(刊於2011年9月29日am730)
綠城vs恒大，邊個爆先呢？（講緊中超啫．．．）
今期開綠城中國(3900)，近年內房股多過米鋪，竟然一直睇漏咗呢隻賭到咁大的杭州民企，今期放吓馬後炮。
今個星期，標準普爾又發功，今次針對內地樓市，警告如果明年住宅銷售回落三成的話，有一半產商可能爆煲，其中特別開咗六間公司名，包括綠城中國(3900)，仲有順叔打死都唔信的恒大地產(3333)。
標普呢個報告，其實都係馬後炮，由上星期至今個星期三，綠城連跌七日，股價暴跌超過3成，大市插穿萬七後彈上萬八，綠城都冇乜點郁，致命傷係9月22日，傳出話銀監會就綠城旗下房地產信託業務展開調查，除此之外，謠言仲有一大籮，包括綠地要向員工借錢集資、可能被迫以30億元人民幣(下同)出售中超球會杭州綠城，連公司考慮喺香港「退市」都有人傳。
以上種種壞消息，冇一個被證實，一隊中超賣唔賣到30億人仔？如果公司有資金壓力，大股東有錢都做股東貸款，又點會私有化間公司揹筆債上身？而家投資者個個變咗驚弓鳥，斷估市場上有唔少大鱷小鱷借勢做淡。
空穴點會來風，綠城如果穩穩陣陣，要散播謠言做低佢股價都唔係咁易，攞佢盤數及資料望望，又真係幾令人擔心。
 |
| 綠城老闆「宋員外」 |
至今年6月底，綠城股東權益，即係公司話你知有幾多資產淨值，有100億多少少，但總資產超過1,100億，淨係睇呢樣，已經知道呢間公司賭得唔細；當中又有總值370億資產，押咗畀「銀行及其他各方」，以取得信貸資金，公司本來應該有近100億現金，但連其中30億銀行存款都做咗抵押借錢；資產負債表以外，仲有近190億「或然負債」，嚟自擔保客戶取得銀行按揭去買自己啲樓，以上種種，都唔係一間穩陣地產公司應有表現。
過去年幾，十幾二十隻內房股喺香港債市集資，撲水超過一千億，雖則話利口幾乎全部雙位數字，資金成本超貴，但最少有錢應急，過去一年有冇喺香港成功發債，基本上可以成為香港內房商，劃分為穩陣同唔穩陣兩堆。
綠城成年冇喺香港發債，反而透過旗下幾個「信貸融資」平台籌錢周轉，下回再續，睇睇呢啲又係乜東東。
伸延閱讀:
1. 銀監會郵件通知要求信托公司上報綠城數據
2. 綠城集團面向員工集資
3. 海航30億收購中超杭州綠城？
4. 綠城澄清「香港退市」傳聞
5. 宋員外: 形勢嚴峻但比2008年要好
6. 宋員外: 賣不動就把價錢降到底
#
沒有留言:
發佈留言