2014年7月28日星期一

財經林峯

Tony Chok

今期湊熱閙,開精電國際(0710),講吓呢隻明星工業股的投資價值。

有一種上市公司,大股東係股壇老雀,炒殼炒股炒風炒電,鑊鑊飛沙走石,路過之地吋草不生,道上風景,卻是唔少底褲都冇著的師奶股東亞婆散戶,個個木口木面。呢類公司,財經茄哩啡永遠唔敢掂,因為坐庄者太犀利,自問冇本事在對家手指罅揾食。

物以類聚,一個財技超凡的公司主席,炒炒貢十幾年,忽然喪搭個形象包裝一流的行政總裁,Chok住Chok住同你講乜嘢工業革命,順叔戒心會更加大,股壇大龍鳯,來來去去,都係作個故仔揾班財經演員埋位,財演越有型,食水越深,咁大件靚仔扮蛤毑周街仆嚟仆去,咪玩啦。

精電行政總裁蔡東豪哥哥,無需多介紹,簡直係財經茄哩啡的偶像,如果呢個世界有「財經演員」,咁叫Tony Tsoi哥哥做「財經林峯」可謂當之無愧,周身刀張張利,踎屎塔都出哲學,戴上邊張臉具都咁靚仔,雖然有時略嫌有少少形象潔癖,一大堆乜能嘢「最後一代知識份子」、「以為自己係文化人的企管人」、「温布頓精神」,唔係個個明,冇所謂,最緊要型,重點係冇人會講得膠覺得佢Chok,星級財演與財茄之分,此之謂也。

順叔觀察到幾有趣一點,蔡東豪哥哥(下稱「Tony Chok」或「Chok生」)作為上市公司管理層的一面,似乎唔係咁多人了解(好多當「Chok生」係偶像的,唔少係從不炒股的正義師奶,或者世界觀未染銅臭的少男少女),對「Chok生」的老闆高振順,認識更少。



咁「Chok生」老闆係乜人呢?如果有興趣知道,留意吓過去十幾年圍繞佢老闆在股壇的人和事,例如一度入主亞視的吳征、在大陸影壇關係千絲萬縷的「文化商人」董平(見順叔舊作「孖你孖孖」)、仲有大名頂頂的中信國安咁,多多少少會知道,「Tony Chok」究竟同緊乜人打工。

當然啦,最可靠的消息,來自阿「Chok生」自己把口。「Chok生」睇得上眼又「欣賞」的人,唔多,包括緬甸女神昂山素姬、已拉柴的南非總統曼德拉咁。2008年所謂金融海嘯,成日唱衰不務正業上市公司的「Chok生」,失驚無神秘撈,炒燶唔知「乜Link衍生工具ELN」,精電狂蝕幾億港銀,不過「Tony Chok」近千萬港元年薪年年照袋,難怪後來接受傳媒訪問時,大大聲講,對佢老闆的「欣賞有增無減」。原來,在唔會講大話的「Tony Chok」眼中,佢老闆同昂山素姬、曼德拉都係同類人物,咁偉大,咁值得欣賞,明晒。

貨乾易炒,精電股價,過去兩年大約升兩倍,瞇埋眼睇股價,分分鐘係最佳表現香港工業股,最新市值24個億港元,往績市盈率僅僅雙位數字,息率超過6厘,完美無倫,財經林峯多粉屍,形象好人緣佳,近年唔少外資投行分析員,將本來無人吼的精電,放入研究範圍,佢老闆出得年薪千萬,請「Chok生」做生招牌,博分析員寫報告,吸引芬佬圍飛入貨,公司市值增加十零廿個億,已經值回票價。好喇,既然精電表現咁好,蔡東豪哥哥貢獻又咁大,純粹從投資角度出發,散戶就要留意吓,「Tony Chok」的種種副業,對精電有唔會產生不良影響。(之前有兩個金融「兼職王」人版,一個叫范鴻齡,一個叫張震遠。)

首先,斷估任何一個老闆,都唔會鐘意自己伙記太多兼職,一間正正經經做生意的上市公司,更加唔會有個行政總裁,長期兼職寫財經評論,指手劃腳,大佬,家事國事天下事日久日點評,今日得罪生意拍檔,後日得罪商場朋友的朋友,佢老闆點做生意呀?所以,如果一間上市公司的行政總裁,日日在報紙互聯網吹水唔抺咀的話,一係呢間上市公司根本冇投資價值,一喺呢位行政總裁的評論冇任何觀賞價值,是但一樣。

去到呢度,Tony Chok的另一位老闆就要出場:CY Lai。眾所久知,Chok生做咗壹傳媒(0282)筆陣重炮多年,到2012年中左右(確實日子唔能記得,待查),蘋果日報財經B疊,開始出現一個由Chok生另一個變身丘亦生坐鎮「金融雲端」的「金融中心」專版,當時條街傳緊,CY Lai出手甚豪,一個月一百萬港紙犒賞Tony Chok,呢條亦係Chok生另一重要副業主場新聞的重要水喉(後面仲有冇其他力場、豬腸的水喉灌水,唔知),條數可能吹大咗,打個五折都有半球一個月(一年接近100萬美金),主場新聞的其他創辦人,最新透露,主場新聞的營運資金,大部分來自Chok生與CY Lai在「金融中心」的合作計劃,涉及金額每月數十萬計云云,可見主場新聞後面金主之一,就係壹傳媒CY Lai也,點解精電老闆高振順,每年俾千萬港銀Chok生之餘,又會長期容忍自己夥計,同全港最惹火的傳媒老闆行埋,搞乜嘢豬腸新聞,日日燒自己後欄(精電在大陸設廠),搲頭。最近CY Lai跟班Mark Simon的個人電腦資料疑似外泄,唔少政客全職拋個身出嚟,又瞓街又絕食,都係收幾十萬(港銀,下同),Chok生做吓兼職揾人寫吓稿,個個月幾十萬,巴閉。

肥佬黎在台灣被人跣鑊金變賣資產失敗之後,壹傳媒開始炒人削減開支,CY Lai對蘋果全職夥記都仲算有少少良心,一刀剢咗落主場新聞條水喉,「金融中心」專版一星期五日變一日,冇幾耐,就傳出主場新聞創始股東內部不和的消息,是耶非耶?(股東不和傷兄弟感情,又會唔會另一個主場新聞草草收皮的原因?)

公元2014年7月26日,Chok生一紙飛機文,宣佈主場新聞執粒,距離檔嘢兩歲生日只有兩日(打工仔做滿兩年先有遣散費),一個聲稱香港最多人睇的新傳媒網站,滾水淥腳拉閘封舖,全港嘩然,一邊話Chok生作為佔中「死士」之一,要為民主大業製造悲情,谷人上街革命;另一邊,天滅中共,白色恐怖,中共打壓新聞自由咁。一個腦細胞未完全死亡的人,稍為冷靜退一步諗諗,都知道兩邊講法,各有道理,同時亦將香港呢局棋過度簡單化。Chok生坐得呢種位置,點會咁簡單,就一個問題的考慮,絕對唔會係「因為XXX,所以YYY」的一條直線,三言兩語可以解釋完全,而係好似圍棋象棋高手咁,一步之外,必有各種唔同後著,一個動作,同時解決幾個問題或者幾個對手,又話者係種種得失計過度過的決定。

簡單舉幾個可能因素:

[考慮A]當然係錢,壹傳媒條水斷咗,CY Lai私人醒俾泛民的政治捐款又黃埋,本來夠圍皮,家陣要自己出錢, Chok生雖則在精電年薪千萬,不過要個個月揻幾十餅嘢出嚟維持正義,Chok生明顯肉痛。Chok生話檔嘢從來未支平衡(乜原來咁大使費),一個雞棚又要咁多錢?唔知有冇可能,Chok生幾乎壟斷創辦主場新聞的光環之餘,又撳住主場條數唔俾其他股東知道,令其他創始股東有所不滿呢?至於話主場新聞點解冇廣告,,咪玩啦,呢個不在本文討論範圍,大家試吓問香港是但一個新聞傳理系教授講師,睇吓邊個夠胆用「客觀」形容主腸新聞,就會知道答案。

[考慮B]種種所謂互聯網新媒體,個個創辦人都話自己出錢,即係自己燒自己春袋,真係咁多傳媒老闆願意做新聞自由烈士,香港一天都光晒啦。間間網媒都捱緊,隨時有人執粒,根據近年香港傳媒的行規,做唔掂就嗌幾句「天滅中共」或者「689下台」的新興傳統,主場新聞如果遲啲執粒,俾隔離台搶先一步新聞自由烈士上身,咁就冇咁轟動冇咁型仔啦。

[考慮C]主場新聞叫做收咗皮,不過重新開檔的成本,接近零,財經林峯夠型,轉頭揾另一班熱血中坑或青年,曉以民主大義,改變經營模式,再起爐灶,搞檔豬腸新聞又好,牛雜電台都好,分分鐘聲勢更加浩大,家陣喊苦喊忽的網民,話唔定到時唔食唔爆房都要捐錢俾Chok生東豪再起添。

[考慮D]Tony Chok做投資銀行出身,好似順叔某網友(未得巴打同意先隱其名)所言,摺埋主場新聞只係金融佬的一套「兩面對沖」。對住大陸的米飯班主,Chok生可以大大聲講已經執咗主場新聞,繼續做精電生意;另一邊,扮晒受害人,繼續煽民,一千條豬腸新聞評論,都及唔少「香港冇主場」一單新聞咁轟動。佔中得米,Chok住Chok住出嚟攞彩,佔中冇市場,咪繼續做生意囉。

[考慮E]2014年的香港,同2004年何其相似,十年前董建華腳痛落台之前,反對派亦成功煽動大型群眾運動,亦出現電台名咀疑似被政治打壓而輪流封咪的情況,董落曾上,戰況激烈,發動政變的時候,搵軍隊控制電台電視台,其實亦係對新聞自由的終極干預(見「次輪好戲」),十年人事小門中,人臉依舊發噏風,重點係,當日「被封咪」的兩位名咀,其後不但冇被滅聲封殺,而係更加大聲,先後成為影響力更大的立法會代議士,一位擁有自己電台,一位掀起政壇新風,奇。按照同樣政治軌跡,恭喜Chok生,幾年後能量必定更大,更上層樓,大器可待。

當然,中共使橫手白色恐尻怖Chok生,可能性亦都存在,但唔好忘記,阿Chok生早在舊年,已經「決志」,做「佔中十死士」,重覆:係「決志做死士」嘩,頂你,財經林峯即係財經林峯,「死士」喎,型到佢!

政治呢家嘢,財經茄哩啡識條春咩,只係想問一句,蔡東豪哥哥然已經有做「死士」的決心勇氣,當主場新聞面對政治壓力時,點解又會失驚無神「我恐懼」?邊樣先真呀,呢種「死士」,兒嬉咗少少喎,吹脹。以為「無痛佔中」咁著數,咁不如試吓冇菌中出啦老友。

Chok生戴住「佔中死士」個頭盔,威,在主場新聞搖旗納喊CHOK足成年,相信唔少當財經林峯係偶像的靚仔,受其正氣感染,決心投身政治運動最前線,黃竹坑烈士就係咁嚟,好喇,家陣佔中革命一觸即發,血氣方剛者黄花崗烈士上身,扎行馬準備劈友戮敵之時,本應身先士卒的「死士」財經林峯,竟然臨門一腳同你講「我恐懼」,言下之意,唔通係:「唔好意思,我要收收皮,你哋衝先」?嘩,咁都得,你老妹都問會你仲係咪男人啦……  (呢度有Chok生決志佔中的感人片段

嗱嗱嗱嗱嗱,財經茄哩啡絕對相信Chok生的人格,唔會係Chok住Chok住扮正義、煽(跣)班靚仔去衝去死、轉頭又揾師奶散戶笨實的冚家鏟古惑仔,既然決得志做「佔中死士」,一定唔會咁仆街,借啲意走數(大家記住呢位「死士」,佔中時會否蒲頭,就知道形像潔癖的財經林峯的素顏矣)。人哋白鴿何俊仁,頂住個鐵頭同大肚腩,都陪500黄竹坑烈士瞓咗一晚,你蔡東豪一句「我恐懼」就叫鬆人較腳,hea咗啲囉,好好醜醜都係「死士」,最低限度硬食一棍打穿個頭,咁先叫交戲,財經林峯先可以繼續做落去。

Chok生作為精電老總,高調介入政治活動公民抗命,預咗俾差佬拉留案底,冇錯,係就係好正義,從銅臭角度去睇,就係終極的不務正業、妄顧股東利益。所以Chok生都係時候,辭去精電及其他上市公司商業職務,全程投入做全職佔中「死士」,精電股東就要小心喇,股價升咗咁多,Chok生作為精電靈魂,無論以行政總裁身份被差佬拉,定係決志劈炮唔撈,精電股價都似係向含苞散方向前進。

所謂左手又係肉,手心又係肉,究竟點先可以同時滿足精電及CY Lai兩個老闆(講多次,後面仲有冇其他力場、豬腸水喉射住,唔知),財經茄哩啡一路都諗唔明,早排同憤怒荷馬等幾個神經經濟學家,講開佔中的經濟邏輯,忽然頓悟。

真正的公民抗命,講緊以最大化的「個人成本」及最低化的「社會成本」,爭取最高化「社會利益」,當年印度甘地絕食,就係公民抗命的最佳案例(去到最極端就係自焚)。佔領中環版本的公民抗命,掉轉,講緊希望用最低的「個人成本」綑綁埋最高的「社會成本」,作為爭取「社會利益」的工具。後生仔佔中,「個人成本」未必會好低,越多人攤分,「個人成本」可能越低,除咗留下青春激情的烙印,「個人利益」肯定冇乜。

人類歴史上每一場群眾政治運動,都有人鼓動熱血靚仔付出「個人成本」,以「社會利益」包裝「社會成本」,自己坐收最大化的「個人利益」,佔中運動後面有冇呢種人杰,唔知,後生仔自己感受下,最低限度,幾年後回望一下,乜人因為佔中有最大「個人利益」落袋。

財經林峯摺咗主場新聞,如果再辭埋精電老總職位,就可以更加凸顯自己付出「個人成本」的高昂,可以更Chok,CY Lai都六張幾,形象太差,政治資產減值得八八九九,都係時候退休,揾個再世靈童接棒,在香港,五十歲出頭,形象好能量高,最有資格做CY Lai接班人的,有兩個,Chok生係其中之一,一個唔該,去壹傳媒打工斷估亦唔會差得去邊。

條街有人傳緊,Chok生可能過檔正式跟CY Lai打工,不過呢個只係冷盤,Chok生下一站,更熱門盤口應該係力場下面的信報,信乎?無論佢下一步做乜,請記住,到呢一刻,Chok生都係左手收CY Lai銀兩做民主革命,右手又收精電老闆千萬年薪搞「工業革命」(再講多次,後面有冇其他力場、豬腸水喉射住,唔知)。

最後的「死士」,唔會死錯人的。

好多人當財經林峯神咁拜,分析精電前景,預咗俾人插,喂喂喂,西環有冇觀眾呀?五毫子稿費唔該。

關連文章:
1. 呃你孖孖
2. 文化大拍賣(下)
3. 怪獸傳媒(中)(下)

醒神閱讀:
1. 亞洲周刊: 《主場》背後的離岸公司
2. 湯財手記:給各位關心無主孤雲的人
3. 康樂大廈何淑茵:東豪式軟飯(上)(下)
4. 蘋果日報:管理層累散戶 踢爆精電墮落之謎
5. Q仔:資本家就是資本家


同場加映:

黄竹坑烈士

佔中「死士」

36 則留言:

  1. 順叔勁!力場萬歲!
    『死士』姐係『死士』,宣佈主場新聞執粒,距離主腸新聞兩歲生日只有兩日(打工仔做滿兩年先有遣散費),幫佢打工真係死得!

    回覆刪除
    回覆
    1. 招呼唔切,WISELY可CLICK入上面Q仔講SMARTASS

      刪除
  2. 順叔好野!

    呢件事同泛民收錢、苦瓜四萬翻鄉下無人理、肥佬遊艇會等加埋一齊,會唔會系集團幕後金主與對家講掂數開始拆棚呢?

    回覆刪除
    回覆
    1. 熊貓熊哥,要答你個問題,就要想像吓,CHOK生檔主場後面,除咗CY LAI,仲有冇力場呀、豬腸呀其他更強勁水喉了

      刪除
  3. 順叔勁!不知順叔會否寫下高生隻439?

    回覆刪除
    回覆
    1. 查實邊個股市老雀搞緊乜,已經唔關禾財經茄哩啡事,禾只係想探討吓財經林峯的素顏而矣

      刪除
    2. 我也想知439個故事。。。

      刪除
  4. 重嘈遣散?老總起碼都未上線前已經埋班做兩三年啦

    回覆刪除
  5. 呢篇文就失左水準,可能恨意太濃矣。我同意東尼蔡副業太多(我更見過他返工時間逛香港唱片成個鐘),但本來高人擺蔡氏落去就是為好看…一如盧永仁,本身已是功能。二來精電在蔡生上車後都低沈左幾年,個度又點計?有根底既企業,有無蔡生都有根底既。

    回覆刪除
    回覆
    1. 文昌哥,禾對CHOK生並冇恨意,對金融大鱷亦冇意見,只係唔乃奇嗰啲站在道德高地扮晒魚蝦蟹,煽(跣)班靚仔去做黄竹坑烈士的財經演員,至於財經評論,哈哈,如果你係熟客,應該留意到,禾之前的文,好多錯到離譜,所以改邪歸正冇乜點寫矣

      刪除
    2. 我不認同主場之全部風格, 但也不認同你如此抽秤一個人. 有一天, 全港敢言媒體死晒, 你再無發blog寫咁抵死的文章的自由, 你會明白言論自由可其可貴.

      刪除
    3. 言論自由係你有你寫,我有我寫,各有各寫,幾百人有幾百人自己的平台各自鐘意噏乜就噏,唔使統一口勁,統一平台的,我地在blogspot都各有各講,互聯網呢,真正性質就係分散平台,分散主場,唔見得冇佢一個場,我冇地方噏嘢,

      刪除
    4. 禾當然認同言論自由好緊要啦,不過呢,「如此抽秤一個人(或一班人)」,乜唔係CHOK生撚手好戲?以彼之道啫,唔使咁認真,TONY CHOK仲大把死忠FANS,財經茄哩啡抽食吓花生吓水不足道哉

      刪除
    5. 菜生"如此抽秤一個人(或一班人)"= 為民發聲
      順叔 = 不明白言論自由可其可貴

      政治D野,學油才子話齋: PEOPLE BELIEVES WHAT THEY WANT TO BELIEVE.

      刪除
  6. 寫得好精彩,一直都認為扇班同學仔去做烈士,背後班人是要以最低成本,獲得最大個人利益,槓桿姐,係老手都識

    回覆刪除
    回覆
    1. 亂博哥駕到(禾都有幫襯你個BLOG的),謝謝謝謝。

      刪除
  7. 順叔果然快且準,好文!

    只係想比老婆睇星爺劈chok峰時,發現變左汁男烈士。。。

    回覆刪除
    回覆
    1. 劈CHOK峯條片:「當周星馳知道林峰CHOK得金曲金獎之後...」
      http://youtu.be/4B10KPtnzvE

      禾當年偷咗條橋,用嚟剪「那些唐英年十大金句」其中一段
      http://youtu.be/vRMSrwyFwnM

      刪除
  8. 順叔,估到你會忍唔住出文喇,唔係點襯得起你個英文名呢。如果你唔寫佢一寫真係會以為你恐懼......

    回覆刪除
    回覆
    1. 牛哥好耐冇見,最容易令禾吳倫順發作的,就係岳不羣式的正義人物,由小說到電影,好多「形象潔癖」、包娤十全十美的正派,多數最後會係奸尻大反派

      刪除
  9. 順叔好有point,唔明香港點解變成自己能力不逮,都要將失敗歸咎共產黨和政府。白色恐怖?如果真係有的話,蔡生已經被精電炒啦,真可以千萬年薪袋袋平安

    回覆刪除
  10. 順叔果然堅揪!尿事如神!請受小女子一拜!菲比

    回覆刪除
    回覆
    1. 哈哈哈,茅錯,係尿事如腎,射射射射

      刪除
  11. 順叔做乜依家無冩am730?

    回覆刪除
    回覆
    1. 沙哥!好耐之前已經幫襯你個BLOG,禾幾年前篇「超大農作」都有QUOTE你的!

      唔寫AM730主要因為攰,日日寫餐餐開飯邊有咁多腦汁體力,望返轉頭覺得自己真係笨實,應該CHOK幾句天滅中共689下台先起身

      刪除
    2. 你唔寫我無得笑,一個字「慘」!

      刪除
  12. 小弟初到貴境。正,
    最中意睇人揭正义朋友面紗。

    回覆刪除
  13. 唔係呀,禾都唔知雪球係乜

    回覆刪除
  14. 咁你仲唔快D去開返個?個度都有好多財咖!

    回覆刪除
  15. 生意人還是專心做生意好了,少搞政治為上。

    回覆刪除
  16. 今日豬腸變臘腸,先睇到順叔舊文,射得好!
    等你再講臘腸背後玄機!

    回覆刪除
  17. 世事都俾順叔睇透.....財經界林峰最近已成通緝犯。

    回覆刪除