒賣就燒賣,其中一間對沖基金,已經執咗粒,美林都變左美銀美林。

作為恒大上市聯席保薦人,美銀美林本身坐住一大抽恒大股票,有許生包底,唔會輸得去邊,但係該行分析員,一月初仲叫投資者買恒大,作為一名財茄,順叔唔敢學中國首富賭得咁豪,不過可以寫包單,美林美銀話恒大一年見六蚊,錯硬。

沒有留言:

發佈留言