英超波經

(刊於2010年5月20日am730)

今個星期五冇報紙，偷懶，講波。

近年好少賭波，十賭九輸。唯一例外，買冠軍。例如英超，冠軍不外乎「大四」強隊，成季賽事，各隊冠軍賠率，跟住每週賽果起跌，「大四」任何一隊賠率，任何時間跌超過四倍就落注，假設各隊投注一蚊，最後會有幾毫子賺(風險係其中一隊由頭帶到尾，賠率整季偏低)。

作為曼聯躉，順叔唔會落注紅魔鬼，只會買其他三強攞英超冠軍，之前三年開心輸錢，啱啱結束球季，終於有錢落袋，呢啲叫「情感對沖」。

除咗波經，英超都有股經，仲好精采。

伯明翰國際(2309)，香港獨一無二英超股(資產同收入係英鎊，隨時中歐元毒被狂質)，近排停牌，有「非常重大收購」，以為係因為6百萬鎊收購曼聯門神科士打，開估，原來向老闆楊家誠買嘢。

簡單講，伯明翰將會收購A公司，A公司楊家誠全資擁有，計劃向中廣電信提供廣告代理等服務，中廣電信係中央電視台聯營公司，在全國火車電視屏幕提供內容賣廣告，A公司可以在未來20年，每年分享中廣電信8成純利作為服務費，未來四年如果賺唔到15億港元(下同)，收購價最多減價6成。

牌面算正路，睇埋數字，嚇親。

A公司未正式營業，至4月底，資產淨值只有4萬4千蚊，伯明翰收購代價，36億！發行可換股優先股支付，每股0.5元(停牌前0.335元)，伯明翰市值10億左右，楊家誠全部行使，持股量會由16%，大幅增加至近五成。

楊家誠本身係超級球迷，近年在電視訪問所見，直覺上覺得佢搞英超生意攪得好開心，「疑點利益」，當佢唔會扼散戶球迷，但伯明翰唔係傳統強隊，股價同英超積分榜直接掛鉤，非常牙煙；伯明翰亦唔係全球品牌，幾有生意頭腦都好，中國市場潛力非常一般(下次坐高鐵可以留意吓有冇人睇伯明翰賽事精華)。車路士近年叫搞得好成功，但係在老闆俄羅斯鄉下，叫座力等如零（睇大前年歐聯決賽莫斯科球迷反應就知）。

英超球會，近年成為全球富豪玩物，可以話係全球最貴私人會籍，唔少球會放緊盤，或善價而沽，但係偏偏在最多新晉超級富豪嘅中國，暫時未見有人出手，一係在大陸政治社會大環境，暫時冇富豪夠膽咁揚打正牌做英超班主，一係暫時冇人搵到，貴價買間英超球會又在大陸搵到錢嘅發達方程式。

利物浦近月盛傳賣盤，可以留意吓，最終係咪落入中國富豪手上，如果只係吹水，大家都係疊埋心水，細細注幫襯馬會，當做善事。
#