笨象再舞

(刊於2010年2月 19日am730)

滙控(0005)舊年冇盈利預警下，話大家聽純利急跌七成；牙斬斬話冇集資壓力忽然又攤大手板供股，在股東心目中，最少要記大過兩次，下個月一號公布09年業績，最好醒定定將功補過。

股市一年，可以係天堂地獄。舊年今日，報紙頭條，講緊唐唐見滙控香港高層，叫佢地唔好裁員，行政總裁紀勤，成個二月幾乎冇公開露臉，為世紀供股摸底探溫。

今年，紀勤風騷得多，將辦公室搬翻香港(聽講仲鳩佔咗鄭大班間山頂大班屋)，二月翻工第一日，親自去間小學教班細路理財；虎年第一炮，又去旺角分行派利是(聽講五百封公價廿蚊)俾客仔同員工，同舊年今日班巨頭嘅嗱口嗱面，雲泥之別，如果輕鬆源於自信，紀勤近排公開活動所流露意態，或多或少，反映咗舊年份成績表有幾靚仔。

滙控星期四香港收市HK$82.55，同舊年今日比較，反彈大約六成，要去翻百五蚊07年歷史高位，要升多八成，不過唔好忘記，大笨象世紀供股，股本膨脹咗50億股，計埋落去，現市值一萬四千幾億港紙(下同)，同07年高峰萬八億，就唔係差太遠。

舊年今日，唔少大行互插，通街「大行唱衰大行報告」，例如美林(今日已經衰咗變美銀美林)，預期大笨象股價最低見HK$49，高盛仲淡，睇HK$42，結果最淡嗰個都未夠淡，跟住發生乜事，唔好再提。今日，兩間投資銀行嘅滙控目標價，都放享HK$120樓上，如果預測準確，滙控市值到時會超過二萬億有突，仲勁過07年高峰，大笨象再會跳舞，難度高咗少少，要一年內做到，機會更細。

以前大笨象有三隻腳，美歐亞齊齊歌舞昇平，今日跛一隻斬一隻，單吊新興市場，跳舞係咪勁得過07年隻大笨象，就要問紀勤，唔係調教吓細路派吓利是咁簡單，中國呢杯茶，慢慢歎。