送兔迎龍

年年難過年年過，年尾流流，費事年初一鬧到年三十晚，農曆年最後一期，風花雪月送兔迎龍，講風水。

財經茄哩啡唔識風水堪輿，講風水，因為可以吹水唔抺咀，好似每年到呢個時候，又係里昂證券個風水指數出場的時候，呢間法資投行，喺香港搞風水報告已經十幾年，中間又停過幾年，幾時開始已經唔記得。

每逢大時大節，投資銀行都會整色整水送啲「祝福」俾客仔，農曆新年唔知送乜，外國人對中國文化概念，最熟悉就係「Kung Fu」同埋「Feng Sui」，冇理由大時大節送九陰真經，當年有人靈機一觸，搞咗個吹水唔抺咀的風水指數報告，當精品送俾客仔，點知大受歡迎，而且仲成功命中恒指當年轉角位，於是開始咗呢個傳統，仲成為里昂一年一度的最佳市場推廣活動。

里昂係法資投行，中國人的新年搞花臣，竟然冇搵到舊年入股近兩成的中信證券(6030)幫手，全國最大證券行，點都識得一兩個真正堪輿大師，里昂證券咁都冇搵策略股東齊齊做騷，見微知著，呢個策略聯盟應該都係得啖笑。

風水指數報告，唔單止包括里昂分析員的集體智慧，仲吸收咗幾個「風水大師」的意見，大行分析員講乜，財經茄哩啡不嬲冇興趣，反而好想知道，呢幾位「風水大師」係何方神聖，又收咗幾個顧問費，呢樣嘢從來冇乜風聲出過嚟，斷估保密揞口費都好和味，做「風水演員」就算搵唔到富婆挖 生機洞，原來都可以搵唔少。

里昂養埋幾多財經演員就唔知，不過今次派出場占卜問卦的，肯定係「風水茄哩啡」，行頭嗰位分析員，正職其實負責睇航運交通，只係夠膽叫自己做「Sorcerer’s Apprentice」，擺明搞笑，反而「魔法師的門徒的徒孫」，出動到麗新(488)主席林健岳位千金林恬兒，反而幾有睇頭搭得杯落，唔經唔覺，作為上一代浪子的岳少，就快可以抱孫，應該係時候搵白龍王點點自己的外父相。

睇風水報告之前，投資者都好現實，第一件事會睇返上年份報告，睇睇「預測」是否準確，舊年里昂話2011年係「金兔年」，港股走勢向好，「預測」恒指目標29,000點，當然錯到甩轆。

公平啲講句，里昂晨早已經講明玩票，叫大家唔好咁認真，過去十幾年被人話亂點風水，近年其實已經冇再為股市走勢作預測，真係風花雪月一番就算數，好似今年咁，所謂21,700點的「恒指年底目標價」，其實係里昂自己的「House View」，成份報告冇做任何認真預測，絕大部分見報內容，都係發佈會上，被迫上陣的風水佬亂吹一通。

唔好話風水指數，2011恒指跌4千幾點，勁插兩成，高低位波幅8千點，各間名牌投資大行，在年初作出的「預測」錯得幾離譜，不提也罷。投行好叻一樣嘢，叫做「12個月目標價」，年初為大市做預測，12個月就係12個月，對對錯錯清清楚楚，冇得走雞，個別上市公司「12個月目標價」就唔同講法，今個月調整一次，12個月後就係另一條好漢，即係大行報告裡面，為個別公司作出的目標價預測，永遠唔會錯的。

風水報告錯，大行報告又錯，仲要越錯越離譜，即係話股市越嚟越難玩，今日唔知聽日事，所有大市「12個月目標」的預測，其實都係多餘的，里昂風水報告最有智慧一句，就係提醒你運氣本無好壞之分，日月交替風起雲湧，萬法自然，只能隨波逐流。

（順叔又要請假，未來兩個星期，再由好友阿瞬代筆，正月十五，二月第二個星期再見面。拜個早年，祝大家在龍年搵多啲，全年都咁順，健康愉快！）


伸延閱讀:
1. 風水指數報告（中文版、英文版）

網絡連結測試