Best Blogger Tips

2012年4月5日星期四

油企鬥虧


今期開油,比較吓中石油(0857)同埋中石化(0386)兩條大數,將兩桶巨油拍埋一齊,睇睇有乜火花。

先講吓近期一個潮語,叫做「民企風暴」,幾間民企出現帳目問題,股價大插兼累街坊,最搞笑係有啲明明唔係民企,都要插埋一份,認真無辜。由舊年混水摸魚爆出嚟開始,仲有穆迪份紅旗報告,唔少老外透過沽空民企賺到笑,部分民企盤數認真恐怖,不過如果「民企」同「信唔過」可以劃上等號,就唔會有咁多外國創投私募基金湧入中國,搶到私募市場個價,分分鐘仲高過公開市場。

講到尾,問題不在民企是否可信,而係一間公司的管理層信唔信得過,香港投資者雖然隔山打牛,將公司管理層及主要股東的名字,逐個進行「人肉搜索」,多數會睇到好多蛛絲馬跡。網絡搜索係一種技術,尤其係今日中國互聯網財經資訊大爆炸,掌握到網絡搜索的技巧同埋內地網上文化,等如擁有相對性的「內幕消息」,好過睇埋晒啲識少少扮代表的咩嘢大行報告,最低限度,識中文的香港散戶買中國民企,穩陣過俄文唔識一隻就去買俄鋁(0486)咁囉。

大家可以回想一吓,十年前市場對國企的印象,效率奇低,國企老總又容易穿櫃統底,當年種種偏見,同今日市場刮起的所謂「民企風暴」,竟然似曾相識,唔好忘記,過去十年,亦係投資中國大型國企的黃金十年。

民企予人「容易爆煲」的感覺,其實係相對於大型國企的穩陣,爆咗最少阿公會埋單,不過咪以為「做數」只係民企專利,民企最常用一招係變大盈利引人落搭,國企可能出現種種政策或政治原因,將盈利收收埋埋。大到好似中石油中石化咁,盤數一樣有唔少「水份」,亦有透過會計帳目整色整水之嫌,嗱嗱嗱,財經茄哩啡只係執《人民日報》等官方傳媒口水尾,冇話中石油中石化「做數」。

中石油同埋中石化,兩間公司其實做緊同樣幾辨生意,採油煉油賣油,上游做到下游一條龍,最大分別係中石油產油多煉油少,中石化業務比重掉轉,理論上,中石化煉油業務應該蝕到喊,不過呢,舊年中石化煉油業務,虧損只有358億元(人民幣,下同),中石油煉油虧損竟然高達618億元。

兩間巨型油企,煉油業務都包括原油加工,同埋生產汽、柴、煤油,以一噸原油等如7.33桶的單位換算,中石油原油加工量在2011年唔夠10億桶,汽、柴、煤油產量8,715萬噸;中石化原油加工高達16億桶,汽、柴、煤油產量1.3億噸,點計中石化的煉油虧損,都應該遠超中石油。

唔簡止係咁,中石油產油多,原油加工業務, 9成自己幫襯自己,中石化有8成加工原油來自進口,要硬食國際油價,兩者成品油價格,又係由中央政府決定,一來一回,中石油同埋中石化煉油業務虧損的巨大落差,更加顯得唔合理。

中石油同埋中石化,兩間公司體積太大,業務及財務數據又係天文數字,大到超乎地球人大腦可以即時理解的地步,分開睇,唔覺得有問題,拍埋一齊,竟然大有文章。

煉一桶蝕一桶的國家任務,唔會錯得去邊,不過俗語都有云,人有人阿媽,妖有妖阿媽,大型國企都有更大的阿媽,兩間公司同非上市母公司中間的業務往來,唔同業務板塊會計點入數,都可以營造到自己想俾大家見到的財務效果,中石化舊年純利732億元,雖然冇乜增長,但仍然再創歷史新高,中石油純利1,329億元,仲同你講倒退半成。

如果唔係苛稅猛於虎,中石油係一間一年等閒賺你二、三千億銀的油公司,斷估收收埋埋多多少少暴利,費事向中央爭取更有利政策空間時處於不利位置,嗱嗱嗱,講多次,唔係順叔吹得就吹,官方喉舌咁講咋,中石油股東有機會就自己問吓管理層啦。

伸延閱讀:
1. 人民日報海外版: 兩桶油煉油巨虧水分大 不該群眾買單

沒有留言:

發佈留言