投資銀行同埋信貸評級機構，以前會在香港放唔少人，近年中國嘭嘭聲，研究香港的人手越嚟越少，唔少大行仲會養住一班地產分析員，一來因為地產夠大，二來可以兼職撈埋香港經濟分析，抵食夾大件。
換句話講，外國芬佬等唔識中文的投資者，近年唔係咁容易直接感受到香港的政經脈搏，主要靠英文傳媒，英文傳媒睇香港有幾叻，你話呢？
例如新地呢單嘢，所有鬼佬傳媒，舖天蓋地咁報，《經濟學人》夠巴閉未？日前在「Analects」（「論語」喎．．．）網上專欄，寫咗一篇「Flying too close to the Sun?」的大文，唔好睇乜，一句「政務司司長」係「公務員之首」，已經露底，對香港了解，停留喺陳四萬年代，只係「有限公司」。
英文傳媒知少少，但係個個又長篇大論咁報，鬼佬投資者唔知頭唔知路，必定驚青，可能呢啲先係「最不明朗因素」。新地租金收入，一早已經超越九倉(0004)，但又唔好似九倉咁，揹咗一大嚿中國房產風險，一來負債奇低，二來更睇唔到融資需要，當標普同穆迪，齊齊出嚟將新地放在乜撚嘢負面觀察名單，幾乎可以肯定，市場對新地呢單嘢，反應已經過大。
你可以話香港玩地產，未來遊戲規則可能會出現大變化，又可以話影響香港樓價的政府政策及息口，都已經接近臨界點，但當你話呢單嘢影響新地短期的融資能力借貸成本，就好硬膠囉。
去到呢個時候，有關新地的報道，信英文傳媒，不如信大公文匯；信評級機構，不如信中資投行，中信證券上星期，仲出咗一份報告，標題叫做: 「Crisis presents buying opportunity」．．．
唔少鬼佬，識句「你姣媽」就扮中國通，不過點都好，經過呢幾個月大龍鳳，外國傳媒可以好大聲咁再次宣布「香港已死」，斷估梁振英好快要湊吓班外老傳媒，為外國傳媒眼中的香港，修補一吓近幾個月嚴重撕裂的形象。
新地上個月，第一次將業績後分析員會議視頻，放咗上公司網頁「投資者關係」一欄，如果今朝真係出咗嚟解畫，公司就算唔夠薑開記者會，亦應該將投資者會議內容放埋上網，可以展露「自信」的一面。
關連文章:
1. 換鼻窿出氣
2. 次輪好戲（下）
3. 新地之料（上）、（中）、（下）
伸延閱讀:
1. 經濟學人: Flying too close to the Sun
2. 華爾街日報: Chillwind for Hong Kong Tycoons
3. FT Lex Column: Sun Hung Kai's arresting developments
4. Bloomberg: Sun Hung Kai Arrests Reveal Hong Kong Builders Succession Risks
5. S&P: SHKP 'A+' rating on creditwatch negative
6. 大公報: 兄弟鬩牆恩義絕 淚斬馬謖豈無因
7. 中信證券:
華資集團好少有咁「自信」的。
回覆刪除梁第一時間見咗班老外記者了。
話時話，依家公務員阿頭算係邊個呢？我都抓頭......
董伯伯０２年推行問責制開始，由公務員事務局局長負責，依家阿頭係俞宗怡
刪除謝謝。我以為公務員事務局淨係管人事安排同福利等，唔係阿頭。
刪除thx 蝸牛兄 & 月兄, 我之前都攪錯左。
刪除兩位大哥言重了。只係攏統講法，因為出任呢個位的必須來自公務員隊伍，唔同其他政治官，無得空降，編制又係睇佢。不過三司十二局中有九個局從屬政務司，若果講ｓａｙ，都可以話係政務司司長，甚至再上啲﹒﹒﹒
刪除順叔，您結果都係忍唔住吹多兩咀新地。同意您前幾日所講新地未來嘅＂優勢＂唔知可唔可以維持。反而呢幾日咁多機構投資者減持，㖒下有冇平貨汁。一個王朝非一曰建成，而且就報章所講的三單野：香粉寮，禮頓山，同大摩租ICC似乎要燒著這個皇朝.....（下刪十六萬字），九十蚊樓下心思思。
回覆刪除而最毛姑姑嘅就係8008, 唔知係咪驚��板（或者私有化？）單野短期hold唔住，繼續洗白白。
回覆刪除