Best Blogger Tips

2012年10月31日星期三

財經茄哩啡(完)

(刊於2012年10月31日am730)

今年今日

今期唔知開乜好,口淡淡,講吓女人未必係阿媽的投資方法。

如果將全地球投資者放埋一齊,多數會形成一個「常態分佈」(Normal Distribution),最右邊,總會有一兩個巴菲特李嘉誠,靠投資眼光賺到變首富,最左邊,又必定有人輸突幾十副身家。

如果市場資訊對稱,人人知道咁多,公平競爭鬥眼光鬥心理質素,這個常態分佈的投資表現平均數,應該係「零」,有人賺就有人蝕,不過金融市場的零和遊戲,當然唔會咁公平,因為資訊永遠唔對稱,多數係小部份人贏大錢,大多數人輸底褲。

股神巴菲特出晒名鐘意睇年報,聲稱2003年全世界唔睇好中國巨型國企之時,每股個幾港元投資中石油(0857)一役,就係睇年報睇返來,長實(0001)主席李嘉誠亦講過,以前鐘意睇年報睇吓入點做生意,睇咗幾千億上市資產回來,自己仲有千幾二千億私己錢分身家俾細仔,反而股神成份身家在冇派息的巴郡,餐餐隊漢堡包唔係冇道理的。

幾十年前新聞財經新聞唔多條,搵本年報望吓都難,搵到年報又識好寶的,可能已經掌握到大量人冇我有的市場資訊,今時今日年報呢類基本資訊已經普及,於是投行賓架呢類正牌財經演員,就會搞到通街結構產品衍生工具,有咁複雜得咁複雜,金融市場的進化,永遠有需要將絕大部投資者排除於真相之外,咁先可以確保,將大部分人,推向投資表現常態分佈的負數區域, 1978年的誠哥穿越時空來到2012年的香港,未必睇得明和黃(0013)長建(1038)本年報。

惠理集團(0806)擺明車馬靠投資搵飯食,年報內第一頁,通常會大大隻數字放幾個亮點認屎認屁,當中真係有意思的,只有兩項,第一個係過去19年「至少經歷七次地區性及全球性金融危機」(而仲未爆煲),第二項就係「每年造訪公司2,500」次(好勤力咁收集情報),講緊惠理40名全職芬佬的工作,就係全年頻頻密密咁去訪問上市公司,直接觀察公司業務同時面對面觀察管理層,令自己在資訊不對稱的市場處於強勢一方。

不過市場資訊相對最平衡對稱的一刻,往往就係金融大災難的時候,因為大部分衰嘢都會現晒形,所以「別人恐懼時貪婪,別人貪婪時恐懼」呢句唔記得咗邊個講的說話,係順叔咁多年所見,散戶最有機會賺錢的投資方法。

睇財經評論、大行報告、股神天書,唔係唔得,不過應該當係刺激思維的方法,跟住人哋貼士追揸沽,就肯定錯晒,不如得閒去圖書館蒲吓,香港天綫、八九六四如果太湮遠,搵返1998年、2008年大股災時的舊報紙,睇睇報紙頭版講乜,「重溫」、Relive一吓當日的市場氣氛,關關難過關關過,乜嘢股市海嘯金融核爆,地球咪一樣咁轉,到再有類似境頭出現的時候,問吓自己有冇勇氣將呢個阿媽係女人,但又最難實行的投資理論付諸行動。

香港人太多投資的衝動,太少理財的觀念,投資同儲蓄查實可以雙線進行,唔係叫你死怪死抵做度叔,而係當係鍛練自己的理財紀律,當係儲「股災基金」都好,點解股災殺到嚟的時候,咁多人零彈藥?

臨尾講多句,寫財經評論,本身是一項搵自己笨的投資,講錯嘢被人鬧到豬頭,唔覺意講啱,亦好快冇晒市場價值,你睇是但一本金鏞小說,已經在大陸翻拍N加9次,電影電視遊戲機版權收到手軟,就知道寫評論不如寫咸故。

唔經唔覺,在這裡起壇已經三年,實不相暪,順叔表面上係個財經茄哩啡,事實上,真係一個財經茄哩啡,寫專欄只係副業興趣,最初一星期一篇500字,到舊年今日餐餐開飯,已經思窮想盡,體力腦力不勝負荷,係時候收爐,今次係財經茄哩啡最後一期。

望返之前的墨汁口水,滴晒汗,幫襯開的熟客應該知道,睇順叔寫嘢唔會發達的,因為得啖笑,唔係妄自菲薄,而係順叔天生鐘意搞笑多過寫財經,未來某日,社會楝樑又好牛頭角順嫂又好,如果有人同順叔真人講開,某年某日睇財經茄哩啡笑到咔咔聲,順叔都會笑到見牙唔見眼的。

祝各位笑口常開。

友綠再會。

關連文章:
1. 順叔自道
2. 財演與財茄

舊年今日

喪搭財經茄哩啡老感點唱,即係「老點」。

投資,聽講不外乎順流逆流,做人何嘗唔能係,不過順叔淨識得玩逆流,所以到而家都係戇尻尻。HEHEHE,祝大家逆流又賺,順流又賺,時時都咁「順」!


順流逆流:越大鑊越快樂

30 則留言:

  1. OO, Brother, How Come?? Anyway, takecare. John

    回覆刪除
  2. So sad......

    每日專欄第一篇總是順叔的<>,三年來一直是我最喜愛專欄第一位。

    聚散有時,感謝順叔三年來的心意和負出,希望還有機會在其他平台,你管也好,網誌也好,看到順叔茄哩啡的表演吧。

    小二+小飛飛

    回覆刪除
  3. 順叔,

    第一次留言. 一直很喜歡你的寫作方式, 有趣生動加上有point, 和主流不同, 很感概你不會再寫了. 感謝你的付出!

    很希望可以繼續和你保持聯絡!

    Larry=)

    回覆刪除
  4. 拎am730 主要因為想睇2個專欄,一個係老施, 另一個係你.
    知道你停寫這個專欄,真係可惜. 希望你有緣再寫吧.
    另外希望你都會keep住update 呢個blog.
    保留一個平台.

    回覆刪除
  5. 每日拎730就為左睇你個專欄,今日見到個標題有D唔信,可惜,可惜...

    回覆刪除
  6. 下! 唔係掛! 順叔你係我超級財經偶像黎架! 好鍾意睇你D分析架,仲有D抵死YOUTUBE,學識好多野... 哎吔,突然收到你封筆既消息真係好失落... 會唔會寫下BLOG呀?..(不過無錢收...)或者去第二份報紙?? 不過可能你太忙想要休息下,總之祝你一路順風,寫BLOG既財經勁人真係買少見少,我會再睇返你之前寫既文,多謝你,順叔.

    木仔

    回覆刪除
  7. 呢個BLOG,仲會UPDATE的,不過幅度頻率,當然會大大縮皮啦。

    噚日本來想寫啲筆耕感言,不過諗吓諗吓,大眾傳媒始終唔係自己打飛機的地方,略略帶過算了,遲啲在呢篇POST下面加多幾句。今朝起身,一年來第一次唔使諗題目開餐,哈哈,鬆毛鬆翼,而家最想都係去機舖鬥地主。

    都係熟客,就唔咁客氣了,一句講晒:多謝各位!

    回覆刪除
  8. Just start to read your article a few months ago
    and now you said you are not going to write any more !!

    Learn another point of view from your articles especially how 1038 use other subsidiary companies to borrow debt. Very insightful la.

    Looking forward to your return later as there are many many companies you have not written on.

    回覆刪除
  9. It is most unfortubate to hear that.
    I am a big fan of yours.
    I love your incisive reviews and the kind of controlled vulgarness.
    Can I suggest that you maintain your blog and continue to write
    shorter pieces?

    Anyway, all the best.

    回覆刪除
  10. 順叔, 肉q麻講句, 三年嚟喺你專欄學到好多嘢. 多謝晒!祝你生活悠然愉快!

    回覆刪除
  11. 不如專心寫書﹒﹒﹒「財茄順叔鬥地主」?

    回覆刪除
  12. 順叔, 原來你之前話遲D會有多D時間, 就係唔喺730寫專欄! 真係可惜! 除咗喺你身上學到嘢, 都睇得好開心, 雖然無笑到咔咔聲...始終地鐵人多!

    期待你的新blog文章!

    回覆刪除
  13. 順叔,等睇你啲搞笑野架!祝好!

    回覆刪除
  14. 順叔, 我有點失落,以後都唔駛睇AM730,唯有睇返你個BLOG 舊文頂下引啦

    回覆刪除
  15. 順叔,作為麻甩佬集團軍一份子,肉痳老能土的嘢就無謂講鳥!有實力的寫手,冇地盤更能暢所慾言!俺代表黨中央、國務院,向人民模範財經尖兵敬禮!

    回覆刪除
  16. 順叔,多謝你多年來帶比我地的老實blog。我學到好多野,也笑到見牙唔見眼。見你要收壇真系唔捨得,不過祝你有多的時間享受人生啦。

    回覆刪除
  17. 點解會咁嫁.....
    睇你D文就好似追劇咁...每日都好期待.
    希望你可以keep住寫,我會長期支持你嫁
    SUNNY

    回覆刪除
  18. 我都唔捨得你個欄,你唔寫真是好可惜

    回覆刪除
  19. 超感謝順叔咁多年既文章,令小弟睇到呢個世界好多真相.學精左好多.唔係重係成67咁..

    好唔捨得.

    好傷感.

    好失落

    真係好多謝.

    祝順叔身體健康.

    回覆刪除
  20. 順叔,你真係畀絕大多數財經分析員稱職 N 咁多倍呀!

    回覆刪除
  21. 順叔! 老老77! 係你身上真係學左好Q 多野~!!
    真係好希望你可以再寫多D 野黎笑下!
    十卜你!XD

    回覆刪除