Best Blogger Tips

2012年8月17日星期五

電商血拼(下)



上回講到,內地電器零售公司爆發割喉減價戰,京東商城及國美(0493)蘇寧管理層的微博變成最佳觀戰地點,人哋噴口水,九唔搭八的SOHO中國(0410)主席潘石屹趕住抽水,有網民索性叫呢位日日掛住在網上風花雪月的發展商,搞吓減價戰等大家可以買平樓。

電器同樓最大分別,在於前者可以係好多個割裂的市場,例如電視機劈價劈到血本無歸,iPhone可以完全唔受影響,假如國美買飯煲送iPad,作為生產供應商的美國蘋果都唔會睬你。

「樓價」基本上可以當成一間上市公司的「股價」咁睇,一個個住宅單位的成交價,直接左右「股價」上落,亦即係話,地產商好大程度上,坐埋同一條船,劈「樓價」等如劈自己有份的公司「股價」,所以地產商劈價多數唔係為咗隊冧對手,而係為咗自保;中國電商血拼又好唔同講法,國美蘇寧可以趁住京東商城未上市,以競爭消滅競爭,以本傷人,恃住自己本帳簿仲有咁上下斤兩,用短期內盈利的波動,換取競爭對手的消失。

呢場在虛擬世界進行的割喉大戰,同十幾年前壹傳媒(0282)老闆黎智英的蘋果速銷非常相似,當時百佳惠康兩大超級市場,亦曾出現過短暫的惡性減價戰,最後結果係蘋果速銷執粒收場,聽講肥佬黎因此出血十個億港銀。

當日蘋果速銷挑戰超市霸權失敗,有人話因為香港兩大超市背後的地產財團使橫手,威迫利誘供應商唔係供貨俾蘋果速銷,肥佬黎被迫從海外入貨,最後頂唔順物流成本而執粒,呢個香港「反壟斷」的典故,相信唔少人都聽過,可能程度有多高,可以睇睇家樂福在香港都生存唔到,掉轉頭百佳在上海亦要執粒,反而擁有大量內地貨源的華潤創業(0291),旗下超市及便利店在香港越開越多。

香港的經驗,或者可以用嚟評估吓中國呢場電商血拼的勝負結果,電器零售公司只係銷售代理,唔似得地產商,本身並冇生產能力,供應商惡啲定係零售商惡啲,邊個靠邊個,可以左右呢場電商血拼的結束時間及結果,早排TCL多媒體(1070)海爾電器(1169)先後撲出嚟想叫停惡性競爭,出發點唔係話驚影響盈利,而係怕零售商拖長周轉找數期。

網上罵戰鬥多口水,割喉減價就要鬥多血,國美及蘇寧本身已經坐住幾十億現金,可以打持久戰,蘇寧一個月前發新股俾大股東注資45億元人民幣之後,日前又宣布計劃發債集資最多80個億人仔,減價戰又點需要過百億,蘇寧擺明車馬就係全力進攻姿態,為網上業務及物流配套做足準備。

京東商城聽講先後經過三輪私募集資,早幾個月嚟香港見人,曾經傳過第三輪注資的估值,等如京東商城2007年第一輪的100倍,數目可能有出入,不過京東商場面對最大問題,係背後點樣說服唔同的基金股東拆掂條數。

國美暫時未有注資行動或消息,不過今個星期,幾份內地傳媒先後報道過,國美大股東黃光裕,有意大減價出售在北京的國美商都地產項目,套現大約50億人仔。

之前講過,身陷囹圄的黃光裕,又經歷早兩年的國美控制權爭奪戰,只係手持3成幾國美股權,應該冇乜安全感,如果唔想放棄盤生意,有一定誘因提高持股比例,而家國美股價仲低過當日貝恩資本的「白武士海嘯價」,公司又存在一定注資需要,如果黃光裕變私人持有的地產項目套現半百億消息屬實的話,可能係黃光裕大手增持股權的前奏。

關連文章:
1. 電商血拼(上)(下)
2. 國美家事(上)(下)

沒有留言:

發佈留言