Best Blogger Tips

2011年11月28日星期一

政經馬評

(部分內容,刊於2011年11月29日am730)

有銀士雲集的「財經」界,支持唐唐:

十個有九個支持佢 (取消咗遺產稅...)


財經影帝帶頭的「演員」界,支持唐唐:

蠢嗰啲人我唔同佢做朋友 (所以我冇朋友...)

「財經」「演員」界都支持唐唐,呢班契弟,當財經茄哩啡流嘅,實不相瞞,在1200張行政長官選舉委員會入場券當中,順叔有票在手的。



嗱,順叔在立法會地區直選有一票,直選議席30個,即係變咗0.5票(唔該唔好話霍震霆代表傳媒),立法會議員又係1,200人的特首選舉委員會的當然成員,60除2再除1,200再除7百萬,所以在選舉特首時,順叔有「0.00000000357票」的影響力。

相對「一人一票」的權利,其實唔應該除開7百萬,不過,應該冇人會介意順叔老屈呢個反智遊戲。當影響力去到小數點後第9個位,財經茄哩啡的公民權利,當然就剩低吹水唔抺咀的無限聯想。

好,入正題。

如果將香港特別行政區,當成一間大公司地區支部,母公司董事局,考慮提拔地區支部話事人時,「能力」多數只是其次,更重要係呢條友會否「不受控制」,呢個亦可能係唐英年及梁振英兩隻熱門馬的勝負關鍵。

唐英年感情有「缺失」,在內地官場,呢家嘢叫做「生活風格」有問題。內地黨員高幹,通常都係犯咗政治錯誤之後,經濟罪行及包二奶呢啲失德行為先會被踢爆,掉轉頭睇,如果某人「生活風格」有「缺失」,公開承認並被人唱到街知巷問,仍然被捧上高位,其實有違最高官場的潛規則。

不過,唐英年斷估唔係共產黨員,香港話晒都係一個兩制,銀行公會今個月拉隊訪問北京之後,幾個重量級賓架,包括滙控(005)香港代言人王冬勝,同埋東亞(023)李國寶,仲有前金管局行政總裁任志剛,突然齊齊發聲,公開支持唐英年,就知道唐英年有感情「缺失」,成為上位阻力,但未致於係致命傷。

而家講緊應對全球經濟危機,國務院副總理王歧山,近年講嘢,已經冇以前咁聲如洪鐘,但越嚟越高調,甚至條街有人唱緊,經濟非常時期需要非常政治部署,王岐山可能爆冷做下任總理添,呢個「經濟壓倒一切」的政治變奏,唱到嚟香港,應該會變奏再變奏,由「有能者居之」,變咗「戇能者居之」亦無不可。

唐英年競選辦公室未露底牌,最多見到華人置業(127)執董劉鳴煒跟出跟入,但係梁振英競選辦已經曝光,「主席」張震遠,「主任」羅范椒芬。

張震遠麥堅時(Mckinsey)高層出身,向來低調,2004(???)年加入泰山石化(1192)做行政總裁,個人事業可以話「大倒退」,但政界發展越見高調,包括成為市建局,同埋香港商品交易所主席。到而家,張震遠已經被稱為「新公職王」,唔少人一直唔明,點解呢條友咁巴閉,到月前佢公開支持梁振英露底,好多問題不刃而解。

張震遠唔少公職,其實係接咗前「公職王」、中信泰富(267)前董事總經理范鴻齡二攤,如果張震遠由梁振英及背後支持者一路「保送」上位,並接過范鴻齡多個戰略據點的話,好有理由相信,當日范鴻齡甚至是中信泰富,亦是梁振英背後的支持力量之一,作為范鴻齡細妹,羅范椒芬加入梁振英競選辦,亦變得理所當然,話佢係「董建華馬房」,其實相當牽強,大佬,董伯伯個馬房,晨早鳥獸散矣。

星期日梁振英「誓師大會」,唔係咁多猛人公開支持,不過,大家有冇留意,有條友叫陳爽,當然唔係華姐靚女,而係光大控股(165)行政總裁,同時係母公司光大集團高層,梁振英過去咁多年,光大系搞咩嘢活動,幾乎例牌必到,可見同光大系關係非淺。

當年前領導人鄧小平搞改革開放,發咗兩張免死金牌,一張俾榮毅仁,一張俾王光英,中信集團及光大集團,成為「國控」金融企業「走出去」的開路先鋒,今日變身兩大金融綜合企業,名義上直屬國務院,但相對於國資委旗下的央企,以及由匯金控股的國企巨銀,中信及光大,可以說是中國兩股最「不受控制」的金融力量。

吹到呢度,順叔的無限聯想亦差唔多乾溏,梁振英公開否認自己係共產黨員,斷估唔會捉字虱,其實係「共青團」,梁振英背後邊個撐腰,樸朔迷離,不過,如果話佢代表一股根正苗紅、本來可直通天庭但近年差唔多斷線的「不受控制」建制力量,雖不中亦不會太遠,當然,呢股力量已經在香港部署咗十幾年。

無論梁振英代表乜嘢力量,唐英年能力又有幾高,北京最唔想見到的情況,應該係可能搶到百零票的泛民陣營,有機會成為造王者(King Maker),即係話最後「選舉」形勢,其中一個要嬴最少十幾個馬位先夠保險,下年3月呢場跑馬仔,應該越嚟越唔刺激,真正有得賭的盤口,其實係5年之後,邊個可以成為香港第一位「民選」特首。

2012年3月後入主上下厘畢道的香港行政長官,可能亦是最兇險的一位,因為2017年特首選舉,好好醜醜,叫做一人一票產生,未來五年,除非香港特首可以完全清除政治無間道,建立一個潑水不進的堅強管治團隊,呢樣嘢談何容易,香港畸形政治設計,注定未來五年政經局勢,亂過狗粥。

(講政治,無謂一開二,篇幅有限,報章版約刪掉600字...)

4 則留言:

  1. 周君形象奇差,已是偽人之典範,實在難以理解為何找其造勢...

    唐唐

    回覆刪除
  2. 車...我以為你真係有一票tim..
    不過我buy 你既睇法!

    回覆刪除
  3. HEHE...順叔最多「昆」你幾粒鐘啫...

    回覆刪除
  4. 如果唐唐可以有驚無險做到特首, 又順順利做到2017年退休, 只能夠講佢真係一世夠運了...
    當然, 可以的話, 我想梁振英做多d..

    回覆刪除