顯示包含「00308 - 中旅國際」標籤的文章。顯示所有文章
顯示包含「00308 - 中旅國際」標籤的文章。顯示所有文章

2012年1月19日星期四

文明中旅(下)


香港中旅做得好...

連繫至親感受至珍

上回講到,中旅國際(308)管理層出事人事變動,之前做華潤電力(836)老總的王帥廷,過檔做中旅阿頭,新人事有望帶嚟新作風。

華潤集團一大抽上市公司,香港藍籌已經有3間,一隻華潤電力市值近8百億元(港元,下同),已經等如中旅10倍,王帥廷在華潤集團係副董事長兼副總經理,在中旅母公司「港中旅」,官至副董事長兼總經理,叫做升官。

細有細做,都係幫阿公管理國有資產,相對已經係巨無霸的華潤,資產總額約550億元的港中旅集團,影響力細咗,但發展空間更大,作為集團唯一上市資產,中旅已經殘到貼地,認真做的話,唔難做到成績。

中旅之前兩年業績大倒退,兩年派息每股得1港仙,主要原因係近年投資的度假區資 產及裝修,可使用年前由40年減至20年,折舊開支大增,兩年純利加埋得1億銀多少少,中央政府近年大力推動旅遊業,視之為經濟向內需轉型的戰略工業之一,港中旅唔上市,唔知業績做成點,但係睇住中旅盤數的話,國資委應該炒哂班管理層。


張學武

王帥廷

業績唔見得人,股價當然插,就喺呢兩年低潮期,中旅高層及員工,包括前主席張學武,獲得一批新認股權,加埋大約1.25億股,今年6月開始可以行使,行使價HK$1.7元,王帥廷如果有認股權,作價可能更低。

舊年開始,中旅開始進入盈利催谷期,上個月開始,密密回購股份,大家可以留意呢個動作會唔會繼續,中期業績前發出盈喜,同大家講已經折舊完畢,至去年6月底半年,純利已經彈返上3.5億元,仲話派息比率會保持50%咁話。

假設中旅盈利水平,回復到09年前的5、6億元水平,市盈率12、3倍,市帳率0.67倍,以一間收入跟內需消費直接掛鈎的企業嚟講,可以叫做平,股價上返HK$1.7元呢個管理層認股權行使價,唔會有難度。

港中旅在官方網頁提到,到2015年,目標係總資產膨脹兩倍至1,300億元,每年總利潤超過70億元,如果國資委真係有牙力,推動旗下百幾間央企,認真重組下亂過狗粥的業務,包括將千幾二千間國營酒店,轉劃俾幾間主要從事旅遊消費的企業的話,港中旅呢個五年計劃唔算太進取,問題係母公司想中旅發揮咩嘢角色。

在中國做旅行社競爭大,國營企業唔夠靈活,好難同携程網呢類民營旅遊網競爭,最大優勢其實做陀地,霸住名山勝地景點收入場費,老土擾民但夠晒穩陣,中旅就係向呢種所謂「旅遊資源」業務轉型。中旅本來計劃分拆酒店業務上市,繼續同阿媽收購景區業務,月前因為市況差,擱置有關計劃,其實唔係冇道理,旅遊概念在A股當炒,另一間旅遊業央企國旅(601888),市盈率35倍,港中旅就算有靚資產,都應該放喺A股,唔係注入殘到無倫的中旅,港中旅如果選擇A股市場做發展平台,中旅難逃僵屍化紅籌的命運。


舊華潤: 紅色

新華潤: 綠色

中旅有冇新作風,講到尾要睇管理層有冇大志,呢方面可以從細眉細眼的動作感受得到,例如中旅仲坐住間三流電廠,好心就益下華潤電力晨早賣咗佢,唔好俾人亂七八糟的感覺,王帥廷做開藍籌老總,更識得同機構投資者打交道,應該好明白呢個道理;又例如,大家可以行入香港中旅社觀察吓,招牌會唔會搞得光鮮一啲,當年華潤超市,由紅色變做綠色,就引證咗華創(291)專心搞零售的決心,亦成為股價轉向分水嶺。

企業形象同國家形象一樣,細微處見真實力,中國話搞「文明旅遊」,已經十一五講到十二五,順叔一位港燦網友話齋,經過70年代的肅貪倡廉及清潔運動,香港才真正晉身先進城市,中國要用「軟實力」同西方文化拗手瓜,同樣要做好呢兩大工程,熱切期待大陸同胞不再隨處便便四圍放飛劍的一日。

關連文章:
1. 文明中旅(上)、(下)
2. 文明旅遊
3. 中旅之旅(上)、(下)

2012年1月18日星期三

文明中旅(上)


今期開中旅國際(308)。

近來打開香港報紙,通常有一兩單嘢,講吓內地遊客或者大陸同胞的言行舉止,例如在巴士行張摺枱食橙、喺產房打邊爐、大小二便痾落洗手盤咁。

好似早幾日,幾個拖住一抽旅行喼同兩三個細路的內地遊客,坐九鐵食童星點心麵,有香港人睇唔過眼,出聲話兩句,內地遊客可能態度太串,嗌到好勞嘈,一段「香港人大戰大陸人」視頻,在互聯網瘋傳。

或者唔係好多人講得清楚,本是同根生,奧運會中國攞金牌會覺得高興,但係面對身家爆發眼界未開的大陸同胞,又會咁易扯火,反映中港文明水平差距又好、兩地文化衝突又好,芝麻綠豆的小事變成新聞,在香港似乎越嚟越有市場,有大眾傳媒甚至將呢種,「唔知點講」又好似「唔係好講得出口」的情緒,叫做「仇內」。

又「仇富」又「仇內」,香港人認真唔得閒,但呢類事件,在社交網站傳播速度,快過茉莉花粉,唔係講笑的,上次廣東道Dolce & Gabanna旗艦店千人挑機,已經係一個好大警號,如果有大陸同胞,自由行隨街吐痰慘被香港人爆樽,咁就大件事兼大吉利事了。

大家仲記唔記得女導遊「阿珍」?只係年半之前的事,阿珍在旅遊巴上狂炳內地遊客的視頻,被大陸同胞放上網,搞出大頭佛,當時香港主流傳媒,幾乎一面倒鬧阿珍唔啱,如果呢件事發生在今日,阿珍就算唔成為英雌人物,斷估亦唔使被釘牌。就快過年旅遊旺季,大家又記唔記得女導遊「阿蓉」?如果又有內地「旅霸」,在香港撩導遊嗌交打交博賠償,好易擦槍走火。

當日「阿珍事件」之後,中央政府向香港亮出黃牌,發出旅遊警示,旅發局主席田北俊急急腳趕去北京擦鞋,而家田少或者香港政府真係要諗諗,點先可以同北京反映香港呢種所謂「仇內」情緒,叫當局在旅客自由行之前,重溫一吓已經在內地講咗好耐的「文明旅遊」,如果唔係,自由行好快會變成不可持續的政策。田少唔識點做的話,去西環睇吓可唔可以撞到郝鐵川啦,呢位中聯辦宣傳文體部部長咁得閒指手劃腳,再唔做吓正經嘢怕且要被炒魷。

03年自由行政策出台,唔少香港散戶望住「中國旅行社」個招牌,以為中旅國際實唔會死錯人,點知捉蟲,全國幾萬間旅行社,競爭激烈到零團費,「中」字加個「旅」,唔等如一間擁有市場優勢的壟斷性國企,自由行加「屍爬」的政策突變,更加令中旅國際變成最唔識賺錢的僵屍紅籌,中旅國際早年的發展,大家可以睇返前年7月「阿珍事件」之後,財經茄哩啡的兩篇「中旅之旅」。

18個月前的中旅國際,市值都仲有100億元(港元,下同)左右,當日已經話呢隻嘢管理質素,香港中資企業當中幾乎包尾,會計手法又古古怪怪,冇晒能見度,有推遲盈利入帳之嫌,到咗今日,市值再打8折,剩低80億元。

通常一間僵屍級的紅籌國企,多數有一班僵屍級的管理層,所以如果管理層大換班的話,應該要留意吓公司的最新轉變。

中旅國際舊年就換咗人,舊年9月開始,副主席鄭河水夠鐘退休,在中旅系做咗十幾年的主席兼執行董事張學武亦同時辭任,專注母公司業務,接替張學武嗰位新幹部,叫做王帥廷,調任到中旅國際之前,任聯華潤電力(836)主席,在在華潤系統工作多年。

呢個調動,非常古怪,下回再續,睇睇新人事下,中旅國際有乜新作風。

關連文章:
1. 文明中旅(上)、(下)
2. 文明旅遊
3. 中旅之旅(上)、(下)

2010年7月30日星期五

中旅之旅(下)

(刊於2010年7月29日am730)

上回講到,中旅(308)打正「中國旅行社」招牌,「中」字當頭,但阿媽又唔當佢係親生仔。

中旅前身,上海儲蓄銀行旅行部,上世紀二十年代,傳奇銀行家陳光甫創立,開揚國光,抵制國際經濟侵略,二戰期間唔少貢獻,包括協助華僑歸國抗日,故宮國寶南送,亦係中旅承辦。光榮歷史,成為日後包袱,49年後被共產,陳光甫後來在台灣,復辦「中國旅行社」,營運至今,中旅香港分社業務,輾轉變成四大駐港中資企業之一。

招商、華潤及光大,三大老牌中資,曾經何時,先後風光,從國控母公司身上,攞到唔少著數,如果唔係朱小華落馬,令光控(165)發展受挫,而家應該全部係藍籌,中旅斯人獨憔悴,多年嚟,由國家政策到國資重組,未見受惠,非常異數。
中旅被扶正為旅遊業國企龍頭希望,在03年宣佈正式死亡,中國國際旅行社總社,同中國免稅品(集團)總公司合併,04年變成中國國旅集團, 08年成立國旅股份有限公司,09年底A股上市。

中旅母公司「中國港中旅集團」,同國旅母公司「中國國旅集團」,現時同屬國資委轄下,125間央企之一,表面上咁高咁大,但後者同時在全國機場關口,擁有免稅商品經營權,「中旅」同哎吔阿哥「國旅」,邊個先係親生仔,一睇就知。

至週二收市,中旅市值大約100億港元,只係國旅一半(見附表),市帳率,中旅唔夠1倍,國旅超過5倍,即係話,將兩間公司拆骨,中旅資產,主要包括中港澳8間酒店及陝西無那那一間電廠,仲值錢過國旅,。

市帳率低,唔等如市場稱許你資產矜貴,而係投資者懷疑你賺錢能力。

由01年開始,唔計03年非典,中旅純利,每年保持在5至6億左右水平,09年,突然改變會計政策,話你知物業裝修可使用年期,以前捱到40年,而家最多20年,折舊開支大增,結果幾乎冇錢賺,98年以嚟,第一次唔派息,變相推遲盈利入帳,唔知管理理層動機係乜,但盈利能見度,從此驟降。

國務院最新幾項振興旅業措施,包括支持合資格公司融資上市、放寬外資經營國民出境旅遊業務等,其實只會進一步削弱中旅競爭力,並唔係好消息,真正關乎中旅及母公司政策,仍然係國資重整,包括要125間央企,整合為100間,同時剝離非核心酒店、地產業務,中旅或者可以執到少少平貨,但更大可能,係一個唔該,國旅食埋中旅,呢個亦係投資中旅唯一理由,唔驚長坐,又唔志在派息,先至好諗。

#

中旅之旅(上)

(刊於2010年7月29日am730)


如果有人識得李巧珍,麻煩代為轉達:「喂,阿珍呀,我係順叔呀,喺呢二十日嚟,我一直有句說話想同你講,其實...我撐你!」

導遊鬧遊客,係態度問題,香港變「購物地獄」,屬制度問題,冇理由要小人物揹大黑鑊。

識得拍低阿珍鬧人,再擺條片上網放大事件者,斷估唔係文盲,如果唔明白,世上冇免費午餐道理,貪著數參加超低價團,又想有好似林行止咁,搵個牛津歷史系畢業生做導遊,唔該去天堂發夢。

03年自由行開始,消委會接獲旅客投訴,由千零宗,增加到08年近三千宗,但一連串保障旅客措施之後,包括內地團六個月購物退款保障,投訴舊年已經跌到697宗,呢個數唔假得,香港已經做咗好多嘢,大陸當局,攞住阿珍鬧人片段就發出旅港警示,同外國傳媒,捉住一兩件大陸同胞隨街放飛劍鏡頭,大做「醜陋的中國遊客」文章,冇分別。

大陸唔少人,身家暴發,眼界未開,要在呢班友仔身上賺錢,唔容易,導遊係咁,旅行社都係咁。
旅遊消費,在大陸只係近三十年之事,市場大,增長快,但高度開放,至07年底,全國近二萬間旅行社,競爭激烈,零團費強迫消費,絕對唔係香港獨有毒瘤,經營得法,尚且搵食艱難,管理不善,更加冇運行,最好反面教材,香港中旅(308),打正「中國旅行社」招牌,打滾超過八十年,都仲係唔上唔落。

中旅92年香港上市,97及07年,兩個熱炒中國大浪,股價兩度爆過上6蚊樓上,但好快打回原型,長期在一兩蚊水平徘徊,今個星期國務院又出招,振興旅遊業,又有唔少人,條件反射式翻閹呢隻僵屍紅籌。

香港老牌中資當中,如果中旅話自己管理質素排尾二,怕且冇人敢爭第尾。作為一間香港旅行社,中旅幾有競爭力,大家可以諗諗,對上一次外遊或者翻大陸,幫襯中旅係幾時,服務質素又係點,心裡有數。

做大陸團港澳遊生意,中旅以前仲有少少優勢,03年自由行,CEPA開放埋港資經營出境旅遊市場,救咗香港旅遊業一命,但中旅財路斷正,競爭力盡失,據國家旅遊局數字,04至08年,大陸旅遊行業總收入增長69%,期間中旅旅行社業務收入,增長唔夠三成,個餅大咗,但中旅搶唔到幾多肉食。

今時今日,講緊大陸有銀士去巴黎上鐵塔捽腳指,中旅仲玩緊錦繡中華世界之窗,兩個全球最巨型A貨,仍佔公司收入一成,不思進取,舊年底發展嵩山少林景區,已經係近年鮮見大動作。

唔少人仲憧憬緊,中旅有母公司注資呢樣嘢,但中國旅行社,可能係唯一「中」字當頭央企,又唔被阿媽當係親生仔嘅國企,點解,下回分解。