2012年10月2日星期二

黑色黃金周(上)

今期開自由行,同埋幾隻靠自由行食糊的香港上市公司。

十月一日前後一個星期,向來係香港零售業的消費旺季,今年疊埋中秋佳節,大陸有長達8日的「黃金周」假期,香港亦有4天「長周末」,本來應該旺上加旺,不過天不時也,人不和也,難以想像,同一天空下,這邊東方之珠廿幾分鐘煙花璀燦,那邊維港水域永沉數十亡魂,本來已經冇乜喜慶味道的黃金周,更加盡抺黑色。

順叔絕對冇意在呢個時候抽邊個水,不過在追月夜國慶日,發生可能係香港歷來最嚴重的海上災難,肇事兼被撞沉的船隻,又掛住「港燈」個招牌,望住呢單海上慘劇,好難唔放埋同香港的運數一齊咁睇,越諗越唔安樂,冇晒心機。

冇晒心機的,肯定唔單止係財經茄哩啡。就算在慘劇發生前的兩日假期,平時被自由行旅客淹沒的購物旺區,人流竟然唔見得特別多,名店門口冇內地貴客排隊,大型商場唔算特別擠迫,甚至有啲冇厘神氣、「冷冷清清」的感覺。順叔多數避人流特別多的地方,以上觀察,只係9月30日偶爾路過銅鑼灣的「快拍」感覺,唔作得準,不過問開身邊朋友同埋屋企人,好多人都有類似感覺,就係在今天特別長的國慶假期黃金周,被香港拒內抗陸人士稱為「 蝗蟲」的內地遊客,竟然好似特別少,相信唔需要等政府公布10月零售數據,過幾日有關政府及商業團體的初步數字及口風,可以印證呢個「冷冷清清」的感覺有幾實在。

內地遊客人流冷冷清清,挨緊貴租的零售商就更加淒淒慘慘戚戚,查實幾個月前的內地「五一」長假,好多人已經講緊黃金周的威力開始甩色,過去幾年靠內地客食糊保持高速增長的香港零售業,近幾個月已經開始放緩,7月份的零售數據更加接近3年新低,自由行呢個實施接近10年的「生金蛋」政策,威力明顯開始減弱。

將時間回撥到10年前,2002年10月1日,香港主權回歸5年,特首叫做董建華,政府啱啱公布就基本法23條立法展開公眾諮詢,香港經濟已經連續通縮5年,樓價較97年高位跌咗超過一半,一個月後政府將會推出「孫九招」穩定樓市,兩個月後廣東省開始因為怪病出現搶購白醋潮,當時100港紙仲兌到百二蚊人仔,香港講緊結構性財政赤字,港人大量北上消費及工作,唔少人開始擔心會令香港通縮及財赤進一步惡化,斷估乜嘢中港更緊密經貿關係安排(CEPA)同埋自由行的政策,就係在呢個時候蘊釀成形,2003年SARS重創香港旅遊及零售業,仲有50萬人上街,就催化咗一系列有關河水溝淡井水的政策。

2003年7月28日,第一張在自由行政策下發出的「往來港澳通行證」,在中山發出,從此內地人必須跟團遊港澳的政策,變成歷史,最初只有4個廣東城市開通「個人遊」,一簽一行,而家已經開放到49個城市,如果唔係香港的反對聲音,仲有實實在在的香港「容量」問題,一簽多行同埋自駕遊等政策都可能已經落實,不過就算只係自由行政策,2011年已經為香港帶嚟超過1,800萬內地遊客,佔訪港旅客大約65%,過去10年加加埋埋都有8,000萬自由行訪港旅客。

十年一夢,睇返2012年今天的香港的政經形勢,同2002年10月的時候,好多嘢都可以形成強烈對比,甚至隱約見到兩極分化的發展趨勢,例如樓價,如果唔係非典一役,2002年第4季樓價可能已經跌定,如果當時係谷底,而家就好有高處不勝寒的感覺,又例如香港同內地經濟融合的政治形勢,當時主流輿論支持加大力度同內地合作,而家抗拒中港融合的聲音,就算唔係主流,不過最少係最大聲。

下回再續。

關連文章:
1. 黑色黃金周(上)(中)、(下)
2. 文明中旅(上)(下)

7 則留言:

  1. 香港早排的蝗蟲論求仁得仁矣!

    回覆刪除
  2. 順叔,你既網誌列表要click入單日日子才可看到標題,可否弄成click入月份便可以一覽當月所有文章乎?這樣似乎較方便瀏覽~~~



    回覆刪除
    回覆
    1. Just changed it to a weekly archive. See if it works better. For easier netvigation, there is a roughly-compiled table of contents at the horizontal menu bar by the way.

      刪除
  3. 可能只係國內高速公路免費所以留在國內消費. 今日睇報紙話, 陝西華山塞咗八萬人, 係正常流量四倍. 以前多人都唔咁勁.

    回覆刪除
    回覆
    1. 大塞車肯定有影響,可能唔少人諗住由東北自駕遊到廣東再嚟香港,未過華中已經塞咗半個假期。

      刪除
    2. 國內有車士和道路規劃比其他國家少經驗。短短十年內增加了咁多車同路,本來可能只是設計為平日流量的公路突然多了十幾倍車輛,就算無塞車都好有可能會無油或『特大』交通意外。

      以後公路假日肯定無免費,合和胡飛俠可以放心了。

      刪除
  4. 令人唔安樂的程度絕不下於93年元旦老蘭那次,廿年了﹒﹒﹒

    回覆刪除