Best Blogger Tips

2012年7月4日星期三

二零二七(下)

上回講到,中央政府要將香港同珠江三角洲搓埋一嚿,在香港總係遇到唔少有形無形的阻力,「十二五」規劃香港「被規劃」,七個粵港澳合作項目第一二炮,港珠澳大橋同埋廣深港高鐵,先後在香港司法及立法機關搞出政治大頭佛,看似巧合,實非遇然,搞到國家副主席習近平噏三噏四乜嘢「三權合作」,國家主席胡錦濤嚟到又十六字真言要香港管治團隊「登高望遠」。

特首梁振英當選之後幾個月,多次提及香港過去的「蹉跎歲月」,「失速」發展,斷估亦係睇到呢種情況,香港回歸15年,中國變強國,但係港人心仲未回歸甚至越行越遠,阿公要規劃一個有實力超越紐約東京的超級經濟城市群,搓嚟搓去都搓唔掂香港呢一嚿,梁振英上場後最重要任務之一,相信就係要扭轉呢個欲迎還拒的局面,利用粵港澳區域經濟發展,中和香港人心未歸的深層次矛盾,仲要做到無縫無罅。

近兩年七一回歸周年,北京領導人大鑼大鼓嚟香港,所謂「挺港」措施越「送」越多,查實已經講到越講越亂的地步,東一忽西一忽,七月第二個星期已經唔記得講過乜,明年今日好似又當「大禮」送多次。

舊年副總理李克強嚟香港,拎住「治港36條」,好多場大龍鳳,當時順叔寫咗篇《小強大禮》,怒炳當日的政策及內地事務局局長林瑞麟辦事不力,新聞及資訊發放亂過狗粥,而家睇返轉頭,公道啲講句,可能近年呢啲中港合作大場面,特區政府可能已經冇咗主導權。

舉個例,上個星期,出席香港慶回歸的中央代表團,包括發改委財政部人民銀行等中央部委,個個都有自己嘢講,例如財政部發人債,外管局講離岸人民幣等,五個部委又搞過一個聯合新聞發布會, 雖然聽講有個「新聞發放中心」,不過資訊發放極冇系統,咁多山頭,掟晒俾傳媒都處理唔切,幾場大騷,包括前海發展的聯合記者會,香港人如果想睇返當日講過乜,唔好話文字實錄或視頻,新聞稿都唔知去邊度搵,香港政府新聞處冇,深圳市政府又冇,去到前海管理局官方網頁都係乜都冇。

香港新聞處以前發放資訊好有系統好有水平,冇理由降低自己水準遷就內地政府,中港融合頭等大事之一,可能就係話俾內地官員知,公開透明的重要性,梁振英如果要幫香港人,好似國家主席胡錦濤所講,「登高望遠」,最低限度,下次有親呢類中港合作的大龍鳳,新聞及資料發放要做好啲,真係要認真檢討吓應該邊個負責,統一發放,最少等大家有個知字。

香港年青人無論幾抗拒都好,唔使咁悲咁谷氣,如果唔想離鄉別井,離開親戚朋友移民,就應該認真諗吓未來的香港會變成點,講緊一啲好俗氣的問題,包括可以喺邊度做嘢,喺邊度住,留意多啲香港未來規劃的大趨勢,例如香港政府想在新界邊忽大搞,周邊又有乜嘢基建配套,香港元朗樓都要五千幾六千蚊呎,仲貴過深圳幾條街,真係搓埋一嚿,好似AH股差價咁,終於會收窄。

有人預測到咗2027年,中國會超越美國,成為全球第一大經濟體系,查實呢樣嘢又唔係咁難估,按目前水平,每年高個位數字增長的速度,中國經濟15年內超越美國,只係數字遊戲。

香港需唔需要用自由換取經濟發展,又唔需要咁悲,中國實行規劃經濟,呢樣又管嗰樣又管,十個煲七個蓋,就快監管者多過經濟學家,絕對唔會係可持續發展,一個好簡單的結論就係,全球第一大經濟,冇乜可能係一個規劃經濟,形勢總會轉變的。

關連文章:
1. 二零二七(上)(下)
2. 大禮露微
3. 小強大禮(上)(下)
4. 港深特特區(上)(下)
5. 港深特區(上)(下)

伸延閱讀:
1. 文匯報: 梁振英 - 經濟提速追回蹉跎歲月

6 則留言:

  1. 香港若果唔需要用自由換取經濟發展, 同樣邏輯, 難道就套唔到強國之上?
    係唔應該悲, 唔應該谷氣... 但現實話我哋知一個老母生三個仔, 起初無講明大細, 由養母帶大的港燦似乎最早出人頭地, 生母之後接返呢粒仔, 但見佢好似養極都唔熟, 就催谷一手湊大的滬少, 以其於2020年追上港燦, 當個國際金融中心, 名正言順做大阿哥...
    唔好忘記仲有個, 叫深仔, 本身都有特殊經濟優勢, 依家仲有張WILD CARD 前海, 可以倒模港燦之所能, 做個特特區, 牌面係經濟大融合齊創共同繁榮和諧生活圈, 但底蘊邊個知? 就連共同新聞稿都唔透明... 或者特特區成功咗之後可真當港燦透明!
    三個仔本來就本是同根生, 相煎何太急的, 阿娘搵個自己帶大的做大阿哥亦無可厚非, 問題在於個TIMELINE 定得太死, 遊戲規則偏重滬少來得太明顯, 搞到另外兩個仔, 尤其係同樣跟住阿娘大的深仔, 頓感失寵, 霎時間好缺乏安全感!
    呢啲就係阿娘一個唔該, 挑起的... 好聽啲講係良性競爭, 班細就只顧上爬, 唔願做孻仔...
    所以句大禮露微的確好啱聽, 仲好中肯! 還望他朝呢兩個親兄弟唔會打完齋唔要和尚, 港燦最終唔會成為比孤兒仔更苦命的二奶仔!
    呢樣嘢到最後係靠自己, 定靠出賣自由博返來?(無錯係賭博的博, 阿娘唔太可能肯等價交換) 真係可以樂觀?
    面對現實吧, 連全民普選都未有, 悲觀好樂觀好分別已不大, 無主導權的事, 向來只有主觀願望同客觀事實之別... 最後可以揀的可能又係得兩條路: 走定留... 留底, 又係咪要食大西北前海橫琴條水? 唔向西, 向東... 又真係信個綠色過綠色的「九龍東」會咁愛國愛港? 帶動本土發展創造就業? 與普羅大眾分享經濟成果?

    回覆刪除
    回覆
    1. 香港一團矛盾,浪衫架都插一餐,實在寫唔出乜嘢偉大論點,而家最想唔睇報紙行開一排... 主觀情緒自己可以控制,客觀形勢總會改變,唯有係咁望了...

      刪除
    2. 都啱... 晴天陰天雨天, 同樣好心情, 總有得揀, 總有出路, 望係咁望

      香港地自由空間越來越少, 呢個棚最難得係有個人, 有把聲, 出自真心, 由投資者教育到消費者教育, 財經茄哩啡到樓盤分析員, 事事評論員, 俾班路人甲乙丙丁你一言我一語, 好偉大喇!

      刪除
    3. 唉,阿爺想挺香港挺來挺去就都系加強中港互動。世界上兩個長期分裂後統一的國家都只能夠生活好、政治清廉的那一邊帶領落後腐敗那一邊改進。香港被中央帶領,雖然話河水不犯井水,但系地下水一定會滲透過來。好簡單,當年大陸鬥地主搞文革,香港搞暴動。依家雖然話港燦比較有文化唔會四十萬人衝入君越酒店處決胡主席,但系黨靠造反起家一定怕自己果招被以其人之道還其人之身。香港未來一定會被慢慢河蟹,不過應該會進化到非惡法維穩,而是國企霸權計劃一切。

      對於民生,可能會回到港英時期一樣,發唔到達但系餓唔死。強國如果能慢慢改革到香港台灣生活廉潔水平,香港到時就會慢慢融合。到時就算港燦搵唔到食,都可以唔做港燦回國做個普通強國人都唔驚被河蟹。要等幾耐?最少二三十年(台灣蔣經國治時)。最多可能要隔兩代人以後,所有現在當權貪官去世後。到時候唔知世界會變成點?

      刪除
    4. 非常同意順叔所講,呢排真係無興趣睇報紙。不過,最近諗起而家嘅情況真係好似0304年,當時嘅報紙頭條送埋遊行彩頁"不要董建華",今日就變成"大話精梁振英",仲有接踵而來的梁錦松偷步買車,楊永強,葉劉等等,今日就見到麥齊光呃房津,高永文僭建。

      諗深一層,當年拉左呢班人落馬之後,就造成左蔭權七年嘅霸權亂局,今次唔知係咪又再歷史重演,亦唔知背後仲有幾多故事。

      刪除
  2. 唉...篇幅有限,順叔無機會小阿小南國,可惜。呢隻野好垃圾,居然用廿幾億上市,斬開一半都未必值。肛交所把關不力,大部份傳媒只有一同做媒唱好,遇著垃圾上市,順叔還真應簡單地點評一下。救得一個得一個。

    回覆刪除