老共BB班（中）

（刊於2012年10月17日am730)

十八大黨代表櫈仔分布圖(資料: 大公網)

十八大雖然叫做決定中國未來10年辦事人，但既然講到明係「黨代表大會」，即係只係中國共產黨自己搓嚟搓去的權力遊戲。

上回講過老共黨員過去10年增加2,600萬人，最新已經增加到超過8,000萬友，不過有資格行入5年一度黨代表大會的，由87年的十三大開始，都係維持在二千人左右，在十八大可以投票的，只有2,270個黨代表。

黨代表點選出嚟，綜合各老共網站資料所得，成個選舉工程在舊年11月至到今年7月進行，將全國各級共黨組織，分成40個選舉單位，提名由基層黨委開始，「黨委常委會」考察拗數再考察拗數幾輪之後，確定本身選舉單位的黨代表候選人名單，再開黨代表大會或工委擴大會議，以多於15%的差額比例選出所屬黨代表，例如上海作為40個選舉單位之一，分到73張櫈仔，咁上海共產黨組織的「黨委常委會」，就會搞張不少於84人的候選人名單，進行所謂「黨內民主」投票。

各選舉單位分都幾多黨代表席位，唔知，斷估都係上屆黨中央決定，或多或少反映所屬單位的黨員數目及重要性。

40個選單位，包括31個省或直轄市，中央國家機關、解放軍、武警、央企系統(在京)、中央直屬機構、中央金融系統加埋又有6個，以上37個選舉單位，全部都有公布代表團的名單，佔黨代表2,155人，剩低4個選舉單位，冇公開黨代表名單，呢115位神秘人來自邊3個單位，好易估，就係全國台聯、澳門工委，同埋香港工委，今次亦係中國共產黨第一次公開將「中央香港工委」列為單獨的選舉代表團。

雖然名單冇公布，不過如果邊位得閒無事，可以先下載新華社或者人民網公布的十八大2,270個黨代表的名單，再比對其他37個選舉單位的黨代表名單，2,270減2,155，剩低115個，咁就易認好多，按港澳台三地的人脈分辨一吓，就大概可以Shortlist到一份十八大「疑似香港工委」名單。

呢份疑似名單，應該只反映「中央香港工作委員會」的組成，唔一定代表香港的基層共產黨員有幾多人，有人估計過香港的共產黨員有二三十萬之眾，如果真係好似中共組織部咁講，搞乜嘢黨代表「陽光選舉」，就算搬去深圳起壇，都一定有風聲漏出嚟，所以一係香港共產黨黨員並冇傳聞中咁疊馬，一係香港工委的黨代表選舉，仍然停留在小小圈子遊戲。

「疑似香港工委」黨代表有乜人，查實都唔難估，例如中聯辦主任彭清華，仲有李剛、郭莉、王志民、郝鐵川等西環官員，唔會死錯人。

仲有幾個靠肉眼都認得出的「疑似香港工委」黨代表，包括香港投資者熟口熟面的中資老總，例如香港中旅(0308)前主席張學武、招商局國際(0144)主席傅育寧，仲有華潤創業(0291)阿媽華潤集團的大佬宋林，三間公司都係國資委樓下的央企，不過三位黨代表都冇出現在央企系統的公開名單，斷估都係「香港代表」，亦即係香港工委的成員之一，仲有中銀香港(2388)總裁和廣北，亦屬於「疑似香港工委」黨代表。反而中信泰富(0267)的老總常振明，作為中信集團的高層，名字就在中央金融系統的黨代表名單之上，可能一定程度上反映，中信泰富已經冇乜搞香港工委的工作，例如專心去澳洲掘鐵礦。

呢班既係上市中資公司高層，又聽命黨中央指揮的香港工委，除咗做生意仲有乜嘢任務，唔知，不過中共組織部都話要乜嘢「陽光選舉」，在香港呢個國際城市，共產黨的黨內民主選舉，仲係要神神秘秘，黨代表名單又唔可以公開，點講都唔係幾講得過去，中國共產黨點解唔肯在香港公開活動，純粹靠估的話，就係老共的所有理論，都唔可以合理解釋到，「中央」點解要同香港的「地方政黨」或政治勢力，平起平坐咁講數，

下回再續。

關連文章:
1. 老共BB班（上）｜（中）｜（下）

伸延閱讀:
1. 新華網: 十八大黨代表名單
2. 大公網: 十八大專頁
3. 人民網: 各省市十八大黨代表選舉結果

變型金礦（下）

柯。。。柏文。。。麥加登。。。

上回講到，作為港股當中變身最快最多的國際資源(1051)，近幾年終於冇得變住，放棄在馬達加斯加掘黑金，游過去印尼蘇門答臘開金礦，買咗個轉手多次的Martabe 金銀礦，挖足三年，上星期終於掘到，管理層即刻上演大戲，抬住嚿金影相派通街，又四圍接受傳媒訪問。

一個礦無論蘊藏量幾豐富，礦主幾好賺、採礦成本高低，取決於表面的廢石礦層有幾厚，去到黃金礦床要鑽幾深。

紫金礦業(2899)個紫金山，當年出名成本低易開採，紫金公司網頁記載咗一個典故，話說在1997年底，紫金曾經用過千噸炸藥，將成個紫金山頂炸開，爆破移走的山體量，超過100萬立方米，等如10隻巨型航空母艦，從此紫金山可以露天採礦，不過呢，用炸藥粗暴扭轉百萬年的自然之力，紫金山成個山體亦變晒，呢間曾經被中國國家副主席習近平(當年做緊福建省省長)公開稱讚「效益好、環保有創新」的中國第一金股，近年經常出現高污染奪命事故、砂霸崩圍咁，極可能就係當年(及多年來)透支大自然的咭數。

近年全地球環保意識高咗，唔係個個國家只求經濟增長，妄顧子孫福祉，正正經經由零開始建立一個礦場，難度唔細，好似中信泰富(0267)咁，在澳洲個鐵礦2006年已經買咗返來，搞到今日都仲未投產，成本超支仲要一超再超，

中信泰富可以話係中信集團的「面子工程」公司，成隊國家隊照住，澳洲個礦艱苦經營6年都未投產，國際資源個金礦，規模當佢只係十份之一，但係亦需要由零開始建立管理、鑽探、工程團隊，呢頭啱啱先掘嚿金出嚟，嗰頭管理層又同傳媒講，要擺脫「只此一礦」的經營模式，要收購亞洲其他金礦項目，仲要係取得控股權攬晒上身嗰種，老實講，掘幾十萬盎司黃金上嚟先講嘢啦。

印尼蘇門答臘掘金，政策環境，好似紫金當年「福建第一爆」咁胆正命平又有政府高官力撐，定係好似澳洲咁諸多限制工會又麻麻煩煩，最好搵啲印尼華僑問吓。不過呢，有啲公司，研究太多係多餘的，印尼的礦務政策、環保監管、勞力保障、外匯風險、政局變化，順叔冇諗住花時間樣樣調查。

可以咁講，除咗公司名帶住「資源」兩個字的，大家亦可以留意吓有幾多間公司個名有個「礦」字，斷估唔過百都有幾打，應該係內房股之後最熱門的香港上市公司種類，內房股大部分仲賺緊錢兼有息派，一眾變型金礦有幾多間有錢賺，可能一隻手數得晒，一間可以話例外，幾十間就唔會是偶然，最少可以推出一個結論，就係「炒礦」好搵個「開礦」。

如果只係想對一間公司攞個「感覺」的話，最簡單直接就係望吓管理層坐住乜人，唔識國際資源主席趙渡，又唔識邊個係Owen Hegarty，好彩仲有個前滙控(0005)恒生(0011)大班柯清輝。國際資源當日揾柯大俠入局的消息公布後，股價單上爆升幾十巴仙，於是出現「柯清輝」三個字已經值廿個億之說。

一個導演如果同幾個演員合作開，主角又好茄哩啡都好，唔會希望個班底的成員，接其他戲接得太爛，拍到Cheap晒，可能「柯清輝」呢個品牌太好，人緣又廣，個個爭住碌佢張咭，唔做銀行大班之後，反而大把世界，國際資源之後，又接拍中策(0235)蛇吞象南山人壽的大戲，最近思捷(0330)一眾台前演員大地震，柯大俠又捱義氣自己坐正，呢三間公司加埋，散戶點都有個「感覺」啩。

「柯清輝」呢個品牌賣得，因為37年銀行大班的經驗唔係講笑，工行(1398)都搵佢老人家頂梁錦松個非執董職位，滙控呢排被人告到甩褲，又涉嫌操控倫敦銀行同業拆息，又話涉及洗黑錢，好彩柯大俠走得快。

銀行非礦洞，何處惹塵埃，金融世界到爛泥石坑，世間竟無淨土。

關連文章:
1. 變型金礦（上）、（下）
2. 思捷女屍（續集）
3. 柯大俠盜（續集)

伸延閱讀:
1. 名字帶「礦」、「能源」、或「資源」的公司

中信關係（下）

上回講到，中信泰富(0267)及前主席榮智健，同直系母公司中信集團，咁多年嚟關係似親實疏，公司有錢賺跌落大股東榮氏家族個袋， 98年亞洲金融風暴及十年後的全球金融海嘯，榮智健及中信泰富鑊鑊都中招，又要搵阿媽埋單，兩次撲火大隊長，都係中信集團現任董事長常振明。

據中信集團前任董事長孔丹後來接受內地記者訪問時透露，2008年中信泰富炒燶澳元一役，如果唔救，除咗帳面上蝕20億美元，「中信」招牌個商譽損失可能更大，國務院亦有指示「中信集團要對中信泰富負起責任來」。

從其後澳元兌對美金的走勢睇嚟，中信集團揹上身的外匯合約，最後分分鐘有錢賺，近HK$8元購入的中信泰富股權，升值超過一倍，更將一間持股量唔夠3成的香港藍籌企業，變成擁有愈5成絕對控股的附屬公司，呢舖雖然「焗賭」，結局大鑊全勝，常振明作為救火大隊長，甚至可以邀功，同阿公講自己有眼光。

中信泰富重新變成「國控資產」，所謂「母子關係」出現質變，唔再係公司高層與高層中間的問題，好多嘢又唔同講法，尤其係榮智健退任主席一職後，唔知出於本身套現需求定係媽咪打救的協議一部分，分批減持公司股權，目前持股量剩低7%左右，榮氏家族色彩大大降低，到2011年底，中信泰富董事局內，剩低「前太子」榮明杰，董事局下設7個委員會，榮明杰一個都冇份，擺能係花樽一個，舊年中信泰富業績只係微升，榮明杰全年人工更被狂減7成至267萬(港元，下同)，差在未叫呢位前太子自己執包袱。

據中信集團2010年年報顯示，榮智健仍然係母公司「常務董事」之一，中信集團舊年12月完成改制為「國有獨資」，並正在招牌上加上「有限公司」，為香港整體上市舖路，公司新網頁上，董事局已經唔見咗榮智健個名，可見榮氏家族在系內人脈及影響力，進一步淡化。

如果將中信泰富的最高層，看成是新舊兩個老闆的對立面，站在常振明的角度看，人事變遷之後，當然要證明在自己的管理之下，中信泰富作為一間國控公司，唔會失禮得過榮氏家產的年代，最低限度要200%保證，唔會再有爆煲危機，所以中信泰富肯定變成一間更保守的公司，其次就係改善企業管治，大家可以比較吓兩朝年報的主席報告書，睇得出常振明份報告，有花過心思先出街，明顯有同股東溝通的誠意。

中信泰富07年盈利超過100億港元，屬公司記錄，最高市值近1000億銀，今日剩低一半都唔夠。中信泰富舊年純利90億多少少，包括常振明的新一任國企幹部管理層，要公司盈利再創記錄，難度唔高，不過斷估同時要同股東講，市值亦都超過榮氏家族管理年代，咁先夠威。

以中信集團資產的多，要透過注入資產，谷大中信泰富市值，難度等如零，值得留意、甚至值得欣賞的是，管理層冇行呢條捷徑，反而似乎有意突顯踏實的作風，全力去搞前朝在2006年買落的澳洲鐵礦開採項目。作為中信集團董事長，常振明大把嘢要搞，不過佢在中信泰富年報透露，佢自己，同埋整個中信泰富管理團隊，工作重點時間精力，都放在呢個國企在海外最大的鐵礦上游項目。

中信泰富近排股價超嚟越沉，正正因為項目點解超支及投產時間一拖再拖，點解會咁，財經茄哩啡呢類外行人唔識答，純粹從表面證供睇，項目06年買入，近年鐵礦石價格升咗幾多，可以問題國企鋼廠份年報，唔計工程費用，中信泰富投資成本應該唔貴，同自己本身的特鋼投資有協同效應，亦係好正路的策略，如果中信泰富現任管理層克服唔到呢個海外項目的風險， 作為圍棋高手的常振明的最後一步，可能先係小股東望穿秋水的系內業務資產重組。

中信關係（上）

今期開中信泰富(0267)兩母子。

中信泰富既是紅籌亦藍籌，由過渡期大紅大紫的年代，到今日股東日日希望業務重組注入優質資產，中信泰富最大賣點就係「關係」，不過咁多年來，市場似乎普偏高估咗中信泰富的母子關係。

要了解中信泰富，首先要搞清楚中信集團的背景。

巨型國控企業當中，有兩張招牌，最有特色，一張叫「中信」，一張叫「光大」，唔屬於國資委系統，直屬國務院，兩間公司特殊背景，沿於1979年改革開放初期，由鄧小平直接發出的兩張免死金牌，中信及光大成為中國打開國門擁抱資本市場的最早期「窗口」企業。

光大集團都曾經因為經營不善，在阿公令下，接受匯金的注資及重組，中信集團前董事長孔丹曾經講過，過去30年嚟，中信集團在過去30年間，總共只接受咗中央政府2.4億元的資金金。咁即係話，中信集團在搵項目投資時，可以直達國務院攞牌攞通行證，但企業文化基本上係「自費改革」，冇話吓吓攤大手板問阿公要錢。

中信泰富前主席榮智健，在香港起家的第一桶金，係咪來自阿公或者阿媽，追查唔到資料，但係可以好公道的講句，榮智健如果唔係拎住中信集團的招牌，當年香港大孖沙識你係阿燦咩。

中信及光大，分別由兩位第一代紅色資本家， 榮毅仁及王光英創立，王光英廿幾年前退任光大董事長後，子女從冇沾手光大管理層位置，中信泰富作為中信集團在香港資本市場的分支，一直帶住榮氏家族色彩，可以想像，中信集團官僚體系內，見到「榮太子」成為第一代的「中國首富」，在香港住洋樓做馬主，唔少人會睇唔過眼。

廿幾前，唔少香港英資要買政治保險，榮健建扲住中信集團的招牌，既可以「透支」未來香港主權國的信用，獲得銀行貸款四出收購，同時拄住香港華資大孖沙做軍師，在政治動盪的年代，榮智健可以輕易透過銀行及股市獲得資金，穿梭於中資港資英資中間買賣「關係」，膽色眼光以致營商手腕應該相當有一手，不過，香港回歸後十幾年，一直未輪到大紫荊勳章呢個紅色荷蘭水蓋，可見在中港話事人眼中，榮智智在97前在香港資本市場的種種動力，算唔得上乜嘢貢獻。

97年後外資進入中國的窗口比比皆是，中信泰富的紅頂光環亦開始褐色，香港冇乜刁做，要返內地，不過幾個重大投資項目，包括電廠，仲有進入內地固網業務都無功而還，中國入世後幾年全國投資機會一籮籮，中信泰富的問題，竟然是持有幾百億港銀現金唔知點算好，同中信集團的母子關係其實麻麻的現實，正式露底。

中信集團旗下資產近3萬億港元，子子孫孫公司超過400間，一個山頭咁多的綜合國控企業，難免會有大量關連交易，話事人最頭疼問題，相信就係點平衡各個集團的利益分配，中信泰富名為國有企業實為榮氏家產，成日出事又要阿媽跟手尾，在標榜「自費改革」的中信集團，有筍嘢都要排隊尾。

中信泰富2008年炒燶澳元「I Kill You Later」，損手近200億港銀，需要阿媽為衰仔埋買，其實已經唔係第一次，早在1996年，當時中信集團莫財，榮智健又想增持中信泰富，用本身持股做抵押，問滙豐借咗過百億銀，向中信集團收購近18%中信泰富股權，成為公司大股東，98年亞洲金融風暴，中信泰富股價大跌，面對銀行斬倉壓力，當時中信集團除咗透過旗下中信銀行(0998)的前身中信實業銀行，借錢俾榮智健周轉，更加真金白銀在二手市場增持為中信泰富股價托市，令榮智健避過一劫，當時中信集團負責撲火的，正正是現任董事長常振明。

中信泰富炒燶澳元一役，同樣由常振明執手尾，母子關係再出現質變，中信泰富重新成為中信集團的附屬公司，絕對控股權重歸阿公所有，新格局有乜睇頭，下回再續。

政經馬評

(部分內容，刊於2011年11月29日am730)

有銀士雲集的「財經」界，支持唐唐：

十個有九個支持佢 (取消咗遺產稅．．．)

財經影帝帶頭的「演員」界，支持唐唐：

蠢嗰啲人我唔同佢做朋友 （所以我冇朋友．．．)

「財經」「演員」界都支持唐唐，呢班契弟，當財經茄哩啡流嘅，實不相瞞，在１２００張行政長官選舉委員會入場券當中，順叔有票在手的。