Best Blogger Tips

2012年10月11日星期四

間諜公司(上)

(刊於2012年10月11日am730)


先嚟一個同場加映,對間諜活動有興趣,應該買左面本《Spycatcher》睇吓,右邊係相關的Youtube視頻,英國特攻,唔係個個好似占士邦咁靚仔的...

今期開中興通訊(0763)

首先聲明,財經茄哩啡係資訊科技白痴,至今拒絕愛瘋,網上興緊乜完全唔知,3G同4G有乜分別、TD-LTE同WCDMA係乜東東,更加一頭霧水,不過中興通訊及華為兩間中國電訊設備生產商,被美國佬開名指為間諜,可以攞正牌大噴陰謀論,喋喋不休話間謀。

即係咁,間諜呢家嘢,由上帝創造第一條女已經存在,夏娃做咗二五,搞到人類從此要在世間無間道煎熬,由阿當嗒咗啖禁果之後,由古到今,從中向西,間諜活動就無處不在。

明槍易擋暗戰難防,間諜往往係一場戰爭的決勝因素,好似十年前美國佬第二次打伊拉克,一堆堆歐美反戰人士衝咗去做「人盾」,後來美國傳媒報道,「人盾」當中,原來滲邊咗美國中情局間諜,去到收集情報兼收買伊拉克官員,成為戰事速戰速決的關鍵之一。

打仗時有間諜,冷戰更加要間諜,對歷史有少少認識的香港人,應該好明白,香港幾十年來,本身就係一個間諜中心,地理位置方便,易出易入,共產黨派間諜,國民黨派間諜,美國又派英國又派,如果話你知現在已經冇晒間諜滲透活動,你會唔會信,今時今日一個鋁窗跌落皇后大道中,分分鐘仍然會擲中一兩件間諜。

97年香港主權回歸之後,首任特首董建華,唔肯搬入前港督府,其中一個主要原因,聽講就係因為擔心英國佬留低太多間諜裝置,拆唔晒費事煩,拒絕搬入去做官邸,家陣到梁振英做行政長官,上任啱啱過咗100日,前港督府仲裝修緊,普通工程兩三個月乜都搞掂,家陣仲未搬得入去,唔通曾蔭權當日開P太多搞到前港督府爛熔熔咩。

成功反間,好多時作用又遠遠大過間諜本身,舉個例,假設閣下係某公司老闆,發現競爭對手派咗個間諜入嚟貴,閣下第一件事,當然唔應該做瓜個二五仔,而係特登放啲山埃料跣對手鑊金。從呢個角度睇,中興同埋華為,就算真係有在美國從事間諜活動,都唔係乜嘢特別高級機密情報,如果真係高科技到美國五角大樓或白宮要擔心的程度,投資者查實更應該對中興及華為另眼相看。

美國佬對國家安全好敏感,敏感到杯弓蛇影的地步,已經唔係新聞,好似早排美國總統奧巴馬就第一次以國家安全為理由,否決三一重工一間關連企業收購美國風電項目的投資,聽講因為有關風電場太接近美軍設施咁話。

再遠少少,十年前左右,美國佬亦曾經相郁和黃(0013),理由類似係和黃控制咗巴拿馬運河的碼頭,而和黃主席李嘉誠又同北京好熟,有可能影響美國國家安全咁話,舊年維基解密曾經踢爆,誠哥為咗釋疑,曾經帶隊去美國約見當時的美國國土安全部長,甚至表示願意破格俾美國政府隨時核查公司帳目,以澄清同北京的關係,可見美國佬幾惡。

美國政客做華為同埋中興,已經搞咗年幾兩年,舊年11月以兩間電訊設備商,可能為中國情報機關服務,在通訊零件及系統植入間諜硬件軟件的可能為理由,正式展開調查,星期一發表正式報告。

財經茄哩啡查實好想開吓眼界,睇睇一啲電訊設備公司,在乜嘢位可以落焊,加入間諜裝置,不過打開份報告一望,認真大吉利是,由頭到尾,都冇講到乜嘢間諜科技,只係喋喋不休的質疑華為同埋中興兩間公司,同中國政府及軍方等有解釋唔清楚的關係,講到尾查實只係想得指向一個結論,唔能夠排除兩間公司做間諜的可能,威脅美國國家安全,呼籲同中興華為有生意往來的美國公司,考慮過主,並要求聯邦政府阻止兩間公司在美國的井購活動。

下回再續。

關連文章:
1. 間諜公司(上)

伸延閱讀:
1. 美國佬插華為中興報告
2. AMAZON: Spycatcher - The Candid Autobiography of a Senior Intelligence Office

6 則留言:

  1. 人越大越會發現老美查實無嘢叻,唯獨一樣:喊定先!

    世界咁大,少個美國市場,中興華為會倒麼?向北有加拿大,對落有南美,隔個大西洋就係歐洲非洲,太平洋呢邊仲有澳紐

    講到底,只係大選年又一政治把戲,方便打保護主義牌吧

    回覆刪除
    回覆
    1. 大部分無線電設備是歐洲公司的,所以他們也會大打保護主義牌。其實所有無線電通信設備的歐美大廠都是做國防通信和偵察生意起家的,國防打保護牌保護自己人,非常正常。

      刪除
  2. This is the book being banned by UK court. Freedom of speech? Just a joke!

    回覆刪除
    回覆
    1. The UK govt lost at the end... http://news.bbc.co.uk/onthisday/hi/dates/stories/october/13/newsid_2532000/2532583.stm

      刪除
  3. 通信設備保安其實最危險的,不是特別加入盜聽裝置或軟件,甚至是留一兩個漏洞,而是當你買了裝了這些設備後定期更新軟件時會否有加入保安漏洞。

    一兩年前有段新聞:伊朗提煉核子原料純度一直失敗,找不到原因。但東歐有一家電腦保安公司發現,原來提煉設備所用的西門子的控制器黑客入侵。入侵手法非常高明,這些和外界完全隔絕的電腦內居然有四個完全沒有公開過的微軟視窗漏洞,用完全沒有公開的西門子控制器漏洞來入侵核子設施。伊朗因為成果而懷疑自己的科學家,誤會暗殺了好幾個自己人。

    ZTE和華為等公司其實曾經為了搶生意答應公開自己軟硬件設計,但是美國一來怕審查後會忽略更新時的新漏洞,二來當然是為了保護歐美大廠的保護主義。歐美大廠賣百幾萬一部,ZTE同華為可以賣幾十萬,好難鬥平。

    回覆刪除