中旅之旅（上）

(刊於2010年7月29日am730)

如果有人識得李巧珍，麻煩代為轉達：「喂，阿珍呀，我係順叔呀，喺呢二十日嚟，我一直有句說話想同你講，其實．．．我撐你！」

導遊鬧遊客，係態度問題，香港變「購物地獄」，屬制度問題，冇理由要小人物揹大黑鑊。

識得拍低阿珍鬧人，再擺條片上網放大事件者，斷估唔係文盲，如果唔明白，世上冇免費午餐道理，貪著數參加超低價團，又想有好似林行止咁，搵個牛津歷史系畢業生做導遊，唔該去天堂發夢。

03年自由行開始，消委會接獲旅客投訴，由千零宗，增加到08年近三千宗，但一連串保障旅客措施之後，包括內地團六個月購物退款保障，投訴舊年已經跌到697宗，呢個數唔假得，香港已經做咗好多嘢，大陸當局，攞住阿珍鬧人片段就發出旅港警示，同外國傳媒，捉住一兩件大陸同胞隨街放飛劍鏡頭，大做「醜陋的中國遊客」文章，冇分別。

大陸唔少人，身家暴發，眼界未開，要在呢班友仔身上賺錢，唔容易，導遊係咁，旅行社都係咁。
旅遊消費，在大陸只係近三十年之事，市場大，增長快，但高度開放，至07年底，全國近二萬間旅行社，競爭激烈，零團費強迫消費，絕對唔係香港獨有毒瘤，經營得法，尚且搵食艱難，管理不善，更加冇運行，最好反面教材，香港中旅(308)，打正「中國旅行社」招牌，打滾超過八十年，都仲係唔上唔落。

中旅92年香港上市，97及07年，兩個熱炒中國大浪，股價兩度爆過上6蚊樓上，但好快打回原型，長期在一兩蚊水平徘徊，今個星期國務院又出招，振興旅遊業，又有唔少人，條件反射式翻閹呢隻僵屍紅籌。

香港老牌中資當中，如果中旅話自己管理質素排尾二，怕且冇人敢爭第尾。作為一間香港旅行社，中旅幾有競爭力，大家可以諗諗，對上一次外遊或者翻大陸，幫襯中旅係幾時，服務質素又係點，心裡有數。

做大陸團港澳遊生意，中旅以前仲有少少優勢，03年自由行，CEPA開放埋港資經營出境旅遊市場，救咗香港旅遊業一命，但中旅財路斷正，競爭力盡失，據國家旅遊局數字，04至08年，大陸旅遊行業總收入增長69%，期間中旅旅行社業務收入，增長唔夠三成，個餅大咗，但中旅搶唔到幾多肉食。

今時今日，講緊大陸有銀士去巴黎上鐵塔捽腳指，中旅仲玩緊錦繡中華世界之窗，兩個全球最巨型A貨，仍佔公司收入一成，不思進取，舊年底發展嵩山少林景區，已經係近年鮮見大動作。

唔少人仲憧憬緊，中旅有母公司注資呢樣嘢，但中國旅行社，可能係唯一「中」字當頭央企，又唔被阿媽當係親生仔嘅國企，點解，下回分解。

-- 中旅之旅（下）