Best Blogger Tips

2012年8月14日星期二

放眼中電(上)



今期開中電控股(0002)

五大國企發電公司,近月因為市場開始唱衰煤價前景,股價反彈唔少,不過用星期一的收市價計算,A股加埋H股,市值總值仍然唔夠4,500億元(港元,下同),中電加埋電能國際(0006),已經接近3,000個億,即係3份之2之比。

內地電力市場廠網分家,中電及電能旗下的港燈,一條龍垂直式壟斷市場,亦有大量海外業務,唔可以直接比較,但係彈丸之地700萬人的電力市場,所養大的兩間電力公司,竟然可以同全球第二大經濟13億人口大國的五大發電國企匹敵,可以想像過去兩電有幾好搵。

兩電的香港業務,去年純利大約100個億,是否暴利尚屬其次,最緊要係穩定,每年穩袋幾十個億,2008年之前幾十年,最多間唔中被立法會砌鬧兩句,或者有人去總部門口示吓威咁,既無需要擔心競爭對手出現,更無需要擔心客仔走路幫襯隔離。

香港市場仲有一樣好,地域細,電纜可以駁少啲駁短啲,又好少話乜嘢自然天災,十幾年先扯一次10號風球,電線電纜唔會吹斷一兩條,近年乜嘢力場好似減弱,颳風韋森特襲港,中電青山發電廠只係運煤帶其中一節鬆脫墮地,供電系統冇受影響,同樣係天災,中電澳洲電廠,6月時煤礦場被洪水浸咗,發電量被迫減少又要付出額外重建開支,可想而知,香港對於兩電,由監管架構到自然環境,都係福地。

市場會飽和,咩嘢力場會減弱,監管架構亦會改變,兩電在香港呢個老地盤,近年擺出嚟個姿態,好似越嚟越受委屈咁,例如政府唔利用08年重訂利潤管制協議的時機加大影響力,早排兩電在商業協議容許範圍內加價,政府竟然加入輿論壓力一部分迫兩電轉軚,在商言商又好難唔發火,近日所見,尤其係中電,同政府講數拗手瓜時候,越見刀光劍影。

「在少數天數天朗氣清的日子,當我從中環的辦公室遠眺維港,我會看到西九龍填海區和啟德機場舊址,這兩幅土地已經丟空和閒置多年。假如中電在管理和營運九龍和新界供電系統方面,其決策和執行速度與效率也處於這種水平的話,那今天我大概會是在一片漆黑中和大家見面。」

中電主席米高嘉道理(Michael Kadoorie),唔好話發火開拖,咁多年嚟公開講嘢都唔多句,以上呢幾句怒片香港政府的評語,出自今年5月的中電股東會,當日米高嘉道理喉嚨痛出唔到聲,唔係放底新聞稿算數,要副主席毛嘉達(William Mocatta)代為發炮,務求電子傳媒有聲有畫,可見呢位已經植根香港的猶太富豪有幾火滾。

兩塊大型地皮,用嚟種菜都可以供應吓有機本地農作,偏偏放喺度晒太陽多年,大家試吓想像,米高嘉道理遠眺維港彼岸,映入眼簾計較心頭的,又點會只係兩塊空地政府效率,在呢位中電主席眼中,查實好可能見到西九南九項目落成後,以萬計甚至十萬計的潛在商住用戶。

中電同港燈,一個香港島一個九龍新界,各據壟斷一方,香港「地少人多」可發展空間有限的既定概念,對港燈可能仲成立,對中電又唔係咁講法,例如西九南九發展起嚟,就會為中電帶嚟大量的新增商住用戶,又例如政府要發展新界新市鎮衛星城市,中電又有生意做。

中電及電能市盈率不相伯仲,但相對於版圖局限於港島的港燈,中電的香港業務,仍然存在好大的地域性擴展空間,呢個廣被忽略的因素,既然係中電未來的重要發展潛力,亦好可能成為,中電為未來電力市場監管框架,同政府拗數時的重要考慮因素。

下回再續。

關連文章:
1. 放眼中電(上)(下)
2. 公用功用(上)(中)(下)

沒有留言:

發佈留言