香港乜都得

(刊於2010年9月24日am730)

今個星期得一日稿，唔講股票地產，講吓公共財政。

中秋佳節，收到稅單，臉色同稅局信封一樣，由青轉白；打開報紙，見到納稅人可能要埋單，四百億(港元，下同)攪亞運，火都嚟埋。

帶頭攪事者，又係呢位阿叔，香港最冇功能議員，亦即係體育文化演藝出版界代表霍震霆。如果真係去馬，最大鑊係政務司司長唐英年，可能要學十年前嘅陳太，當街扮傻仔大嗌「香港一定得」。

上網望吓份文件，論據九唔搭八，資料應有盡冇，一份涉及四百億諮詢文件，嗱西程度可以話空前絕後，仲講明選手村最後可能成為地產項目，有減免地價優惠，驚死唔觸動香港人條最敏感神經，行政會議咁都過得，斷估有人知道份嘢掟出街，一定萬箭穿心，但唔想反對香港體育發展呢啲咁高尚目標，順水推舟，送呢嚿政治豬頭骨一程。

作為一名茄哩啡評論員，順叔絕對樂意上呢個當，幫手射幾支箭。

香港保持巨額財政儲備，美其名係積殼防飢，其實係冇人諗到應該點用，四百億搞亞運，不如好似前自由黨田北俊咁講，開倉派米。

如果話投資二三百億，起多啲可以全民共享嘅體育設施，又或者為本地運動員提供多啲財政支持，相信唔會太多人反對，但係無喱頭要推動香港做乜嘢「國際體壇盛事中心」，使多一蚊都嫌貴。大佬呀，全世界，有邊個國家邊個城市，可以話自己係「國際體壇盛事中心」?

愛國可能焗住要愛國寶，但推動體育風氣，絕對唔需要體育盛事，攪奧運馬術拆咗體育學院，就唔覺少咗人賭馬，多咗人騎馬。少少創意，加埋多年堅持，好多時會好到意想不到效果，香港兩單有代表性體育盛事，一個係七人欖球，一個係馬拉松，都係經營多年成果，香港政府應該學吓兩間主辦老牌英資，乜嘢叫長線投資，整多啲好似長洲搶包山咁，抵食又大件，唔洗吓吓幾百億乜運物運大龍鳳嘅嘅。

真係有心搞亞運，高招應該係搞深圳門。港深聯合申辦亞運，完全乎合中央推動深港融合主調，使費最少慳一半，大型體育設施資源，亦唔會重覆建設，深圳肯去馬，香港好難托手肘，淨識得挾住香港政府抽水，可能係人脈問題，更可能係水平問題，霍公子好好醜醜，都係文化界四分一個代表，西九董事局，冇人俾臉留張櫈仔佢坐，唔係冇道理嘅。

NO REPRESENTATION， NO TAXATION。搞亞運，香港一定唔得，納稅人埋單，唔係唔得，不過唔該俾納稅人投票，將冇功能議員踢走，咁就乜都得。