Best Blogger Tips

2011年7月14日星期四

貸評清剿(上)

(刊於2011年7月14日am730)


解決全球債務危機最佳辦法

財經茄哩啡今期飾演法官大人,幫信貨評級公司評吓級,特別睇睇近排在中港金融界被圍剿嘅穆迪,抵唔抵剿,由「債」講起。

地球是很危險的,近月每日打開報紙,歐洲國債有違約風險;中國地方債又話有個黑洞;美國仲大劑,國會隨時玩嘢,上演否決提高國債上限提案驚魂;日本?全國債務更加係經濟兩倍,咁情況,資金其實得兩個選擇,一係流向火星,一係留喺地球。

全世界突然充斥債務未日論,好大程度,其實係所謂「金融海嘯」後遺症,投資者對債務風險敏感咗、信貸衍生工具少咗、各種帳目透明度高咗,評級機構騰雞咗,加加埋埋,市場就成日好似危機處處。

最徹底解決問題方法,就係好似電影《Fight Club》最後一幕,一嘢炸清光債務記錄,所有爛數一筆勾銷,咁就一天光晒。美中歐日,既是債主又係債仔,四大經濟體系,並非有你冇我,而係我中有你,更是彼此最大貿易夥伴,攬住一齊死的話,全球資金對債券投資龐大需求可以去邊?孟加拉?火星?

如果資金被迫留喺地球,即係話你知,債務風險唔係冇,不過冇想像中咁恐怖,老套啲講句,只係淡友做低個市最大藉口,而呢樣嘢已經玩咗年幾兩年,玩得最開心者,咪就係標普同穆迪兩間美國信貸評級公司囉!

由橙郡到Enron到CDO,人類歷史上最激幾次違約事件,爆煲之前,信貸評級都係好到爆晒燈,即係話信貸評級機構,最叻就係車馬後炮。將債市規模,加埋評級影響力及真正作用一齊比較,話穆迪及標普係金融歷史上最出色財經演員,絕冇跨張。

以戲論戲的話,差一個英文字,人哋日本Moodyz,製作認真程度就高過穆迪唔知幾多倍。
國家審計署上個月公布,全國地方債總額10.7萬億元(人民幣,下同),穆迪聲稱「發現」呢份審計報告大有漏洞,低估債務風險幾萬億云云。

呢單嘢,順叔上個星期已經抦過穆迪一鑊,因為地方財政透明度極低,就算人行銀監,一直都掌握唔到最新最準確債務數字,所以國務院先畀把尚方寶劍審計署,全國起底查債,穆迪引用其他「官方數據」質疑審計署條數,肯定只係隨口噏當秘笈,話口未完,近一星期,由人民日報到中央電視台,由審計署到人民銀行,一有機會就反駁穆迪危言聳聽、計錯數、「違背專業機構應有的嚴謹態度」,官方口徑咁一致對外,咁重手炮轟一間外國金融機構,近年罕見。

美銀同RBS,09年初風雨仍飄搖之時,沽售國企銀行策略股份,從此有冇見過兩間歐美公司,喺中國有乜刁做過,穆迪今次得罪阿公,仲唔識死,日前又出咗份乜嘢「紅旗報告」,下回再續,睇睇份嘢有乜問題。

關連文章:
1. 貸評清剿(上)(下)

伸延閱讀:
1. 下載: 穆迪扯旗報告

沒有留言:

發佈留言