2012年7月11日星期三

王子個頭(下)


上回講到,李寧有限公司(2331,下稱「李寧公司」)上星期宣布人事大變動,老臣子行政總裁張志勇退下火線,主要股東私募基金TPG放咗條高層落去睇數,仲要創辦人兼主席李寧多啲蒲頭,專注管理「對外事務和關係。

除咗人事變動,李寧公司仲提出,分三個階段的策略調整,今年剩低6個月,就係第一階段的短期措施,劈頭第一句,亦是新管理層一再重覆強調的一句,就係清理存貨,即係去貨要錢,跟住就係改善銷售渠道。

TPG入股半年,已經忍唔住出手,而且仲要係大動作,唔係求其放個二打六入董事局做線眼,而係用個高層擔任近乎全職的工作,更提出救火式的改革,可見李寧公司盤數真係唔太掂,下半年大劈價去貨,甚至捐去賑災,今年條數可能會幾核突,舊年純利唔夠4億元(人民幣,下同),換句話講,李寧公司最差的財務數字,可能仲未完全反映。

香港上市的幾個中國體育服飾品牌,就算係「老」大哥李寧公司,都只不過廿幾年貨仔, 好多成功中國企業,例如騰訊(0700),查實係老翻外國成功模式,不過外國互聯網公司入唔到大陸,李寧公司就要同Nike等外國一流品牌在自己地頭拗手瓜,講緊中國消費者,查實唔係太愛國,唔係咁鍾情國貨,對唔少國產消費品更充滿戒心。

Nike的招牌,已經響亮到,一間體育用品店或百貨公司,唔放一堆鐮刀牌產品,顧客會覺得奇怪,即係話Nike可以真正以批發形式散貨,唔雖要依靠大量的加盟店,甚至連專門店都唔使開咁多間,中國競爭對手仍處於靠舖頭開到全國都係嚟做品牌宣傳,李寧公司去到舊年底,特許經營店及自營店,仍然高達九一之比,存貨賣唔去,都係自己捉蟲,唔想見到大量加盟店消失破壞本身的零售網絡,唯有回購存貨。除咗李寧公司,斷估採用類似管理模式的思捷(0330),如果盤數冇花冇假,應該亦受同樣問題困擾。

李寧公司知道唔掂,大刀濶斧改革,未來計劃幾行字講晒,核心訊息清清楚楚,相對之下,思捷「批發」業務出現問題後,搵條冇乜人識的靚佬,鑊鑊同你遊花園講品牌概念,乜嘢「喚醒睡美人之吻」,一年貨仔自己都跳埋船,兩間公司拍埋一齊,李寧公司的救亡行動實際好多囉。

李寧公司而家有兩大機構投資者睇住盤數,可以出古惑的空間應該好細,摷返李寧出嚟做投資者關係,亦係正路做法,雖然唔知體操王子過去廿年發生咗乜事,但比起同國際資源(1051)中策(0235)等扯上千絲萬縷關係的思捷新任主席柯清輝,李寧似乎靠得住好多囉。

如果話LV對Prada(1913),大家仲可以講吓品牌價值,而家中國體育用品股跌到咁殘,查實係時候暫時唔睇品牌,望住幾間公司的救亡方法,判斷吓各自的企業價值。

大家可以諗吓,就算國產品牌幾老土冇創意,係咪每一間都唔識進步,中國消費市場,又會唔會一間土炮都裝唔落。李寧公司最新市值,50個億都唔夠,唔計品牌乜乜物物,講緊一盤可以滿足近萬個服飾銷售點的生產力,清除存貨壓力,執一執盤數及管理,一年賺幾個億唔係太過份要求。

連生意都唔講,TPG手上的李寧公司的換股價,接近8蚊港元,扣埋4年4厘息,當佢望住6、7 蚊價位,TPG放個人落去李寧公司全職打工咁滯,冇理由只係為咗4厘息,目標4年後是要貨唔要錢。

市場往往向相反極端揈得太遠,幾年前李寧公司30倍市盈率都大把人追,相對之下,大家亦可以諗諗市場對呢個行業睇得太淡,大佬,財經茄哩啡就唔相信13億人冇人做運動,個個只會幫襯休閒時裝。

關連文章:
1. 王子個頭(上)(中)(下)
2. 王子壞孩子(上)(下)
3. 體育戰場(上)(下)

伸延閱讀:
1. 土豆網《武尊少林》片段: 李寧誤窺郭藹明全相 
2. 土豆網《武尊少林》片段: 李寧送佛珠請郭藹明食檸檬

6 則留言:

  1. 另一方面亦可以咁睇...

    唔...隨著時間發展,新一代將越來越對李寧陌生,而財富增長和品味提升,將越加遠離運動休閒和國產品牌。

    還有的是國內市場已成兵家必爭之地,國際大牌投放了極多資源於此,加劇了競爭。

    而隨著綜合的體的泡沫出現,國際大牌有了完善的渠道,被爭相引入進駐,反倒國產品牌可能受自家人歧視,進不了大場。渠道上,三四線城市或還有優勢,但網購可能亦會削弱其中優勢。

    或者...全球化之下,本土化的運動品牌未必便可一定存在...

    回覆刪除
  2. 原來順叔咁有影響力,篇文一出就爆升......

    回覆刪除
    回覆
    1. 哈哈,牛哥,咪講笑了,物極必反,咁啱啫,仲有,禾相信隻嘢2012盤數會更加核突...

      刪除
  3. 太過一廂情願,一個國家有自己的品牌不是理所當然。

    不說別的,整個歐洲,除了英和德,哪國有土炮體育品牌?日本1億多高消費力國民,除了mizuno還有?南韓你說得出來嗎?南美洲踢波橫掃天下,但就算本土低級聯賽,有人穿土炮球鞋嗎?

    回覆刪除
    回覆
    1. 寫親體操王子,禾都仲帶住那些年的尊敬,確實係有啲一廂情願(諗起以前好紅的Yasaki),Nike的成功,同美國本土體育事業的成功好有關係,中國體壇而家真係算罷啦,第二時會點,禾仲係有啲一廂情願的主觀希望的

      刪除
    2. 睇過八四、八八兩屆奧運,好難唔對佢有啲感情分。

      刪除