(刊於2011年4月14日am730)
 |
| 呢嚿嘢值300億人仔？！ |
今期開REIT，睇睇長和系隻地產投資基金，匯賢產業信託(87001)，抵唔抵玩。
呢個世界，好多嘢名高難副。長和系個朵香港夠響，系內有乜資產分拆上市，多數成為全城焦點，不過長和系近年拎出嚟賣嘅貨色，除咗已經私有化咗嘅和電國際自有交待，大部分其實唔湯唔水。
十幾年前隻tom仔(2383)，而家應該叫做老tom，又分拆又私有化，搞嚟搞去唔知做緊乜，仲記唔記得隻長江生命科技(775)，如果老闆唔係叫做李嘉誠，可能已經變咗仙股，仲有隻泓富(808)，唔計派息，亦係越做越縮水。
長和系資產上市，總會載住唔少綽頭，匯賢今次招股，創香港人民幣計價股票先河，加埋名牌效應，聽講孖展又係熱爆，斷估又係炒鑊甘。
香港散戶鐘意炒新股，已經到咗怪癖程度，如果認購一手兩手當抽獎，無傷大雅，但係大手做孖展，甚至追貨炒所謂「半新股」，只可以用「低B」兩個字形容，人哋班大孖沙或芬佬，就算唔係頂頭錘，承銷團班SALES，會詳細講解圍飛情況，新股盤路，大戶及散戶消息唔對稱程度，遠高於二手市場。
呃夠篇幅，入正題。
匯賢今次拎4成股份出嚟賣，斷估上限定價，即係集資近112億(人民幣，下同)，又即係話呢隻嘢，市值279億。未睇招股書之前，以為長和系成嚿大陸商業物業拆出嚟賣，集資過百億唔算太跨張，一望，原來匯賢旗下資產，只有北京東方廣場，嚇咗一跳。
匯賢值乜價，第一個應該問嘅問題係，如果閣下有279億現金，你會唔會走去北京買一個業權唔清唔楚嘅商場，又即係東方廣場值唔值咁多。香港地少人多，五體不勤戶外活動唔多，拍拖食飯睇戲，全世界焗住行商場，北京情況原全唔同，東方廣場地段唔錯，不過唔好幻想廿年後會成為另一個香港時代廣場，可以養起半間市值千億巨企。
跟住就要問，長和系自己眼中，東方廣場值幾多錢。匯賢招股書同你講，至1月底，東方廣場估值314億，上市價折讓超過一成賣大包，不過鏡頭一轉，長實(001)最新年報同你講，舊年攤佔「共同發展公司投資物業之公平值增加」，有47億港元之巨，有關特殊盈利，主要來自東方廣場，長實佔東方廣場33%，即係公司對東方廣場估值，2010年，膨脹咗140億港元，呢度就要問吓啲專業測量師，點解臨上市之前，相關物業資產，估值突然膨脹咁多。
下回再續。
伸延閱讀:
1. 東方廣場官方網頁
2. 下載香港人網「匯賢冇肉食」錄音
3. 東方「女超人」（資料來源不詳）
#
沒有留言:
發佈留言