Best Blogger Tips

2012年6月8日星期五

焗局侷跼


唔好問點解,大家跟住讀一次,平仄上去:焗局侷跼。開心星期五,無無聊聊,睇睇香港因乜嘢事咁多乜局物局,焗緊乜。

先望吓金融管理局。香港上一朝的財金高層,逐個臨尾香,行政長官曾蔭權同埋前政務司司長許仕仁一身蟻,98年入市打大鱷的串燒三兄弟,仲有金管局前總裁任志剛,啱啱亦俾立法會捉返出嚟打屎忽。

經過3年又8個月的閉門困獸鬥,立法會雷曼迷債小組委員會,星期三終於焗咗份3百幾頁的報告出嚟,退而不休的任志剛,成為唯一被點名「讉責」的官員,被指須為事件負上最終責任。

「公道自在人心」,連美國前聯儲局局長格林斯潘,2008年全球信貸危機後,都被捉上美國國會狂炳,人哋格老都承認監管疏忽公開認錯,美國銀行當日冇將毒債賣俾散戶,點解香港「攞你命3000」周街都係,銀行又可以賣得咁開心?金管局作為香港銀行的最高監管機構,財經茄哩啡只係想借用美國政客當日問格老的問題,問吓任總: My question is simple. Were you wrong?

金管局當年一掟幾十個億,掃落國金二期頂樓十幾層寫字樓,今日應該升值最少一倍,一個人坐在金融雲端咁耐,更難認錯,一句「Sorry」更難出口,任志剛做足金管局總裁16年,年薪過千萬值,冇任期限制,又可以獨斷獨行自資自置總部,咁多年嚟,對住立法會班大帝,都當人哋係傻仔,今日有位俾人入,難免又被人大力啲招呼。

任志剛強調自己「問心無愧」,又話個人力量難以同「政治機器」抗衡,佢老人家口中的「政治機器」,唔知係咪講緊立法會咁簡單,不過呢,從今之後的金管局,肯定冇佢在任時咁惡,例如現任總裁陳德霖,當日有份捧當奴上位,但係任期都有時限,呢個筍位兩年後唔知有冇需要執吓位,不過金管局職能,未來幾年可能會有大轉變。

人人講緊候任特首梁振英上場後,會搞個「港版淡馬鍚」,如果屬實,金管局對香港外匯及財政儲備的投資的話事權,就會被大幅削弱。香港政圈,而家個個都在關心所謂「五司十四局」的政府架構重組,銀行賓架,可能最關心一隻新怪獸,叫做「金融發展局」。

「金融發展局」呢個概念,寫在梁振英的競選政綱裡面,近日接受香港左派報章訪問時,梁振英特別提到,短期內會成為一個工作小組,研究成立呢個最新組織,好似旅發局、貿發局咁,等金融業界可以同政府一齊探索金融業的發展。

「金融發展局」最後焗咗嚿乜嘢出嚟,唔知,不過呢個構思舊年底出街之後,當時幫緊唐英年助選的任志剛,已經第一個跳出嚟反對,質疑建議「缺乏專業知識」,近月所見,好多當日「梁營」的中資機構高層,例如中銀(2388)謝湧海、光大(0165)的陳爽,都在力谷呢嚿「金融發展局」,其中講得最多一個職能,就係同中國財金監管機構的溝通,做整體協調,同埋研究長遠戰略決策咁。

香港從來都冇「地產發展局」,地產業又唔係成行成市,前朝董建華年代,乜乜物物發展局一大堆,唔講唔知,航運發展局之外,又有個港口發展局,仲有個物流發展局,問你死未,呢堆嘢在董伯伯腳痛之後,唔知仲有冇運作,不過近日梁振英每逢接受訪問,幾乎都重提航運、船舶金融中心之類的構想,乜局物局,怕且又會翻生。

銀行公會同金管局一班人,例牌年底訪京,舊年去完北京,個個爭先恐後跳出嚟支持唐英年參選特首,可能成個香港金融世界被人跣咗一鑊,不過唔難猜測,對於梁振英嚟講,香港金融界係一個最插唔入的山頭,在金管局頭上焗個金融發展局,目的都好明顯囉。


3 則留言:

  1. 邊有土皇帝會認錯呢?

    回覆刪除
  2. 「焗局侷跼」,大家醒醒吧,倒替一代金融沙王不值,坐在同一條監管船上,不當銷售的又豈止銀號,當年逢周四出街的《觀點》不比慧博士出品少,仲要金管局並非負責證券產品審批﹒﹒﹒余未有時間細閱300多頁的報告,簡單從輿論提及議員只譴責任總一人係基於其供詞誅死自己來看,報告未免有所偏頗
    唔係話任總做啱晒,而係當全世界焦點誤放一人身上,只會放生其他所有「在逃人士」﹒﹒﹒
    歐國盃決賽開鑼,又攞球賽做比喻,一隊波有球員嚴重違規,球證即使真的先知先覺預視得到,衰啲講句,都要等其真係出咗腳,犯咗規先吹得雞(當然套落金融監管層面,可以話當局應該提早警告銀號券商同投資者,但癥結唔在於警告與否,看回球賽一喻自有分曉)
    在沒有預先警告下,球員(同金融機構)出了腳,嚴重傷人,結果,足總主席一人被點名譴責,可笑不可笑?
    問題核心其實係球員操守同球會管理、文化,簡單啲講係隊波「有無品?」!同樣道理放諸四海皆準,金融如是,地產如是,簡單如做人揸車亦如是
    到今時今日行入投資專區,仍然會有職員用禮品贈券等優惠推銷,但佣金行政費及其他個人風險等詳細資料就要再三追問,兼客氣地列點說明所推廣之產品服務,很可能不切合作為客人的自己所需,對方才略作解釋,之後倒帶重覆「優惠期做埋今日,唔考慮下?」當堂死咗!
    愚見是也,觀點有所不同者,得罪得罪

    回覆刪除
  3. 金管局的確是以維持匯率和銀行穩定而設,股票債劵孖剪窩輪熊牛證『I kill you later』其實都唔關佢事。但是香港證監會又管唔到並非市場上有交易的迷債垃圾債SIV等,所以就入左金管局數囖。

    點解只系入任總數?因為其他人系梁粉同下屆的官員。任總唔服都系因為咁,如果只系入金管局數任總就應該會服。

    點解美國唔賣SIV比散戶?因為美國散戶通常都系經過退休基金買債劵,政府對退休基金管得非常嚴,買唔到垃圾。對衝基金客戶自己買左損手爛腳者眾矣,香港這個好賭的城市大家連窩輪熊牛證都買,雷曼債劵算得系乜?當然睇漏眼了。

    回覆刪除