2012年7月6日星期五

小南大國

股壇魯芬

開心星期五,今期學人講飲講食。

磚頭貴對推動經濟有乜貢獻,唔知,不過可以幾肯定,房屋開支壓縮咗大部分香港人的可支配收入,衣食住行,如果想叫做追求吓生活享受,唯有間唔中食餐好啲或者刁鑽啲,所以報紙電視講飲講食成行成市,諗落都幾悲。

咩名人「邊食邊吹邊拉關係」飯局之風,已經老翻覆製到報紙,搵件風水師加幾條女四圍食飯灌水又可以放上電視,已經到咗氾濫的地步,當中最經典頂唔順場面,莫過於見到條女,含住嚿嘢成口都係,瞇埋眼揈晒頭,好用力又好享受咁「嗯」聲「唔」聲,明明已經食緊蕉,同你講好有蕉味,每逢睇到呢啲節目,都希望政府可以發多幾個牌,搞個電視版《無人駕駛》分分鐘仲好睇啲。

聽講全香港有一萬四千幾間大小食肆,五百個香港人就會有人開一間,好少少食材,入境香港唔夠一粒鐘可能已經被買手搶清光,過幾層銷售渠道或去到普通街市,已經冇乜好嘢剩低,加上租金貴亦壓縮埋大廚選購食材的能力,有時見到枱面上的垃圾食物,例如厚達半厘米的雞皮,又會覺得怪錯咗飲食節目中「嗯」嚟「唔」去的美女,飯有飯味菜有菜味,本來係食物最低要求,湮遠的味道,今時今日可能真係變咗「享受」的一種。

飲食節目唔會幫襯連鎖餐廳,食物茶式公式一條大量覆製,人人都試過,唔通搵名人索女行入麥記,咬住個漢堡包同你講好有包味,點都要搵啲叫做有特色的食肆,講到全球獨步咁款先冇咁行貨,咁又即係話,食物菜式唔似其他普通商品,唔可以大量覆製,除非有朝一日肯德基變成米芝蓮星級餐廳,否則食物質素及食肆規模成反比呢個定律,冇人可以打破。

十幾前,財經茄哩啡重遊上海,去小南國(3666)虹橋店食飯,真係飯有飯味菜有菜味,加上久別重逢良朋碰杯,在小南國起家老店呢一餐,記憶甚深;舊年在香港請幾位小朋友食飯,被捉咗去時代廣場小南國分店,順叔唔識寫食經,不過水準反差之大更加印象深刻,最記得有碟類似排骨糯米飯的東東,放上枱已經嚇咗一跳,幾粒排骨鋪面,同糯米完全冇溝通,唔係搞爛Gag,真係唔熟。

小南國當年一間老店,最新中港分店61家,小南國經過幾翻波折,日前終於在香港上市,一間上市前谷到盡都係賺1億銀(人民幣,下同)左右的連鎖食肆,最新市值都要20個億,廿倍市盈率,唔知道買咗落邊度。

小南國上市的賣點,係十大名店加標準化管理,不過出晒名的食店,老闆或大廚多數好有性格,絕大多數拒絕開太多分店,因為冇可能管理得好。一間上市食肆,一係賣管理能力,一係賣大廚能力,兩樣嘢炒埋一碟放上枱,肯有是但一樣唔熟。

強如香港大家樂(0341),夾在公司管理及廚房管理中間,近年亦開始顯得進退失據,大家樂至3月底純利,自2003年的「非典」期以來,第一次倒退,經濟學家當然可以指住最低工資,不過呢 ,大家樂好似冇講到,中港員工人數比例有冇此消彼長。大家樂過去咁多年被視為優質管治的港企代表,即係話壓縮成本已經做到好盡,未來增長唯有靠殺入大陸,但係中國市場個個地方唔同,例如唔係咁多人會出街食早餐,暫時見唔到大家樂可以好似香港咁,將運作模式及產品標準化大量覆製。

聽講仲有幾間類似概念的新股,排緊隊上市,包括香港翠華,香港茶餐廳唔敢包,不過幾間內地連鎖食肆,應該總有一兩間,上市最終目的,就係搞到自己能見度高啲,第二時可以好似小肥羊咁賣盤。

小南國老闆話齋,吃飯是件快樂的事,但人生的快樂不僅只有吃飯,變化小小,就係好食的食肆唔上市,上市的食肆唔好食。

關連文章:
1. 十年大膠鑊(上)(中)(下)

3 則留言:

  1. Thanks for the newest msg box function!!! Very user friendly~~~

    For China's restaurant, ppl expected to enjoy the service(high labor cost), longer time on the table(low turnover rate), good environment(high capex), which makes it difficult to compete on price and also scare up the business.

    But俏江南seems doing fine so far, quite interesting, reception in different area seems not bad.

    回覆刪除
  2. 磚頭可推動經濟>磚頭升值,雖然自住唔賣,但感覺良好,消費自然豪左。

    回覆刪除
  3. 呢點我都想寫下,昨日去了間曾經上過市後尾賣了的鋪,都有呢個感受

    回覆刪除