Best Blogger Tips

2012年8月20日星期一

SOHOHOHO中國(上)


今期開SOHO中國(0410),一間可能要抱住睇「嗬嗬片」心態去觀察的地產公司。

首先要講一句,作為一名「金融義和團」的團民,順叔每逢見到一啲覺得老外八月十五特別圓、特別鍾意咀的中國人,冇乜好感,所以對一間公司名又中又西、要用一個英文字一個美國概念凸顯自己又「時尚」又「Posh」的中國公司,一開始已經存在偏見。

跟住又要講一句,作為一個基本分析原教主義份子,順叔由細到大所接受的分析技巧訓練,都講緊成功的公司有一個專注的管理層,公司不務正業,或者管理層在業務範圍以外的曝光率太高,多數有古怪,所以對於一個日日四圍吹水抽水的上市公司高層,一開始已經存在戒心。

中國人多網民多,互聯網虛擬世界叫做係個相對自由的空間,倒瀉屎都有百幾萬人圍觀,一個公司高層,搞個博客平台,解釋吓自己對經濟及行業趨勢的睇法,講吓在股東會或投資者推介會難以觸及的公司資料,當然係好事,不過好似SOHO中國董事長潘石屹咁落力的例子又好少見,日日夜夜在博客或微博風花雪月指手劃腳,邊度出現網上熱點多人圍觀,多數會見到潘Sir身影,例如呢排電器零售公司打價格戰口水戰,人哋在網上噴口水潘Sir衝去抽水,股東見到,難免會問句:究竟你係咪返工嘅呢?

潘石屹花大量時間精神在互聯網噴口水,又出席大大小小的吹水論壇,仲有多個電視綜藝節目,如果因為咁就話佢不務正業,應該唔係咁公道,SOHO中國係少數董事長及行政總裁分咗工的內地上市房企,理論上係個企業管治的良好榜樣,不過分工未分家,負責實務擔任公司總裁一職者,正正係潘石屹的老婆張欣,呢位面形輪廓同「女股神」劉央有幾分相似的賢內座,聽講後生時加盟的銀行部門,啱啱被高盛收購,所以陰差陽錯在高盛香港掛單一年,履歷表從此多咗投資大行賓架的光環,有老婆主內打點一切,潘石屹可以放心出外打滾,日日「SOHO」。

地產公司砌磚頭,磚頭估值點都有個譜,固定資產又硬兜兜企喺度任人睇,要用概念包裝一磚頭,仲要得到相對其他行家更高的估值,查實係超高難度動作,而SOHO中國呢方面就做到出神入化,理得佢「SOHO」定「嗬嗬嗬」,總之賣磚頭吹到好似做賣菜咁,講品味講享受,吹到外國芬佬相信公司有本事點磚頭成黃金,從呢個角度睇,潘石屹查實只係好專注咁做緊佢在公司的本份職責,就係吹水,「SOHO」 又好「嗬嗬嗬」都好,最緊要令人講得佢好有「品味」,將與別不同的形象,幻化成公司別具潛力的「感覺」。

邊位對SOHO中國呢間公司有印象,但又未認真睇過公司盤數的話,不妨試吓咪埋眼,諗吓SOHO中國的「印象」係乜,然後又諗吓呢間地產公司的「主業」係乜,如果閣下講唔出SOHO中國做住宅定做寫字樓、收租定賣樓的話,閣下就要配服潘石屹的吹水神技。

由當年的兩本招股文件,到公司網頁資料,到舊年年報,SOHO中國介紹旗下地產項目的時候,例牌先嚟一個超凡脫俗但九唔搭八的樓盤名,搞到唔知「長城腳下的公社」定「長城公社下的腳」,「淩空SOHO」定「深洞嗬嗬嗬」咁,香港啲凱旋門巴黎鐵塔都顯得落塵俗氣,然後就撻一抽建築師或者文化概念,吹到係「私人收藏的當代建築藝術品」,點呀?

一碟臭豆腐,拎到上枱,你可以叫佢做「遍地黃金磚」,就好似一個鬚刨,其實可以係個風筒,不過你估佢唔到先叫做吹水最高境界,當你以為風筒一定係鬚刨啦,點知佢真係一個風筒。

吹咗咁多,SOHO中國查實賣商舖賣寫字樓,不過一件二件「當代建築藝術品」,近排唔知賣唔出定係唔捨得賣,SOHO中國決定都係「私人收藏」,啱啱宣布轉型做包租公。

得唔得,下回再續。

關連文章:
1. SOHOHOHO中國(上)(中)(下)

6 則留言:

  1. 嘩,順叔你賣關子賣咁長,唔好拉布,快啲入正題啦,呢單好有興趣。
    SOHO宣稱趁亂買落一大堆「優質」物業,現金多,不過佢個業務同其他內房有啲唔同好難比較,我大膽估計以現時國內水緊情況,佢個商業物業銷售模式應該玩完,冇人會買喇卦。
    我又係唔LIKE佢用個英文做公司名,又係覺得佢老細太得閒,所以一直得個睇字。

    回覆刪除
    回覆
    1. 咁都呃你唔到,禾仲以為拉布拉到好不著痕跡添...

      賣寫字樓,咪玩啦,全中環最嘥料塊地,叫做環球大廈,實發當年在置地個口咀回來,拆散賣,而家變咗CBD最具東南亞風情的商場...

      刪除
    2. 環球大廈,你都咪話,就算廿年後有人有本事收番所有業權重建都冇用,因為佢係香港極少數「東南亞文化」「融入」香港有「標致性」嘅建築物,對於一群菲印傭等「弱勢社群」有「歷史意義」同「集體回憶」,必成「保育」目標也,佢嘅「文化價值」係超越錢嘅呢。

      刪除
    3. 牛哥,唔好怪禾拉布,SOHO中國既然建基於「吹水」,真係要花多啲篇幅去分析「吹水」的,佢老妹,下次去北京,你試吓去「SOHO現代城」望望,十年樓齡已經「現」能晒「袋」,殘過香港居屋,遲啲可能係北京的「環球大廈」...

      HOHOHO,你準備好SOHO了嗎?

      刪除
  2. 商業地產同現時內房嘅「量產」模式根本係九唔搭八,香港咁超級高度密集嘅城市,你有幾何見到賣散左嘅商業大廈做得好,商場爛極都仲可以有人行,賣散左商廈真係折上再折,美銀力寶同太子歷山有乜野分別,一行入去就知。大陸攪商業地產,最緊要多cash,阿爺一話收緊信貸,無番咁上下水頭都幾難頂得耐。

    回覆刪除
  3. 地产小弟不懂,期待各为前辈多些分享。

    Mark Zui

    回覆刪除