忽然暴跌（上）

(刊於2010年10月28日am730)

鐵道兵志在四方．．．

（標題為後期改動）

今期睇睇兩隻忽然大跌股份，先講中鐵建(1186)。

韓戰六十週年，大陸官方傳媒大鑼大鼓，放喺國際大棋局，隱隱然有句潛台詞，當年窮到冇褲著，一樣同你死過，今日大國堀起，貨幣戰爭，怕你有牙？

中鐵建前身係解放軍鐵道兵，當年抗美援朝，行先死先，今日同發展中國家援交，一樣係開路先鋒，原來亦一樣槍林彈雨。

上星期五，中鐵建股價創一年收市新高，星期一停牌，大鑊，沙特輕軌鐵路項目，嚴重超支，可能勁蝕41.5億人民幣(下同)，消息一出，震撼地球，股價狂插一成四。

先講少少政治背景，單嘢國家主席胡錦濤舊年初，訪問沙特時簽落，係中沙兩國合作最大項目，直接影響中國同全球最大石油出產國、甚至近六十個伊斯蘭國家關係，胡錦濤先後作出三次批示，話呢個項目「意義重大，一定要搞好」，仲要「按期保質完成」。

一定要把這項目搞好！

即係話，呢個項目，唔單止係中鐵建輸出國產鐵路技術省招牌之作，更加肩負國家外交重任，絕對唔衰得，嚴重超支，可以首先排除項目執行、進度監控出現問題。

根據中鐵建通告解釋，項目簽約時只有「概念設計」，由於班中東油王，對項目「運能需求較合同規定大幅提升」，但「地下管網和征地拆遷嚴重滯後」，延誤工期。即使係咁，中鐵建仍然能夠不辱所托，「按期保質完成」，無他，今年下半年，投入大量人力物力財力，在攝氏五十度高溫沙漠嚴夏日夜趕工，終於滿足在十一月前開通營運要求。

麥加輕鐵，為咗方便每年過百萬伊斯蘭信徒朝覲，運力達每小時七萬二千人，即係話呢條鐵路，絕大部分時間冇乜人用，在沙特油王眼中，只係一個形象工程，諸多要求絕對唔出奇，但亦預咗起條鐵路一定蝕，沙特出名油多錢多，在國際政治舞台亦出名左右逢源，犯不著為區區幾十億人仔，同中國過唔去。

中鐵建網頁，有一欄「決戰沙特」，其中一段公司新聞，提到沙特城鄉事務部正副部長等主事要員，十月初，在中鐵建高層陪同下，試坐即將開通嘅麥加輕鐵，麥加市長豎起大拇指連聲讚好，部長親王親口感謝中鐵建巨大貢獻云云。篇嘢縱有水分，亦可反映雙方合作關係，唔會太差，甚至項目超支，亦在雙方溝通預算之內。

除非中鐵建好似當年鐵色軍旅，為國嫁女貼埋條命，否則項目超支部份，遲早收番，唔會變成爛數，記唔記得，當年港府起西鐵，部分工程超支，一樣照貼番俾承建商，沙特油王，唔會豪唔過當年九鐵獨立王國。

下回再續，又睇睇比亞迪(1211)，跌得有冇道理。

關連文章:
1. 忽然暴跌（上）、（下）

伸延閱讀:
1. 沙齋月麥加交通問題
2. 胡錦濤訪問沙特專輯 (人民網)
3. 《決戰沙特》 (中鐵建網頁特輯)
4. 政治責任高於一切，國家榮譽至高無上，不惜一切代價完成奇蹟工程 (中鐵建網頁)
5. 勁蝕40億人仔 (港交所通告)
6. 沙特油王試坐驗貨直豎拇指 (中鐵建網頁)